އެންއައިސީގެ މެންބަރަކަށް އިންޝާ ހަމަޖެއްސުމަށް ހުށަހަޅައިފި

ނޭޝަނަލް އިންޓަގްރިޓީ ކޮމިޝަންގެ މެންބަރުކަމަށް މަރިޔަމް އިންޝާ އައްޔަންކުރުމާއި މެދު ގޮތެއް ނިންމަވާދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅުއްވައިފިއެވެ.

އެކަމަށްޓަކައި ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވާފައިވާ ސިޓީ، ހޯމަ ދުވަހު މަޖިލީހުގައި ވަނީ އިއްވަވާދެއްވާފައެވެ. އެ ސިޓީގައި ނެޝަނަލް އިންޓަގްރިޓީ ގާނޫނުގެ ތިންވަނަ މާއްދާގެ ދަށުން އުފައްދާފައިވާ ނެޝަނަލް އިންޓަގްރިޓީ ކޮމިޝަނަށް މެންބަރަކު އައްޔަން ކުރުމަށް އެ ގާނޫނުގައިވާ ގޮތުގެ މަތިން އިއުލާނުކޮށްގެން އެކަމަށް އިޖާބަދިން ބޭފުޅުންތެރެއިން އެ ކޮމިޝަނަށް އައްޔަންކުރުމަށް ގަލޮޅު ނޫރަންފިނި މަރިޔަމް އިންޝާ ފައިސަލްގެ ނަން ހުށަހަޅުއްވާ ކަމަށް ފާހަގަކުރައްވާފައިވެއެވެ.

އެހެންކަމުން އޭނާ މަޤާމަށް އައްޔަން ކުރުމާއި މެދު މަޖިލީހަށް ފެންނަ ގޮތަށް ފާސްކޮށްދިނުމަށް ރައީސް ވަނީ ސިޓީގައި އެދިވަޑައިގެންފައެވެ. ހޯމަ ދުވަހު މަޖިލީހުގެ ރިޔާސަތުން ވަނީ އެ މައްސަލަ މިނިވަން މުވައްސަސާތަކުގެ ކޮމިޓީއަށް ފޮނުވާފައެވެ.

އިންޓެގްރިޓީ ކޮމިޝަނުގެ މެމްބަރު ކަމަށް ކުރިމަތިލުމަށް ހުޅުވާލާފައި ވަނީ ނޮވެމްބަރު 13ން ފެށިގެން 20ގެ ނިޔަލަށެވެ.