ޣައްޒާގެ ކަމާލު އަދުވާން ހޮސްޕިޓަލަށް ޖެހިޖެހިގެން ދެވަނަ ފަހަރަށް ބޮން އަޅައިފި

އިޒްރޭލުގެ ބާރުތަކުން ޣައްޒާގެ އުތުރުގައި ހުންނަ ކަމާލް އަދްވާން ހޮސްޕިޓަލަށް ޖެހިޖެހިގެން ދެވަނަ ފަހަރަށް ބޮން އަޅާ ހަމަލާދީފިއެވެ.

މި ހަމަލާގެ ސަބަބުން، މެޑިކަލް މުވައްޒަފުންނާއި ބަލިމީހުންނަށް ޒަޚަމްތައް ލިބިފައިވާ ކަމަށް ހޮސްޕިޓަލުގެ އޮފިޝަލުން ހާމަކޮށްފައިވެއެވެ.

ޒަޚަމްވި ފަރާތްތަކުގެ ތެރޭގައި އަލަށް އުފަންވެފައިވާ ނާސަރީގައި ތިބި ތުއްތު ކުދިންވެސް ހިމެނޭ ކަމަށް ހޮސްޕިޓަލުން ބުނެއެވެ.

އަނެއްކޮޅުން އިޒްރޭލުން ސީރިއާގެ ވެރިރަށް ދިމިޝްޤަށް ހަމަލާދީފައިވާ ކަމަށާއި، މިއީ އެ ޤައުމުގައި ހުރި ހިޒްބުﷲގެ "އިންޓެލިޖެންސް މައި އޮފީސް" އަށް އަމާޒުކޮށްގެން ދިން ހަމަލާއެއް ކަމަށް އިޒްރޭލުން ބުނާއިރު، ސީރިއާގެ މީޑިއާއިން ބުނެފައިވަނީ ހަމަލާ އަމާޒުކުރެވިފައިވަނީ "މަދަނީ ސަރަޙައްދުތަކަށް" ކަމަށެވެ.

އިޒްރޭލުން ޣައްޒާގައި ހިންގަމުންދާ ނަސްލު ފޮހެލުމުގެ ހަނގުރާމާގައި 7 އޮކްޓޯބަރު 2023ން ފެށިގެން މަދުވެގެން 43،374 ފަލަސްތީނު ރައްޔިތުން މަރުވެފައިވާ ކަމަށާއި 102،261 މީހުންނަށް އަނިޔާވެފައިވާ ކަމަށް ރަސްމީ ރިޕޯޓުތައް ބުނެއެވެ.

ޣައްޒާ ގައި ހަނގުރާމަ ފެށުނު ފަހުން އިޒްރޭލުން ލުބުނާނަށް ދިން ހަމަލާތަކުގައި 3002 މީހުން މަރުވެ، 13،492 މީހުން ޒަޚަމްވެފައިވެއެވެ.