މަސްވެރިކަމުގެ ވައުދު ކުރީ ސަރުކާރުގެ ބޮލުގައި އަޅުއްވައިގެން ބަހަނާ ދައްކަވަން ނަހައްދަވާށެވެ. ވައުދު ފުއްދަވާށެވެ.

ވައުދު ވުމާއި ވައުދު ފުއްދުމުގައި ތަފާތު ސްޓައިލް ހުންނަ ވާހަކަ އަޑު އަހަމެވެ. ޚާއްސަކޮށް ވައުދުވެވޭ ކަމެއްގެ ގޮތުން ނުވަތަ ވައުދު ރައްދުވާ މީހެއްގެ ގޮތުން، ނުވަތަ ވައުދުވާ މީހެއްގެ ގޮތުން މިބުނާ ކަހަލަ ސްޓައިލް ފެނުން ބޮޑެވެ. ލޯބީގެ ކަމެއްގައި ވާ ވައުދާ ކެމްޕެއިނެއްގައި ވޯޓެއް ހޯދަން ވާ ވައުދާ ، ވައުދުވާ ގޮތުގައި ތަފާތެއް ނެތަސް ވައުދު ފުއްދުމުގައި ބޮޑެތި ތަފާތުތަކެއް ހުރެއެވެ.

އަންގާރަ ދުވަހު ރައީސް އޮފީހުގައި ފިޝަރީޒް މިނިސްޓަރު ބޭއްވި ނޫސްވެރިންގެ ބައްދަލުވުން އަޑު އަހާލުމުން މިކަން ވަރަށް ބޮޑަށް ޔަގީންވެއްޖެއެވެ. ނޫސްވެރިއާ ސުވާލުކުރީ 2023 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގައި ޕިއެންސީގެ ކެންޑިޑޭޓް ޑރ މުޙައްމަދު މުއިއްޒު މަސްވެރިންނަށް ވެވަޑައިގެންނެވި ވައުދަކާ ގުޅޭ ގޮތުންނެވެ. ފިޝަރީޒް މިނިސްޓަރު ޖަވާބު ދެއްވަން ފެއްޓެވީ ވަރަށް ދުރުންނެވެ. ސުވާލަކީ ރައީސް މުއިއްޒުގެ ވައުދުފުޅުގައި އޮތްގޮތަށް މަސްވެރިންނަށް ފައިސާ ނުދެނީ ކީއްވެތޯއެވެ. 48 ގަޑީއިރު ތެރޭގައި ކިރުވާ މަހަށް ފައިސާ ދެއްވާނެ ކަމަށް ވައުދުވެވަޑައިގެން ނޫންތޯއެވެ. ކިރުވައި މަހަށް އަގު ދެއްވާނީ ޑޮލަރުން ކަމަށް ވިދާޅުވި ނޫންތޯއެވެ. މަސްކިލޯއެއް މިފްކޯއަށް ގަންނަ އަގު 20ރ އަށްވުރެ ދަށްނުކުރައްވާނެ ކަމަށް ވިދާޅުވެ ވައުދުވެވަޑައިގެން ނޫންތޯއެވެ. ވެރިކަމެއް އަހަރެއް ވާއިރު، މި ވައުދު ނުފުއްދިގެން ތިއުޅުއްވަނީ ކީއްވެތޯއެވެ. ވައުދު ބަދަލު ކުރެއްވީތޯއެވެ.

ފިޝަރީޒް މިނިސްޓަރު ޝިޔާމް ޖަވާބުދެއްވަން ފެއްޓެވީ ކުރީގެ ސަރުކާރާ ހަމައިންނެވެ. ފައިސާ ޗާޕުކުރި ވާހާކަ އާއި ހިސާބުންނެވެ. މަސްވެރިކަމަށް ހުރި ގޮންޖެހުންތަކާ އުނދަގޫތަކާ ހިސާބުންނެވެ. މިހެން ގޮސް އެތައް ވާހަކަފުޅު ތަކެއް ދެއްކެވިއެވެ. ވިދާޅުވީ ވައުދުން ފިއްލަވަން ނޫޅުއްވާ ވާހަކަ އެވެ. ފުއްދަވާނެ ކަމަށެވެ. އެކަމަކު ފުއްދޭނެ ދުވަހެއް ސީދާ އެނގިވަޑައިނުގަންނަވާ ކަމަށެވެ. ވަރަށް އަވަސް ވާނެ ކަމަށެވެ. މިނިސްޓަރު ވިދާޅުވީ ވައުދު ފުއްދަން ކުރަން ވަރަށް ގިނަ ކަންކަން ހުރި ކަމަށެވެ. މަސްވެރިކަމުގެ ސިނާއާތު ވެސް ރަނގަޅު ކުރަންޖެހޭ ކަމަށެވެ. ގައުމުގެ އިގްތިސާދު ރަނގަޅު ކުރަންޖެހޭ ކަމަށެވެ. ސަބްސިޑީ ދީގެން ފޫނުބެއްދޭ ކަމަށެވެ. ކުރީ ސަރުކާރުތަކުން ވެފައި ހުރި ބައެއް ވައުދު ވެރިކަން ނިމުނުއިރުވެސް ނުފުއްދޭ ކަމަށެވެ.

