އިލެކްޝަންސް ކޮމިޝަނުގެ މެންބަރު ކަމަށް ޢަބްދުލްޙަޞީބު އައްޔަންކުރުމަށް ފާސްކޮށްފި
އިލެކްޝަންސް ކޮމިޝަނަށް މެންބަރަކު ހޮވަން ޖެހުނީ އެ ކޮމިޝަނުގެ ރައީސް ފުވާދު ތައުފީގުގެ މެންބަރުކަމުގެ މުއްދަތު މި މަހުގެ 23 ވަނަ ދުވަހަށް ހަމަވާތީ
އީސީއަށް އައްޔަން ކުރުމަށް އަބްދުލް ހަސީބު އިސްމާއިލްގެ ނަން މަޖިލީހުން ވަނީ ފާސްކޮށްފައި
އިލެކްޝަންސް ކޮމިޝަނުގެ މެންބަރުކަމަށް ޢަބްދުލް ޙަޞީބު އިސްމާޢީލް އައްޔަންކުރުމަށް ރައްޔިތުންގެ މަޖިލީހުން އަންގާރަ ދުވަހު ފާސްކޮށްފިއެވެ.
އެ ކޮމިޝަނުގެ އެސިސްޓެންޓް ޑިރެކްޓަރުގެ މަޤާމުގައި ހުންނެވި ޢަބްދުލް ޙަޞީބު އިސްމާޢީލްގެ ނަން މަޖިލީހަށް ފޮނުއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ މަހުގެ 14 ވަނަ ދުވަހުއެވެ.
އިލެކްޝަންސް ކޮމިޝަނަށް މެންބަރަކު ހޮވަން ޖެހުނީ އެ ކޮމިޝަނުގެ ރައީސް ފުވާދު ތައުފީގުގެ މެންބަރުކަމުގެ މުއްދަތު މި މަހުގެ 23 ވަނަ ދުވަހަށް ހަމަވާތީއެވެ. ޢަބްދުލް ޙަޞީބު އައްޔަންކުރުމަށް މިނިވަން މުއައްސަސާތަކުގެ ކޮމިޓީން ނިންމައި، އެ ރިޕޯޓު މަޖިލީހަށް ހުށަހެޅުމަށްފަހު، މަޖިލީހުން އޭނާގެ ނަން ފާސްވީ ވޯޓުގައި ބައިވެރިވެވަޑައިގެންނެވި 67 މެންބަރުންގެ އިއްތިފާޤުންނެވެ.
ޢަބްދުލް ޙަޞީބު އިސްމާޢީލް ވަނީ މީގެ ކުރިން މާލީ ވުޒާރާ އަދި އިސްލާމީ ކަންތައްތަކާބެހޭ ވުޒާރާގައި މަސައްކަތް ކުރައްވާފައެވެ. އޭނާ އިލެކްޝަންސް ކޮމިޝަނާ ގުޅިވަޑައިގަތީ 2 ޖެނުއަރީ 2022 ގައެވެ.
