ފުރާވަރު އުމުރުފުރައިގެ ދަރިވަރުންނަށް ދިރިއުޅުމުގެ ހުނަރުތައް ދަސްކޮށްދިނުމަށް ސްކޫލްތަކުގެ ޓީޗަރުން ތަމްރީނުކުރުމުގެ މިއަހަރުގެ ހަތަރު ވަނަ ބުރު ފަށައިފިއެވެ.

މި މަހުގެ 12 އިން 20 ގެ ނިޔަލަށް ތުލުސްދޫގައި ހުންނަ ކ. އަތޮޅު ތައުލީމީ މަރުކަޒުގައި ކުރިއަށްދާ މި ތަމްރީނު ޕްރޮގްރާމްގައި 16 ޓީޗަރަކު ބައިވެރިވާ ކަމަށް އެޑިއުކޭޝަން މިނިސްޓްރީން މައުލޫމާތު ދީފައިވެއެވެ.  މި ތަމްރީނު ޕްރޮގްރާމަށް ބައިވެރިން ހޮވާފައިވަނީ ލައިފް ސްކިލްސް ފްސިލިޓޭޓަރުން ތަމްރީނުވެފައި ނެތް ސްކޫލްތަކުންނާ އަދި އާބާދީ ބޮޑެތި ސްކޫލްތަކުންނެވެ.

ދިރިއުޅުމުގެ ހުނަރަކީ ސްކޫލްތަކުގެ މެންޑޭޓުގައި ހިމެނިގެން ސްކޫލް ދައުރު ނިމުމުގެ ކުރިން ކޮންމެ ދަރިވަރަކަށް ވެސް އެނގެންޖެހޭ ކަމަކަށް ވާއިރު، ލައިފް ސްކިލްސް ފެސިލިޓޭޓަރުން ތަމްރީނު ކުރުމުގެ ތިން ބުރެ މިއަހަރު ތެރޭގައި ހިންގި 66 ޓީޗަރުން ލައިފް ސްކިލްސް ފެސިލިޓޭޓަރުންގެ ގޮތުގައި ތަމްރީނުކުރެވިފައިވެއިވާ ކަމަށް މިނިސްޓްރީން ހާމަކުރެއެވެ.

ހަމައެހެންމެ ސްކޫލްތަކުގެ ޕްރިންސިޕަލުންނަށް ދިރިއުޅުމުގެ ހުނަރުތަކާބެހޭ މައުލޫމާތު ދިނުމަށް މިދިޔަ ޖެނުއަރީ މަހު ތަމްރީނު ޕްރޮގްރާމެއް ކުރިއަށް ގެންގޮސްފައިވާ އިރު، މި ޕްރޮގްރާމްގައި ގއ. ގދ. ލ. އަދި ދ. އަތޮޅުން 23 ޕްރިންސިޕަލަކު ބައިވެރިވިއިވާ ކަމަށް އެޑިއުކޭޝަން މިނިސްޓްރީން މައުލޫމާތުދެއެވެ.

ފުރާވަރު އުމުރުގެ ދަރިވަރުންގެ ހައްގުތައް ރައްކައުތެރިކޮށް ނުރައްކަލަކަށް ހުށަހެޅިދާނެ ހާއްސަ ހާލަތަކުގައި ބޭނުންކުރެވިދާނެ ހުނަރުތައް ވެސް އުނގަންނައިދޭ މި ޕްރޮގްރާމްގެ ދަށުން 2016 ވަނަ އަހަރު ނިމުން އިރު 624 ޓީޗަރުން މިކަމުގެ ފެސިލިޓޭޓަރުންގެ ގޮތުގައިވަނީ ތަމްރީންކުރެވިފައިވާ ކަމަށް ވެސް އެޑއިއުކޭޝަން މިނިސްޓްރީން ބުނެފައިވެއެވެ،  އަދި 2016 ވަނަ އަހަރު ނިމުނު އިރު 26387 ދަރިވަރުން ދިރިއުޅުމުގެ ހުނަރު ޕްރޮގްރާމްގައި ބައިވެރިވެފައިވެއިވާކަން މިނިސްޓްރީން ފާހަގަ ކުރެއެވެ،

ކާމިޔާބު ދިރިއުޅުމެއް ބައްޓަން ކުރުމަށް ބޭނުންވާ ހުނަރުތައް ސްކޫލް ނިމިގެން ދާއިރު ކޮންމެ ދަރިވަރެއްގެ ކިބާގައި އަށަގެންންނެވުމަށް ހިންގާ މި ޕްރޮގްރާމް ގްރޭޑް ހަޔަކުން ފެށިގެން ބާރައިގެން ދަރިވަރުންނަށް ތިން އުމުރު ފުރައަކަށް ބަހާލައިގެން ސްކޫލްތަކުގައި ކުރިއަށް ގެންދެ އެވެ. އެއީ ގްރޭޑް 6 އަދި 7 ގެ ދަރިވަރުންނާއި ގްރޭޑް 8 އަދި 9 ގެ ދަރިވަރުންނާއި ގްރޭޑް 11 އަދި 12 ގެ ދަރިވަރުންގެ އުމުރުފުރައެވެ. ދިރިއުޅުމުގެ ހުނަރުތައް ދަރިވަރުންނަށް ދަސްކޮސްދިނުމުގައި ހަރަކާތްތައް  ރޭވިފައި ހުންނާނީ ދަރިވަރުންގެ އުމުރުފުރައާ ގުޅޭ ގޮތުންނެވެ.