ސްކީލާން ހޯދަން ދޮރުން ދޮރަށް ހިނގިން، އޭނާ އާއި ދިމާވީ ފުރަން ދާން ގަޑި އިރަކަށް ވެފައި ވަނިކޮށް - އާއިދު
އެ ރިޕޯޓް ހެދުމަށްޓަކާ ލަންކާ އަށް ދިޔަ އިރު ރިޔާސީ އިންތިޚާބުގެ ދެވަނަ ބުރާއި ދެމެދުގައި އޮތީ އެންމެ 2 ހަފްތާއެއްހާ ދުވަސް
ތަހުގީގީ ނޫސްވެރިކަމުގެ އެވޯޑް ލިބުނު އަހުމަދު އާއިދު ފަށާއިރު ޕްރޮގްރާމްގައި ވާހަކަދައްކަނީ
"ސްކީލާން" ހޯދަން ދޮރުން ދޮރަށް ހިނގާފައިވާނެ ކަމަށާއި އޭނާ އާއި ދިމާވީ އަނބުރާ ރާއްޖެ އަށް ފުރަން ގަޑި އިރަކަށް ވެފައި ވަނިކޮށް ކަމަށް ތަހުގީގީ ނޫސްވެރިކަމުގެ އެވޯޑް ލިބުނު އަހުމަދު އާއިދު ބުނެފިއެވެ.
މޯލްޑިވްސް މީޑިއާ ކައުންސިލް (އެމްއެމްސީ) އިން ބޭއްވި 2023 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ހަފްލާގައި ތަހުގީގީ ދާއިރާއިން "އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް އެވޯޑު ލިބިފައިވާއިރު މި ޑޮކިއުމެންޓަރީ އަކީ ރައީސް ޑރ. މުހައްމަދު މުއިއްޒުގެ ދޮން މަންމަ، ސްރީލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒު މައްޗަށް ކުރާ ތުހުމަތުތަކުގެ މައްޗަށް ބިނާކޮށް ހަދާފައިވާ ތަހުގީގީ އުފެއްދުމެކެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަމުން އާއިދު ބުނީ މި ރިޕޯޓް ހެދުމަށް ވަރަށް މަސައްކަތް ކޮށްފައިވާނެ ކަމަށެވެ. އެ ރިޕޯޓް ހެދުމަށްޓަކާ ލަންކާ އަށް ދިޔަ އިރު ރިޔާސީ އިންތިޚާބުގެ ދެވަނަ ބުރާއި ދެމެދުގައި އޮތީ އެންމެ 2 ހަފްތާއެއްހާ ދުވަސް ކަމަށް އާއިދު ފާހަގަކުރިއެވެ. އޭނާ ބުނީ އޭރު އަތުގައި އޮތީ އެޑްރެސް އެއް އެކަނި ކަމަށާއި މުއިއްޒުގެ ދޮންމަންމަ ދިރިހުރިކަން ނުވަތަ ނޫންކަން ވެސް ނޭނގޭ ކަމަށް އޭނާ ބުންޏެވެ. އެ ގެ ހޯދުމަށް ބޮޑު އަވަށެއްގައި ދޮރުން ދޮރަށް ހިގަން ޖެހުނު ކަމަށް އޭނާ ބުންޏެވެ. ކަންދިމާކުރި ގޮތުން މުއިއްޒުގެ ދޮންމަމަގެ އަތުގައި މައްސަލަ އާއި ގުޅުން ހުރި ލިޔެކިޔުންތައް ރައްކާކޮށްފައި ހުރިކަމަށް އާއިދު ވަނީ ފާހަގަކޮށްފައެވެ. ސްކީލާން އަކީ މެލޭޝިއާ ދަރިކޮޅުގެ މުސްލިމަކަށް ވުމާއި އެކު އެ ކޮމިއުނިޓީގެ ލީޑަރަކާއި ވާހަކަދައްކައިގެން މިސްކިތަށް ގޮސްގެން އޭނާ ހޯދުމަށް މަސައްކަތްކޮށްފައިވާނެ ކަމަށް އާއިދު ބުންޏެވެ. އެކަން އެގޮތަށް ކޮށްފައި ވަނީ އެ ނަސްލުގެ މީހުންނަކީ މިސްކިތާއި ދޯޅުބަޔަކަށް ވުމުން އެގޮތަށް ވެސް އޭނާ ފެނިދާނެ ކަމުގެ އުންމީދުގައި ކަމަށް އާއިދު ވަނީ ފާހަގަކޮށްފައެވެ.
