އުތުރު ކޮރެއާގެ ފާޑުކިޔުން މިފަހަރު އިޒްރޭލަށް!
އިޒްރޭލުން އުޅެނީ ޖަރީމާތައް ފޮރުވަން
އުތުރު ކޮރެއާގެ އަސްކަރީ ބާރު ދައްކާލަން ބޭއްވި ހެވިކަމުގެ ހިނގާލުމެއްގެ ތެރެއިން
އެމެރިކާއާ ހުޅަނގުގެ ޤައުމުތައް ސިލްސިލާ އިންޒާރުތަކެއް ދެމުން އަންނަ އުތުރު ކޮރެއާ އިން އިޒްރޭލަށް ވަރަށް ވަރުގަދައަށް ފާޑު ކިޔައިފިއެވެ.
އުތުރު ކޮރެއާގެ ފާޑުކިޔުން އިޒްރޭލަށް އަމާޒުމިވީ އުތުރުކޮރެއާގެ ލީޑަރު ކިމް ޖޮން އުން އަކީ "މޮޔަ އެއް" ގެ ގޮތުގައި އިޒްރޭލުން ސިފަކުރުމުންނެވެ.
އިޒްރޭލަށް ރައްދު ދިނުމުގެ ގޮތުން އުތުރު ކޮރެއާއިން ބުނީ މެދުއިރުމަތީގައި ގަވައިދާ ހިލާފަށް ނިއުކްލިއަ ހަތިޔާރު އުފައްދާ ހަމަ އެކަނި ގައުމަކީ އިޒްރޭލުކަމަށެވެ.
އުތުރުކޮރެއާގެ ޚާރިޖީ ވުޒާރާގެ ތަރުޖަމާނާއި ޙަވާލާދީ އެގައުމުގެ ސަރުކާރުގެ ނިއުސް އެޖެންސީ ބުނެފައިވަނީ އުތުރުކޮރެއާގެ ނިއުކްލިއަ މަޝްރޫއާ ދެކޮޅަށް އިޒްރޭލުން އަޑު އުފުލަންޖެހޭ ސަބަބެއް ނެތް ކަމަށެވެ.
މެދުއިރުމަތީގައިވާ ނުއުކްލިއަ ހަތިޔާރު އުފައްދާ ހަމަ އެކަނި ގައުމަކީ އިޒްރޭލު ކަމަށާއި އެކަންކުރަނީ އެމެރިކާގެ މަދަދާއި އެކުގައި ކަމަށް ޚާރިޖީ ވުޒާރާގެ ތަރުޖަމާނާއި ޙަވާލާދީ ކޭސީއެންއޭ އިން ބުނެފައިވެއެވެ.
އުތުރު ކޮރެއާ އިން މިފަހަރު އިޒްރޭލާއި ޖެހިގަތްއިރު، ދެކުނު ކޮރެއާ އާ އެމެރިކާގެ އިތުރުން އޮސްޓްރެލިއާއަށް ވެސް އުތުރު ކޮރެއާ އިން ވަނީ ބަހުގެ ހޫނު ހަމަލާތަކެއް ދީފައެވެ.
މިހުރިހާ ގައުމުތަކެއްގެ ތެރެއިންވެސް އުތުރު ކޮރެއާ އާ އެންމެ ބޮޑަށް މައްސަލަ ޖެހިފައިވަނީ އެމެރިކާއާއެވެ. ދެގައުމުގެ މެދުގައި ހުރިހާކަމެއް ހޫނުވީ އުތުރު ކޮރެއާއިން ބެލިސްޓިކް މިސައިލްތައް ޓެސްޓް ކުރުން އިތުރު ކުރުމުންނެވެ.
އުތުރުކޮރެއާގެ ލީޑަރު ކިމް ޖޮން އުން އަކީ "މޮޔަ އެއް" ގެ ގޮތުގައި އިޒްރޭލުން ސިފަކުރުމުން އުތުރު ކޮރެއާ އިން ބުނެފައިވަނީ އެއީ "ދަހިވެތި ނުލަފާ ވާހަކައެއް" ކަމަށެވެ.
އިޒްރޭލުގެ ފޮރިން މިނިސްޓަރު އަވިގްޑޯރް ލީބަމަން ވިދާޅުވެފައި ވަނީ ކިމް ޖޮން އުން އަކީ ދުނިޔޭގެ ހަމަޖެހުން ނަގައިލަމުންދާ ހައްދުފަހަނައަޅާފައިވާ މޮޔަ ގްރޫޕެއްގެ ވެރިޔަކަށް ހުރި މޮޔަމީހެއް" ކަމަށެވެ.
އިޒްރޭލުގައި ނިއުކްލިއަ ހަތިޔާރު އުފައްދަމުންދާ ކަމަށް އުތުރު ކޮރެއާ އިން ތުހުމަތު ކުރިނަމަވެސް އިޒްރޭލުން މީގެ ކުރިންވެސް އަދި މިހާތަނަށް އެއްވެސް މިހައިތަނަށް ބުނެފައެއް ނުވެއެވެ.
އިޒްރޭލުން އެކަމަށް އެއްޗެއް ބުނެފައި ނެތަސް އެގައުމުގައި ނިއުކްލިއަ ވޯހެޑް ހުންނާނެ ކަމަށް ދުނިޔޭގެ ބޮޑެތި ބާރުތަކުން ގަބޫލުކުރެއެވެ.
އިޒްރޭލަކީ އިންސާނިއްޔަތާ ހިލާފު ޖަރީމާތައް ހިންގާ ގައުމެއް ކަމަށް ސިފަކޮށް އިޒްރޭލުން ބުނެފައިވަނީ އިޒްރޭލުން އެފަދަ ވާހަކަ ދައްކަނީ ފަލަސްތީނު މީހުންނާ ދެކޮޅަށް ހިންގާ ޖަރީމާތައް ފޮރުވަން ވެގެން ކަމަށެވެ.
