މުދައްރިސުން ތަމްރީނުކުރުމުގެ ޕްރޮގްރާމްގައި 135 ދަރިވަރުން ބައިވެރިވި، ރަށްރަށުގައި ޕްރޮގްރާމް ކުރިއަށް ގެންދިއުމަށް ދަނީ މަސައްކަތް ކުރަމުން: މިނިސްޓަރު ޝަފީއު

މިއަހަރުގެ މުދައްރިސުން ތަމްރީނުކުރުމުގެ ގައުމީ ޕްރޮގްރާމްގައި 135 ދަރިވަރުން ބައިވެރިވެފައިވާއިރު، ރަށްރަށުގައި މުދައްރިސުން ތަމްރީނު ކުރުން ފުޅާކުރަން މަސައްކަތް ކުރާނެ ކަމަށް އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވިދާޅުވެއްޖެއެވެ.

ބުރާސްފަތި ދުވަހު ދިވެހިރާއްޖޭގެ ގައުމީ ޔުނިވަރސިޓީގެ ސެންޓްރަލް އޮޑިޓޯރިއަމްގައި ބޭއްވި ޚާއްސަ ރަސްމިއްޔާތުގައި މުދައްރިސުން ތަމްރީނުކުރުމުގެ ގައުމީ ޕްރޮގްރާމް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ އިފުތިތާހު ކޮށްދެއްވާފައެވެ.

މިރަސްމިއްޔާތުގައި މިނިސްޓަރު ޝަފީއު ވިދާޅުވީ ކުރިއާ ހިލާފަށް މިހާރު މުދައްރިސްކަމުގެ ދާއިރާއަށް ވަންނަން ބޭނުންވާ ދަރިވަރުން އިތުރުވަމުންދާ ކަމަށެވެ. މިއަހަރުގެ ޕްރޮގްރާމްގައި 135 ދަރިވަރުން ބައިވެރިވެފައިވާއިރު، ކުރިއަށް އޮތްތަނުގައި މިއަދަދު އިތުރުވާނެ ކަމަށް މިނިސްޓަރު ޝަފީއު ވިދާޅުވިއެވެ. އަދި ވިދާޅުވީ އަންނަ އަހަރު ހުޅުވާލެވޭ ފުރުސަތުގައި މަދުވެގެން 150 ވަރަކަށް ދަރިވަރުން ބައިވެރިވާނެ ކަމުގެ އުންމީދު ކުރާ ކަމަށެވެ.

މީގެ އިތުރުން މިނިސްޓަރު ޝަފީއު ވިދާޅުވީ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ އެހީތެރިކަމާއެކު ރަށްރަށުގައި މުދައްރިސުން ތަމްރީނު ކުރުން ފުޅާކުރަން މަސައްކަތް ކުރާ ކަމަށެވެ. މާލެއަށް ދިރިއުޅުން ބަދަލުކޮށް، ދިރިއުޅުމުގެ ޚަރަދުތައްކުރުމަކީ އެއީ ކޮންމެ ކޮންމެ އާއިލާއަކަށް ފަސޭހަކަމަކަށް ނުވާނެކަން ފާހަގަކުރައްވައި މިނިސްޓަރު ޝަފީއު ވިދާޅުވީ ސަރުކާރުގެ ސިޔާސަތުގެ ދަށުން ދަރިވަރުންނަށް ރަށުގައި ތިބެގެން ކިޔެވޭނެ ގޮތެއް ޕްރޮގްރާމްގެ ތެރެއިން ފަހިކޮށްދޭނެ ކަމަށެވެ.

މި ރަސްމިއްޔާތުގައި ރައީސް ވަނީ މުދައްރިސުން ތަމްރީނުކުރުމުގެ ގައުމީ ޕްރޮގްރާމްގައި މިއަހަރު ބައިވެރިވި 135 ދަރިވަރުންނަށް، ސްކޮލަރޝިޕް ލިބުނުކަމުގެ ލިޔުން ހަވާލުކޮށްދެއްވާފައެވެ.

މި ޕްރޮގްރާމް ފަރުމާކުރެވުފައިވަނީ ގްރޭޑް 11 ގައި އޭލެވެލްއަށް ކިޔަވަންފަށާ ދަރިވަރުންގެ ތެރެއިން މުދައްރިސަކަށްވުމަށް ޝައުގުވެރިވާ ދަރިވަރުން އޭލެވެލްގެ ކިޔެވުމާއެކު، ޓީޗިންގ ފައުންޑޭޝަން ނިންމުމަށް ފަހު ޓީޗިންގ ޑިގްރީ ޕްރޮގްރާމް ފަށާގޮތަށެވެ. މި ޕްރޮގްރާމްގައި ބައިވެރިވާ ދަރިވަރުންނަށް މަހަކު 1500 ރުފިޔާގެ ސްޓައިޕެންޑެއް ދިނުމަށްވެސް ވަނީ ހަމަޖެހިފައެވެ.

މި ޕްރޮގްރާމްގެ ދަށުން ދަރިވަރުން ތަމްރީނުކުރުމަށް ހަމަޖެހިފައިވަނީ، މުދައްރިސުން ލިބުން ދަތިވާ މާއްދާތަކާއި، ރަށްތައް ފާހަގަކޮށް، އެ ކަންކަމަށް ޚާއްސަ އިސްކަމެއް ދީގެން ކަމަށް އެޑްކިޔުކޭޝަން މިނިސްޓްރީން ބުނެއެވެ.

މި ޕްރޮގްރާމަކީ ގްލޯބަލް ޕާޓްނަޝިޕް ފޮރ އެޑިޔުކޭޝަންގެ މާލީ އެހީއާއެކު މިނިސްޓްރީގައި ގާއިމުކުރެވިފައިވާ "ތައުލީމަށް އިންގިލާބީ ބަދަލު (ތައިބަ)" ޕްރޮޖެކްޓްގެ ދަށުން ހިންގާ ޕްރޮގްރާމެކެވެ. އަދި މި ޕްރޮގްރާމް ކުރިއަށްގެންދަނީ މިނިސްޓްރީއާއި ދިވެހިރާއްޖޭގެ ގައުމީ ޔުނިވަރސިޓީ، ދިވެހިރާއްޖޭގެ އިސްލާމިކް ޔުނިވަރސިޓީ އަދި ވިލާ ކޮލެޖް ގުޅިގެންނެވެ.