އުތުރު ކޮރެއާ އިން ނިއުކްލިއަރ ހަތިޔާރު ބޭނުން ކުރުން ހުއްޓާލައިފިިނަމަ އެގައުމަށް ދެވަނައެއް ނެތް ފަދަ ސަލާމަތާއި ރައްކާތެރިކަމުގެ ޔަގީންކަން ދެން: އެމެރިކާ

އުތުރު ކޮރެއާ އިން ނިއުކްލިއަރ ހަތިޔާރު ބޭނުން ކުރުން ހުއްޓާލައިފިިނަމަ "އެގައުމަށް ދެވަނައެއް ނެތް ފަދަ" ސަލާމަތާއި ރައްކާތެރިކަމުގެ ޔަގީންކަން އެމެރިކާ އިން ދޭނެ ކަމަށް އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވެއްޖެއެވެ.

އުތުރު ކޮރެއާގެ ލީޑަރު ކިމް ޖޮން އުން އާއި އެމެރިކާގެ ރައީސް ޑޮނަލްޑް ޓްރަމްޕްގެ ބައްދަަލުވުން ސިންގަޕޫރުގައި އަންގާރަ ދުވަހު ބާއްވާއިރު، ދެގައުމުގެ ވެރިންގެ ބައްދަލުވުމުގެ ކުރިން ދެގައުމުގެ އޮފިޝަލުންގެ މެދުގައި ބާއްވާ ބައްދަލުވުންތައްވެސް ދަނީ އަވަސް ގޮތެއްގައި ވަރަށް ފުރިހަމައަށް ކަމަށް މައިކް ޕޮމްޕެއޯ އާ ހަވާލާދީ ރިޕޯޓުތައް ބުނެއެވެ. ޕޮމްޕެއޯ އާ ހަވާލާދީ ރިޕޯޓުތައް ބުނާގޮތުން އެމެރިކާ އިން ބޭނުން ވަނީ، އުތުރު ކޮރެއާ އިން ނިއުކްލިއަރ ޕްރޮގްރާމް އެއްކޮށް ހުއްޓާލުމަަށެވެ.

މުޅި ދުނިޔެ އިންތިޒާރުކުރަމުން އަންނަ އުތުރު ކޮރެއާގެ ރައީސް ކިމް ޖޮން އުންއާއި އެމެރިކާގެ ރައީސް ޑޮނަލްޑް ޓްރަމްޕްގެ ތާރީޚީ ބައްދަލުވުމަށް 20 މިލިއަން ޑޮލަރު ޚަރަދުވާކަމަށް ސިންގަޕޫރުގެ ބޮޑުވަޒީރު ވަނީ ވިދާޅުވެފައެވެ. ބައްދަލުވުން ކަވަރުކުރުމަށް އެކަނިވެސް 2500އެއްހާ ނޫސްވެރިން ސިންގަޕޫރަށް ޖަމާވެފައިވެެއެވެ. އަންގާރަ ދުވަހު ބައްދަލުވުން ފަށާނީ ސިންގަޕޫރު ގަޑިން ހެނދުނު 9:00 ގައެވެ. އެއީ ރާއްޖެ ގަޑިން ހެނދުނު 6:00 އެވެ.

ބައިނަލްއަގްވާމީ ދުނިޔެ އިން އުތުރު ކޮރެއާއަށް ތަކުރާރުކޮށް ގޮވާލަމުން ދަނީ އެގައުމުގެ ނިއުކްލިއަރ ޕްރޮގްރާމް ހުއްޓާލުމަށާއި މިސައިލްތައް ޓެސްޓުކުރުން ހުއްޓާލުމަށެވެ. ދުނިޔޭގެ ގޮވާލުންތަކަށް އުތުރު ކޮރެއާ އިން އިޖާބަ ނުދޭތީ އުތުރު ކޮރެއާ އާއި ދެކޮޅަށް ދަތިކުރުމުގެ ފިޔަވަޅު ވެސް ބައިނަލްއަޤުވާމީ މުޖުތަމައު އިން ވަނީ އަޅާފައެވެ. އުތުރު ކޮރެއާގެ ލީޑަރާއި އެމެރިކާގެ ރައީސްގެ ބައްދަލުވުމަށް ހަގީގީ ސިފަ އައިސް އެ ބައްދަލުވުން، ހަގީގަތަކަށް ހެދުމަށްޓަކައި ޑިޕްލޮމަސީ ކުރިއަށް ނެރެ އެމެރިކާ އާއި އުތުރު ކޮރެއާގެ އޮފިޝަލުން ގެންދަވަނީ ކެނޑިނޭޅި މަސައްކަތް ކުރައްވަމުންނެވެ.