އަލްޖަޒީރާއަށް ސިއްހީ މަސްދަރުތަކުން މަޢުލޫމާތު ދީފައިވާ ގޮތުގައި، ވޭތުވެ ދިޔަ 24 ގަޑީއިރުގެ ތެރޭގައި ޣައްޒާގެ އެކި ސަރަޙައްދުތަކަށް އިޒްރޭލުން ދިން ވައިގެ ހަމަލާތަކުގައި 50ށް ވުރެ ގިނަ ފަލަސްޠީނު މީހުން ވަނީ މަރުވެފައެވެ. އޭގެ ތެރެއިން މަދުވެގެން 42 މީހުން މަރުވެފައިވަނީ ޣައްޒާގެ އުތުރުގައި އިޒްރޭލުން ހިސާރުކޮށްފައިވާ ސަރަހައްދުގައެވެ. 

އަނެއްކޮޅުން ލުބުނާނުގެ ޞިއްޙީ ވުޒާރާއިން ބުނާގޮތުގައި، ވޭތުވެދިޔަ 24 ގަޑިއިރުގެ ތެރޭގައި އެ ޤައުމުގެ އެކި ސަރަޙައްދުތަކަށް އިޒްރޭލުން ދިން ހަމަލާތަކުގައި 52 މީހުން މަރުވެ، 161 މީހުން ވަނީ ޒަޚަމްވެފައެވެ. 

ލުބުނާނުގެ ސައިޑްން ސިޓީގައި އެއްގަމު އުޅަނދަކަށް އިޒްރޭލުން ދިން ކަމަށް ބެލެވޭ ވައިގެ ހަމަލާއެއްގައި ތިން މީހުން މަރުވެ، އދ.ގެ ސުލްހަ ބަލަހައްޓާ ފައުޖު (ޔުނިފިލް) ގެ މެލޭޝިއާގެ 6 ސިފައިންނަށް ކުދި ޒަޚަމްތައް ލިބުނު ކަމަށްވެސް ރިޕޯޓްތައް ބުނެފައިވެއެވެ. 

އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި 7 އޮކްޓޯބަރު 2023 އިން ފެށިގެން މަދުވެގެން 43،469 ފަލަސްޠީނު މީހުން މަރުވެ، 102،561 މީހުން ވަނީ ޒަޚަމްވެފައެވެ. 

ޣައްޒާގެ ހަނގުރާމަ ފެށުނީއްސުރެ އިޒްރޭލުން ލުބުނާނަށް ދިން ހަމަލާތަކުގައި މަދުވެގެން 3،102 މީހުން މަރުވެ، 13،819 މީހުން ވަނީ ޒަޚަމްވެފައެވެ.