ދިވެއްސަކު ބައިވެރިވެގެން ލަންކާގައި ދޭން އުޅުނު ޓެރަރިސްޓް ހަމަލާ އަކީ ހައްދުފަހަނައަޅާފައިވާ ފިކުރުގެ ކަމެއް ނޫން: ލަންކާ ސަރުކާރު
ހައްޔަރު ކުރި 6 މީހުންގެ ތެރޭގައި ހިމެނޭ ދިވެހި މީހާގެ އިތުރުން ކުރީގެ އެލްޓީޓީއީގެ ދެ މެންބަރުން ހިމެނެއެވެ.
ސެޕްޓެމްބަރު 21، 2024 ގައި ލަންކާގެ ވެރިރަށުގެ މަގުމަތީގައި ޗެކްޕޮއިޓެއްގައި ފުލުހުން ހަރަކާތްތެރިވަނީ
ދިވެއްސަކު ބައިވެރިވެގެން ލަންކާގެ ޓޫރިސްޓު ރިސޯޓަކަށް ދޭން އުޅުނު ކަމަށް ތުހުމަތު ކުރެވޭ ޓެރަރިސްޓް ހަމަލާ އަކީ ހައްދުފަހަނައަޅާފައިވާ ފިކުރުގެ ކަމެއް ނޫންކަމަށާއި، އެއީ ރޭވިގެން ދޭން އުޅުނު ހަމަލާއެއް ކަމަށް ލަންކާ ސަރުކާރުން ބުނެފިއެވެ.
ލަންކާ ސަރުކާރުން މިކަން ހާމަ ކުރީ ބުދަ ދުވަހު ކޮޅުނބުގައި ހުންނަ އެމެރިކާގެ އެމްބަސީގެ އޮފިޝަލުންނާ މި ހާދިސާ އާ ގުޅޭ ގޮތުން ބޭއްވި ބައްދަލުވުމަކަށް ފަހުގައި ކަމަށް ލަންކާގެ މީޑިއާ އިން ރިޕޯޓު ކޮށްފައިވެއެވެ.
އެ ހާދިސާއާ ގުޅިގެން ހައްޔަރުކުރެވުނު 6 މީހުންނާ ބެހޭ ގޮތުންނާއި، ތަޙުޤީޤާ ބެހޭގޮތުން، ދިފާޢީ ސެކްރެޓަރީ ސަމްޕަތް ތުޔަކޮންތަ އަދި ރައީސް އޮފީހުގެ އޮފިޝަލުންގެ މައްޗަށް އެކުލެވޭ ވަފުދަކުން ކޮޅުނބުގައި ހުންނަ އެމެރިކާގެ އެމްބަސީގެ އޮފިޝަލުންނާ ބައްދަލު ކޮށް މައުލޫމާތު ހިއްސާ ކޮށްފައިވާ ކަމަށް އިސް ދިފާޢީ އޮފިޝަލެއް ޑެއިލީ މިރާ އަށް ކަށަވަރު ކޮށްދީފައި ވެއެވެ.
ލަންކާ ސަރުކާރުގެ އޮފިޝަލުން އެމެރިކާގެ އެމްބަސީ އަށް ތަހުގީގުގެ ހޯދުންތައް ހިއްސާ ކުރިއިރު، އަރުގަމް ބޭ އަށް ދޭން އުޅުނު ކަމަށް ބެލޭ ޓެރަރިސްޓު ހަމަލާ އަކީ ހައްދުފަހަނައަޅާފައިވާ ބައެއްގެ ޙަރަކާތެއްގެ ގޮތުގައި ލަންކާ ސަރުކާރުން ނުދެކޭ ކަމަށާއި އޭގެ ބަދަލުގައި އެކަމަކީ ބަޔަކު ގުޅިގެން ރާވާފައިވާ ކަމެއް ކަމަށް ވަނީ ބުނެފައިވެއެވެ.
