ޣައްޒާގައި އަންރުވާ މަނާ ކުރިއަސް އިޒްރޭލަކަށް އިތުރު ރައްކާތެރިކަމެއް ނުލިބޭނެ: ޑަބްލިއުއެޗްއޯ
5 ނޮވެމްބަރު 2024 | އަންގާރަ 06:10އަންރުވާ އާ ގުޅުން ކަނޑާލުމަށް އިޒްރޭލުން ނިންމި ނިންމުމާ ގުޅިގެން، އިޒްރޭލުގެ އަނިޔާވެރިކަމަށް އެންމެ ބޮޑަށް އެހީތެރިވާ އެމެރިކާ ހިމެނޭގޮތަށް ދުނިޔޭގެ އެކި ޤައުމުތަކުން ވަނީ މިކަން ކުށްވެރިކޮށްފައެވެ.
ޑަބްލިއުއެޗްއޯ ގެ ޗީފް ޓެޑްރޯސް އަދަނޯމް ގެބްރިއާސަސް
ހާލުގައި ޖެހިފައިވާ ފަލަސްތީނު ރެފިއުޖީންނަށް އެހީވުމަށް އދ. އިން އުފައްދާފައިވާ ޖަމިއްޔާ، ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ (އަންރުވާ) އާ ގުޅުން ކަނޑާލުމަކުން އިޒްރޭލަށް އިތުރު ރައްކާތެރިކަމެއް ނުލިބޭނެކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ޗީފް ޓެޑްރޯސް އަދަނޯމް ގެބްރިއާސަސް ވިދާޅުވެއްޖެއެވެ.
ހޯމަދުވަހު އެކްސްގައި ކުރެއްވި ޕޯސްޓެއްގައި އޭނާ ވިދާޅުވީ، އަންރުވާގެ ބަދަލުގައި ފަލަސްތީނަށް އެހެން އެއްވެސް ގޮތެއް ނެތްކަމަށް ސާފުކޮށް ހާމަކުރައްވާ ކަމަށާއި، އަންރުވާ މަނާކުރުމަކުން އިޒްރޭލަށް އިތުރު ރައްކައުތެރިކަމެއް ނުލިބޭނެ ކަމަށެވެ. އޭނާ އިތުރަށް ވިދާޅުވީ، މިކަމުން ވާނެ ހަމައެކަނި ކަމަކީ ޣައްޒާގެ ރައްޔިތުންގެ ދަތިތައް އިތުރުވެ، ބަލިމަޑުކަން ފެތުރުމުގެ ނުރައްކާ އިތުރުވުން ކަމަށެވެ.
ޓެޑްރޯސް މިފަދައިން ވިދާޅުވެފައި މިވަނީ އަންރުވާއާ ގުޅުން ކަނޑާލުމަށް އިޒްރޭލުގެ ގާނޫނު ހަދާ މަޖިލީހުން އަންރުވާގެ މަސައްކަތްތަކަށް ހުރަސް އެޅުމަށް ފާއިތުވި ހަފްތާގައި ސުވާލު އުފެދޭ ދެ ބިލެއް ފާސްކޮށް، އެކަން އދ. އަށް ރަސްމީކޮށް އަންގާފައިވާކަމަށް ހޯމަދުވަހު އިޒްރޭލުގެ ފޮރިން މިނިސްޓްރީން ހާމަކޮށްފައިވަނިކޮށެވެ.
އަންރުވާއާ އޮންނަ ގުޅުން ކަނޑާލުމަށް އިޒްރޭލުން ނިންމި ނިންމުމާ ގުޅިގެން، އިޒްރޭލުގެ އަނިޔާވެރިކަމަށް އެންމެ ބޮޑަށް އެހީތެރިވާ އެމެރިކާ ހިމެނޭގޮތަށް ދުނިޔޭގެ އެކި ޤައުމުތަކުން ވަނީ މިކަން ކުށްވެރިކޮށްފައެވެ.
ޖަނަވަރީ މަހުގެ ފަހުކޮޅުގައި މިނިންމުން ތަންފީޒުކުރެވޭނެ ކަމަށް ލަފާކުރެވޭއިރު، މި ޤާނޫނު ތަންފީޒުކޮށްފިނަމަ، ޣައްޒާގައި ހިންގޭ ބައިނަލްއަޤްވާމީ އިންސާނީ އެހީގެ މަސައްކަތްތައް ހުއްޓިގެން ހިނގައިދާނެކަމަށް އދގެ ސަލާމަތީ މަޖިލީހުންވެސް ވަނީ އިންޒާރުދީފައެވެ.