ސްކީލާން އާއި ދިމާވުމުން އޭނާ އަކީ ނޫސްވެރި އެއް ކަަމަށް ބުނެ، އެކަމާއި ގުޅޭ މައުލޫމާތު ދިނުމަށް އެދިފައިވާނެ ކަމަށް އާއިދު ބުންޏެވެ. އަދި އަބަދުވެސް ކޮންމެވެސް މީހަކު އެ ސުވާލުތައް ކުރާނެ ކަމުގެ އުންމީދުގައި ހުރިކަމަށް ސްކީލާން ފާހަގަކޮށްފައިވާ ކަަމަށް އާއިދު ބުންޏެވެ. ހުރިހާ ޑޮކިއުމެންޓްތައް ބަހައްޓާފައި ހުރުމުން ވަރަށް ހައިރާންވެސްވި ކަމަށް އާއިދު ވަނީ ފާހަގަކޮށްފައެވެ. އަދި އެކަމުގެ ސަބަބުން ސްކީލާން ވަރަށް ބޮޑަށް ޖަޒުބާތުގައި ޖެހުނު ކަމަށާއި، ވަރަށް ގިނަ ވާހަކަތައް ހިއްސާކުރި ކަމަށް އާއިދުވަނީ ފަށާއިރު ޕްރޮގްރާމްއަށް ދިން އިންޓަރވިއުގައި ފާހަގަކޮށްފައެވެ.
މޯލްޑިވްސް މީޑިއާ ކައުންސިލުން ބޭއްވި 2023 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ހަފްލާގައި ތަހުގީގީ ދާއިރާއިން އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް ލިބުނު އެވޯޑަކީ، އިނާމު ދިނުމުގެ އުސޫލާ ޚިލާފަށް ދީފައިވާ އެވޯޑެއް ކަމަށް ދެއްކުމަށް ނޫސްވެރިކަމުގެ އިނާމުގެ ފަނޑިޔާރުންގެ ޕެނަލުން ވަނީ މަސައްކަތް ފަށާފައެވެ. ފަނޑިޔާރުންގެ ޕެނަލުން ނެރުނު ނޫސްބަޔާނުގައި ބުނެފައިވަނީ، މޯލްޑިވްސް މީޑިއާ ކައުންސިލް އެވޯޑުގެ އޯޑިއޯ ވީޑިއޯ ކެޓަގަރީގެ ތަހުޤީޤީ ނޫސްވެރިކަމުގެ އިނާމް ދީފައިވަނީ މޯލްޑިވްސް މީޑިއާ ކައުންސިލް އެވޯޑު ދިނުމުގެ އުސޫލާއި މަޤްސަދާ ޚިލާފަށް ކަމަށެވެ.
އެކަމާއި ގުޅޭގޮތުން ވާހަކަދައްކަމުން އާއިދު ބުނީ އެވޯރޑް ނައިޓާއި ހަމައަށް ވެސް އެއްވެސް ސުވާލެއް ނުކުރާ ކަމަށާއި ކަންބޮޑުވުމެއްވެސް ހިއްސާކޮށްފައި ނުވާ ކަމަށެވެ. އޭނާ ވަނީ އުންމީދީ ނޫސްވެރިޔާގެ މަޤާމަށް ވެސް އެ އެވޯޑުގައި ކުރިމަތިލާފައި ކަމަށް އޭނާ ފާހަގަކުރިއެވެ. އެ އިންޓަރވިއުގައި ވެސް އެ ޑޮކިއުމެންޓްރީ އާއި މެދު ޝައުގުވެރިވެގެން ސުވާލުކުރި ނަމަވެސް، އެ އާއި މެދު ކަންބޮޑުވެގެން ސުވާލުކޮށްފައި ނުވާކަން އާއިދު ވަނީ ފާހަގަކޮށްފައެވެ. އަދި އެ އެވޯޑުގެ މައްސަލައެއް ބަލާކަން އަދަދަށް އަދިވެސް އަންގާފައި ނުވާ ކަަމަށް އޭނާ ބުންޏެވެ. މީގެ އިތުރުން އެވޯޑް ލިބުމުން ވެސް މަރުޚަބާ ކިޔުމަށް ފަހު އެވޯޑް ނައިޓްގެ ފަހުން މައްސަލަތަކެއް ފެންމަތިވުމުން ސުވާލު އުފެދޭ ކަމަށް އޭނާ ވަނީ ބުނެފައެވެ. ފަނޑިޔާރުން ވެސް ފަނޑިޔާރުންގެ ނިންމުމާއި މެދު ސުވާލު އުފައްދަން ޖެހުނު ސަބަބާއި މެދު ސުވާލު އުފެދޭ ކަމަށް ފާހަގަކޮށް އާއިދު ވަނީ އެއީ ނެތް ހާލަތެއް އުފެއްދުން ކަމަށް ސިފަކޮށްފައެވެ. އެފަދަ ހާލަތެއް އޮތް ނަމަ އެވޯޑް ނުދިނުން މާ ރަނގަޅުކަމަށް އޭނާ ވަނީ ބުނެފައެވެ.