މި ހާދިސާ އާ ގުޅިގެން މިހާތަނަށް 6 މީހަކު ހައްޔަރުކުރެވިފައިވެއެވެ. އޭގެތެރޭގައި ދިވެހި ރައްޔިތަކު ހިމެނޭކަން ލަންކާ ސަރުކާރުން ވަނީ ކަށަވަރު ކޮށްދީފައެވެ. އެހެން ނަމަވެސް އޭނާގެ ވަނަވަރު އަދި ހާމަކޮށްފައެއް ނުވެއެވެ.
އޭނާގެ އިތުރުން ހައްޔަރު ކުރި މީހުންގެ ތެރޭގައި، ކުރީގެ އެލްޓީޓީއީގެ ދެ މެންބަރުން ހިމެނެއެވެ. މީގެ ތެރެއިން އެކަކީ ކުރީގެ ކެބިނެޓް މިނިސްޓަރ ޖެޔަރާޖް ފަރނަންޑްޕުއްލޭގެ އަވަހާރަކޮށްލުމުގައި ބައިވެރިވިކަމުގެ ތުހުމަތު ކުރެވިފައިވާ ފަރާތެއް ކަމަށް ލަންކާ މީޑިއާއިން ބުނެފައިވެއެވެ.
ފުރަތަމަ ކުރެވުނު ތަޙުޤީޤުތަކަށް ހަވާލާދީ ޚަބަރުތަކުގައިވަނީ، ޝައްކުކުރެވޭ މީހުންނާއި އީރާނުގެ ރައްޔިތަކު ގުޅުން އުފައްދާފައިވާ ކަމަށާއި، މިކަން ކުރުމަށް ރާވާފައިވަނީ ހަމަނުޖެހުން އުފެއްދުމުގެ ނިޔަތުގައި ކަމަށާއި، އެކަމަށް މާލީ އެހީތެރިކަން ފޯރުކޮށްދޭން ހުށަހަޅާފައިވާކަމަށް ބުނެފައިވެއެވެ.
ނަމަވެސް، އެއްވެސް ކަމެއް ހިނގުމުގެ ކުރިން، އެމެރިކާ ސަރުކާރުން ލަންކާ ސަރުކާރަށް ދިން މައުލޫމާތާއެކު ފުލުހުން ވަނީ އެކަމުގައި ބައިވެރިވާ ކަމަށް ތުހުމަތު ކުރެވޭ މީހުން ހައްޔަރުކޮށްފައެވެ.
އެހެން ރިޕޯޓެއްގައި ވާ ގޮތުން ސްރީ ލަންކާގައި ހުންނަވާ އީރާނުގެ ސަފީރު، އަލީ ރެޒާ ދެލްޚޮޝް، ވަނީ ސްރީ ލަންކާގައި އިޒްރޭލުގެ އަމާޒުތަކަށް ހަމަލާއެއް ދިނުމުގެ ރޭވުމެއްގައި އީރާނުން ބައިވެރިވެފައިވާ ކަމަށް ދެކެވޭ ވާހަކަތަކަށް ކަނޑައެޅިގެން ދެކޮޅު ހައްދަވާ ކަމަށް ވިދާޅުވެފައިވެއެވެ. އޭނާ ވިދާޅުވި ގޮތުގައި ރައީސް އަނޫރާ ކުމާރާ ޑިސަނާޔަކާ އާ ދާދި ފަހުން ބައްދަލު ކުރެއްވި ކަމަށާއި އެފަދަ ވާހަކައެއް ރައީސް ވިދާޅުވެފައި ނުވާ ކަަމަށް ވެސް އީރާނުގެ ސަފީރު ވިދާޅުވެފައިވެއެވެ. އަދި މިކަމާ ގުޅޭ ގޮތުން އެއްވެސް ރަސްމީ ރިޕޯޓެއް އެމްބަސީއަށް ލިބިފައެއް ނުވާ ކަަމަށްވެސް އޭނާ ވަނީ ވިދާޅުވެފައެވެ.
