ހުޅުމާލޭ ހިޔާ ޓަވަރުގައި ރަހީނުކޮށްފައިވާ މީހަކު ފުލުހުން ސަލާމަތްކޮށްފި

12 މީހުންގެ ގޭންގަކުން ހުޅުމާލޭ ހިޔާ ޓަވަރުގައި ރަހީނު ކުރި މީހަކު ފުލުހުން ސަލާމަތްކޮށްފިއެވެ.

މައުލޫމާތު ލިބޭ ގޮތުގައި ރަހީނުކޮށްފައިވަނީ ފިރިހެނެކެވެ.

މައުލޫމާތު ލިބިފައިވާ ގޮތުގައި ރަހީނުކުރި މީހާހުރީ ހިޔާ ޓަވަރުތަކުގެ ތެރެއިން ނުވަވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމެންޓުގައެވެ.

ފުލުހުން ބުނީ މީހަކު ރަހީނުކޮށްފައި ހުރި ކަމުގެ މައުލޫމާތު ބުރާސްފަތި ދުވަހުގެ ރޭ 19:40 ހާއިރު ލިބުނު ކަމަށާއި، މައުލޫމާތު ލިބުމާއެކު އެމީހާ ހުރި ތަނެއް ދެނެގަތުމުގެ މަސައްކަތް ފަށާފައިވާކަމަށެވެ.

އެމީހާ ހުރީ ހިޔާ ޓަވަރުގެ 20 ވަނަ ފަންގިފިލާގައި ކަން އެނގުމުން ކޯޓު އަމުރެއްގެ ދަށުން އެ އެޕާޓްމަންޓްގެ ދޮރު ވައްޓާލައިގެން ފުލުހުން އެތަނަށް ވަނީ ވަދެފައެވެ.

ފުލުހުން މައުލޫމާތު ދޭ ގޮތުގައި ރަހީނު ކުރި މީހާ ސަލާމަތްކުރި އިރު އެމީހާގެ ބޯ ބާލާފައިވާ ކަމަށާއި އަދި ސީނަށް ފުލުހުން ދިޔައިރު އޭނާގެ އިނގިލިތައް ބުރިކޮށްލުމަށް 12 މީހުންގެ ގޭންގުން ދިޔައީ ތައްޔާރުވަމުން ކަމަށެވެ. މީގެއިތުރުން އެހެން ޖިސްމާނީ އަނިޔާއެއް ރަހީނުކޮށްފައި ހުރި މީހާއަށް ލިބިފައިވާ ކަން ފާހަގަނުވާ ކަމަށް ފުލުހުން ބުނެއެވެ.

މި މައްސަލައިގައި އަދި އިތުރު ބަޔަކު ބައިވެރިވެފައިވޭތޯ އާއި މައްސަލައިގެ ތަހުގީގު ކުރިއަށް ދާކަމަށް ފުލުހުން ބުނެފައިވެއެވެ.