ސްކީލާނަށް ދިން އެވޯޑުވެސް އަތުލަނީ
މިއެވޯޑަކީ، އިނާމު ދިނުމުގެ އުސޫލާ ޚިލާފަށް ދީފައިވާ އެވޯޑެއް ކަމަށް ބަޔާނުގައި ބުނެފައިވޭ
ސްކީލާން - ރައީސް މުއިއްޒުގެ ދޮން މަންނަ - ސްކްރީން އިމޭޖް
މޯލްޑިވްސް މީޑިއާ ކައުންސިލުން ބޭއްވި 2023 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ހަފްލާގައި ތަހުގީގީ ދާއިރާއިން އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް ލިބުނު އެވޯޑަކީ، އިނާމު ދިނުމުގެ އުސޫލާ ޚިލާފަށް ދީފައިވާ އެވޯޑެއް ކަމަށް ނޫސްވެރިކަމުގެ އިނާމުގެ ފަނޑިޔާރުންގެ ޕެނަލުން ނިންމައިފިއެވެ. މި އެވޯޑަކީ ސައްހަ އެވޯޑެއެއްގެ ގޮތުގައިވެސް ކުރިން ނިންމީ ވެސް ހަމަ މި ފަނޑިޔާރުންނެވެ.
މުޙައްމަދު ސަލީމް، ޝަމްއާން ޝާކިރު، ހަސަން އާމިރު، ފާތިމަތު އަޝްވާ ފަހީމް، އަބްދުالله ނައީމް އިބްރާހިމް އަދި އަބްދުالله އަޒްމީން ހިމެނޭގޮތަށް ފަނޑިޔާރުންގެ ޕެނަލުން މިގޮތަށް ނިންމާފައި މިވަނީ، ޕީއެސްއެމްގެ އެޑިޓޯރިއަލް ކޮންޓެންޓާ ޚިލާފު އަދި ނޫސްވެރި ކަމުގެ މިންގަނޑުތަކާ ޚިލާފު ވީޑިއޯއެއް މޯލްޑިވްސް މީޑިއާ ކައުންސިލުން "ގަސްދުގައި" ދެއްކިކަމަށް ބުނެ ޕީއެސްއެމް އިން ބަޔާނެއް ނެރެފައި ވަނިކޮށެވެ.
ފަނޑިޔާރުންގެ ޕެނަލުން ނެރުނު ނޫސްބަޔާނުގައި ބުނެފައިވަނީ، މޯލްޑިވްސް މީޑިއާ ކައުންސިލް އެވޯޑުގެ އޯޑިއޯ ވީޑިއޯ ކެޓަގަރީގެ ތަހުޤީޤީ ނޫސްވެރިކަމުގެ އިނާމް ދީފައިވަނީ މޯލްޑިވްސް މީޑިއާ ކައުންސިލް އެވޯޑު ދިނުމުގެ އުސޫލާއި މަޤްސަދާ ޚިލާފަށް ކަމަށެވެ.
މިގޮތަށް ނިންމުމުގެ ސަބަބުތައް ކަމަށް ފަނޑިޔާރުން ފާހަގަކޮށްފައިވާ ނުކުތާތަކަކީ:
ސްކީލާން" އަށް އެވޯޑް ދިން ރަސްމިއްޔާތުގައި ސަރުކާރުގެ މަތީ ފެންވަރުގެ ބޭފުޅުން ބައިވެރިވެ ވަޑައިގެންފައިވެއެވެ. އޭގެ ތެރޭގައި، ނައިބު ރައީސް ހުސައިން މުހައްމަދު ލަތީފް އާއި ގައުމިއްޔަތު މިނިސްޓަރ އާދަމް ނަސީރު އާއި ރައީސް އޮފީހުގެ މީޑިއާ ކަންކަން ބަލަހައްޓަވާ މިނިސްޓަރު އިބްރާހިމް ހަލީލު އާއި ސަރުކާރުގެ ތަރުޖަމާނު ހީނާ ވަލީދު ހިމެނިވަޑައިގަންނަވައެވެ.
