ރާއްޖޭގައި ބާއްވާ އެންމެ ބޮޑު ތައުލީމީ ފެއާ ފަށައިފި
މި އެކްސްޕޯ ކުރިއަށްދާނީ މިމަހުގެ 19އާއި ހަމައަށް
އެޑިޔުކޭޝަން އެކްސްޕޯ ފަށައިފި
"މޯލްޑިވްސް އިންޓަނޭޝަނަލް އެޑިއުކޭޝަން އެންޑް ކެރިއާ އެކްސްޕޯ" ފަށައިފި އެވެ.
އަސަރީ ސާވިސަސް ޕްރައިވެޓް ލިމިޓެޑާއި ލަންކާގެ އެގްޒިބިޝަން އެންޑް ކޮންފަރެންސް ސާވިސް (ލެކްސް)އާ ގުޅިގެން ބާއްވަމުން އަންނަ އެ ފެއާ ކުރިއަށް ދާނީ ބުރާސްފަތި ދުވަހުން ފެށިގެން އަންނަ ހޮނިހިރު ދުވަހު ދަރުބާރުގޭގައި ކޮންމެ ދުވަހެއްގެ ހަވީރު 3:00 އިން ރޭގަނޑު 10:00 އަށެވެ.
މި އަހަރުގެ ފެއާގައި 60 އަށް ވުރެ ގިނަ އިންސްޓިޓިއުޓް ބައިވެރިވެފައިވެއެވެ.
އެގޮތުން އިންޑިއާ، ސްރީލަންކާ، ސިންގަޕޯރ، މެލޭޝިއާ އަދި ޔޫކޭ ފަދަ ގައުމުތަކުގެ ޔުނިވާސިޓީތަކުންނާއި ރާއްޖޭގެ ކޮލެޖްތަކުން ވަނީ ބައިވެރިވެފައެވެ.
މިއަހަރުގެ ފެއަރގައި ވަޒީފާތަކަށް ކުރިމަތިލާ މީހުންނާއި ވަޒީފާ އަދާކުރަމުންދާ މީހުންނަށް ވެސް ބައިވެރިވެވޭނެ ވޯކްޝޮޕްތަކެއް ކުރިއަށްގެންދާނެ ކަމަށާއި ކެރިއާއެއް ބިލްޑް ކުރަން ބޭނުންވާ ފަރާތްތަކަށް ފުރުޞަތުތަކެއް ވެސް ހުޅުވާލާފައިވާ ކަމަށް އަސަރީ ސަރވިސަސްއިން ބުންޏެވެ.
މިއަހަރުގެ ފެއާއަށް ޒިޔާރަތްކޮށް ރަޖިސްޓްރީ ކުރައްވާ ފަރާތްތަކުގެ މެދުގައި އަގުހުރި އިނާމުތަކެއް ލިބޭ ޕްރޮމޯޝަނެއް ކުރިއަށްދާއިރު މޯލްޑިވިއަން އިން ހުށަހަޅާފައި ވަނީ ޗެންނާއީ އަށް ދެ ބޭފުޅަކަށް ދެކޮޅު ޓިކެޓާއި އީ- ޓްރެވަލްސް އިން ހުށަހަޅާފައިވާ ރާއްޖޭގެ ކޮންމެ ވެސް އެއް މަންޒިލަކަށް ދެ ބޭފުޅަކަށް ދެކޮޅު ޓިކެޓްގެ އިތުރުން ޕާސަނަލް ކޮމްޕިއުޓާސް އިން ހުށަހަޅާފައިވާ ލެޕްޓޮޕަކާއި ދިރާގުގެ ގިފްޓު ހެންޕާސްތަކާއި ތަފާތު ގިނަ އިނާމްތަކެކެވެ.