ޕްރެސް ކޮންފަރެންސް އަޑު އަހަން އިނދެފާ އަޅުގަނޑު ހިތައް އެރިއެވެ. މީހާކު ހައިރާނެއް ނުވާނެ ހެއްޔެވެ. ނޫސްވެރިއަކު މިނިސްޓަރު އަރިހުގައި ކުރީ ފަސޭހަ އާދައިގެ ސުވާލެކެވެ. މިނިސްޓަރު ޖަވާބު ދެއްވަން ފައްޓަވައިގެން އުޅުއްވަނީ އަމީރު ހަމްޒާ ވާހަކައާއި ހިސާބުންނެވެ. ރައީސް މުއިއްޒު ވައުދުވެވަޑައިގެންނެވި އިރު މިހާ ދުރަކުން ނުފައްޓަވައެވެ. މިހާ ގިނަ ހާސަރުތަކެއް ނުދައްމަވައެވެ. 48ގަޑީއިރުގެ ތެރޭގައި ކިރާ މަހަށް ޑޮލަރުން ފައިސާ ދެއްވާނެ ކަމަށް ވިދާޅުވީ ފަސޭހަކަމާއެކު އެއްފަހަރުންނެވެ. 20ރ އަށްވުރެ މަސްކިލޯއެއްގެ އަގު ދަށް ނުކުރައްވާނެ ކަމަށް ވައުދުވެވަޑައިގަތީ އަރުތެރެއިން ފެން ފޮދެއްދާހާ ލުއިކޮށް ފަސޭހަކޮށްނެވެ.

ވައުދުފުޅުގައި ޖެހި ރައީސް މުއިއްޒަށް މަސްވެރިން ވޯޓު ދިނެވެ. ރައީސް ސާލިޙްގެ ސަރުކާރުން ގިނަވެގެން ހަފްތާއެއްގެ ތެރޭގައި ދެމުން އައި ފައިސާ 48ގަޑީއިރުގެ ތެރޭގައި ލިބޭތީއެވެ. ރައީސް ސާލިޙްގެ ވެރިކަމުގައި ރުފިޔާއިން ލިބެމުން އައި ފައިސާ ޑޮލަރުން ލިބޭނެތީއެވެ. އެކަމަކު ރައީސް މުއިއްޒުގެ ވެރިކަމަށް އަހަރުވީއިރު ވެސް ވައުދު ނުފުދުނުތާނގާއި ފުދޭނެ ދުވަހެއް ވިދާޅުވާކަށް މަސްވެރިކަމާބެހޭ ވަޒީރަށް ވެސް އެނގިވަޑައިނުގެންނެވި އެވެ. ފަސޭހައިން ވެވަޑައިގެންނެވި ވައުދު ނުފުދެނީ ކީއްވެތޯ ކުރި ސުވާލުގެ ޖަވާބު ފަސޭހައިން ދެއްވާކަށް ވެސް އެނގިވަޑައިނުގެންނެވި އެވެ. ގަބޫލުފުޅު ކުރައްވާށެވެ. މަސްވެރިން ބޭނުންވަނީ ރައީސް މުއިއްޒު ވެވަޑައިގެންނެވި ވައުދަށް ފިއްލަވާނެތޯ ނުވަތަ ނޫންތޯ ބަލާކަށް ނޫނެވެ. ދައުރުގެ ކޮންމެވެސް ހިސާބެއްގައި ފުދޭނެތޯ ނުވަތަ ނޫންތޯ ބަލާކަށެއްވެސް ނޫނެވެ. މަސްވެރިން ބޭނުންވަނީ ރައީސް މަސްވެރިންނަށް ވެވަޑައިގެންނެވި ވައުދު ފުދޭށެވެ. 48ގަޑީއިރުގެ ތެރޭގައި ފައިސާ ލިބޭށެވެ. އެވެސް ޑޮލަރުންނެވެ. ވީއިރު ރެކިވަޑައިގަންނަވަން ނޫޅުއްވާށެވެ. އެހެން ސަރުކާރެއްގެ ބޮލުގައި އަޅުއްވައިގެން ބަހަނާ ދައްކަވަން ނަހައްދަވާށެވެ. ވައުދު ފުއްދަވާށެވެ.