އީރާނުން އިޒްރޭލަށް ހަމަލާދޭނެ ކަމީ ޔަގީން ކަމެއް: އައިއާރުޖީސީ ޑެޕިއުޓީ ކޮމާންޑަރު

އީރާނުން އިޒްރޭލަށް ހަމަލާ "ޔަގީނުންވެސް ދޭނެ" ކަމަށް އިރާނުގެ އިސްލާމިކް ރެވޮލިއުޝަން ގާޑްސް ކޯޕްސް (އައިއާރްޖީސީ) ގެ އިސް ކޮމާންޑަރަކު ވިދާޅުވެއްޖެއެވެ.

އައިއާރްޖީސީގެ ޑެޕިއުޓީ ކޮމާންޑަރ ބްރިގޭޑިއަރ ޖެނެރަލް ޢަލީ ފަދަވީ މި ވާހަކަ ދައްކަވާފައިވަނީ އީރާނުގައި ފާހަގަ ކުރާ "ނޭޝަނަލް ޑޭ އޮފް ދަ ފައިޓް އެގެއިންސްޓް ގްލޯބަލް އެރޮގަންސް" ނުވަތަ "ދަރިވަރުންގެ ގައުމީ ދުވަސް" ފާހަގަ ކުރުމަށް ތެހެރާނުގައި ހުންނަ ޝަރީފް ޔުނިވަރސިޓީ އޮފް ޓެކްނޮލޮޖީގައި ބޭއްވުނު ޙަފްލާއެއްގައެވެ. މި ދުވަހަކީ 1979 ވަނަ އަހަރު އީރާނުގެ ޔުނިވަރސިޓީ ދަރިވަރުން އެމެރިކާގެ އެމްބަސީ ހިފި ދުވަހެވެ.

"ތަފްސީލު ދެވޭކަށް ނެތް، އެކަމަކު ޔަޤީނުންވެސް ހަމަލާދޭނެ،" އީރާނުން އިޒްރޭލަށް ދީފާނެ ހަމަލާއަކާ ގުޅޭ ގޮތުން ފަދަވީ ވިދާޅުވިއެވެ. އިރާނުގެ މީޑިއާ ރިޕޯޓެއް ބުނާ ގޮތުގައި މި ހަމަލާ އީރާނުން ދޭނެ ކަމަށް ބެލެވެނީ "އޮޕަރޭޝަން ޓްރޫ ޕްރޮމިސް 3" ގެ ނަމުގައެވެ.

އޭނާ އިތުރަށް ވިދާޅުވީ، 45 އަހަރަށްވުރެ ގިނަ ދުވަހު އީރާނުން ވަނީ އަނިޔާ ލިބޭ މީހުން ދިފާޢުކޮށް، އަނިޔާވެރިންނާ ދެކޮޅަށް ހަނގުރާމަކޮށްފައި ކަމަށާއި، އެކަން އެ ގޮތުގައި އީރާނުން ކުރިއަށް ގެންދާނެ ކަމަށެވެ.

އޭނާ އިތުރަށް ވިދާޅުވީ އީރާނު އަބަދުވެސް އޮންނާނީ ތާރީޚުގެ ރަނގަޅު ފަޅީގައި ކަމަށެވެ.

އައިއާރްޖީސީގެ އިސް ކޮމާންޑަރު އިތުރަށް ވިދާޅުވީ، ޣައްޒާގެ ހަނގުރާމައިން ފެނިގެން ދިޔަ އެންމެ މުހިންމު އެއް ކަމަކީ 76 އަހަރު ވަންދެން ފަލަސްތީނު މައްސަލައިގެ ހަގީގަތް އޮޅުވާލާފައިވާކަން ދުނިޔޭގެ ގިނަ ބަޔަކަށް އެނގުނު ކަމެވެ. އޭގެ ނަތީޖާއެއްގެ ގޮތުން، ދުނިޔޭގެ 91 އިން ސައްތަ ޤައުމުތަކުގެ މަގުތަކުގައި މުޒާހަރާތައް ބޭއްވިފައިވާ ކަމަށް އޭނާ ފާހަގަކުރެއްވިއެވެ.

"ދުނިޔެއަށް އެނގިގެން ދިޔައީ ސަހްޔޫނީ ވެރިކަމަކީ، ފަލަސްޠީނުގެ ބިންތަކަށް ގަދަކަމުން އަރާ، ހިސޯރުކޮށް، މީހުން އެމީހުންގެ ގެދޮރުން ނެރެ، ކުށެއް ނެތް މީހުންނާއި، އަންހެނުންނާއި ކުޑަކުދިން މަރާ ވެރިކަމެއްކަން،" އޭނާ ވިދާޅުވިއެވެ.

ފަދަވީގެ މި ބަސްފުޅުތައް އައިސްފައިވަނީ، އިސްލާމީ އިންޤިލާބުގެ ލީޑަރު އާޔަތުއްﷲ ސައްޔިދު ޢަލީ ޚާމަނާއީ އެމެރިކާ  އަށާއި އިޒްރޭލަށް ވަރުގަދަ އިންޒާރެއް ދެއްވާފައިވަނިކޮށްނެވެ. ޚާމަނާއީ ވިދާޅުވީ، ދަތްތައް ފުނޑޭވަރުގެ ހަމަލާއެއް އިޒްރޭލަށް އީރާރުން ދޭނެ ކަމުގައެވެ.

އީރާނުން އޮކްޓޯބަރު 1 ވަނަ ދުވަހު "އޮޕަރޭޝަން ޓްރޫ ޕްރޮމިސް 2" ގެ ނަމުގައި އިޒްރޭލް ކިޔާ ދައުލަތުގެ އަސްކަރީ އަދި ޖާސޫސީ އަދި އިންޓެލިޖެންސް މަރުކަޒުތަކަށް އަމާޒުކޮށް ގާތްގަނޑަކަށް 200 މިސައިލް ހަމަލާ ވަނީ ދީފައެވެ.

މި އޮޕަރޭޝަން އީރާނުން ހިންގީ ފަލަސްތީނާއި ލުބުނާނުގެ ޖިހާދީ ހަރަކާތްތަކުގެ އިސް ލީޑަރުންނާއި އައި.އާރް.ޖީ.ސީގެ އިސް ކޮމާންޑަރެއް އިޒްރޭލުން މަރާލުމުން އެކަމަށް ރައްދު ދިނުމުގެ ގޮތުން ކަމަށް އިރާނުން ބުނެއެވެ.

އަނެއްކޮޅުން އޮކްޓޯބަރު 26 ވަނަ ދުވަހުގެ ފަތިހު އިޒްރޭލުން އީރާނުގެ އިލާމް، ޚުޒެސްތާނާއި އަދި ތެހެރާންގެ ބައެއް އަސްކަރީ މަރުކަޒުތަކަށް ވަނީ ހަމަލާ ދީފައެވެ.

އީރާނުން ބުނެފައިވަނީ އެ ގައުމަށް އިޒްރޭލުން ދިން އަނިޔާވެރި ހަމަލާއަށް ޖަވާބުދޭނެ ކަމަށާއި އެ ގައުމުގެ ހައްގުތައް ދޫކޮށްނުލާނެ ކަމަށެވެ.