ސުއަރޭޒްއަށް އަނިޔާވެ ބާސާ އަށް އިތުރު ހުރަސްތަކެއް ކުރިމަތިވެއްޖެ
ސުއަރޭޒްގެ ކަކުލު ހުޅަށް ވަނީ އަނިޔާވެފައި
ބާސެލޯނާ އަށް ކުޅެމުން އަންނަ ލުއިސް ސުއަރޭޒް
ސްޕެނިޝް ސުޕާކަޕްގެ ދެވަނަ ލެގުގައި ބާސެލޯނާ އަދި ރެއާލް މެޑްރިޑް ބައްދަލުކުރި މެޗުގައި ބާސާގެ ލުއިސް ސުއަރޭޒް އަށް އަނިޔާވެ، އިތުރު ހުރަސްތަކާ އެޓީމު ކުރިމަތިލާންޖެހިއްޖެ އެވެ.
ބުދަ ދުވަހުގެ ރޭ ކުޅުނު މެޗުގައި ސުއަރޭޒްގެ ކަކުލު ހުޅަށް އަނިޔާވެފައިވާކަން ބާސާގެ ކޯޗު ވެސް ވަނީ ކަށަވަރުކޮށްދީފައެވެ. އެހެންނަމަވެސް އަނިޔާގެ ތަފްސީލް ދެވޭނީ ބުރާސްފަތި ދުވަހު ހަދާ ޓެސްޓްތަކަށް ފަހު ކަމަށް އެ ކްލަބުން ވެސް ވަނީ ބުނެފައެވެ.
ބާސާގެ އެޓޭކިން ލައިންގައި މުހިންމު ދައުރެއް އަދާކުރަމުންދާ ސުއަރޭޒްއަށް އަނިޔާވެފައިވާއިރު. އެޓީމުގެ ފޯވާޑް ނޭމާ ވަނީ ދާދި ފަހުން ޕީއެސްޖީ އަށް ބަދަލުވެފައެވެ. އެގޮތުން ނޭމާ ނެތް ތަން ފޫބެއްދުމަށް ބާސާ އިން މަސައްކަތްކުރަމުން އަންނައިރު، ސުއަރޭޒްއަށް މިވަނީ އަނިޔާގެ މައްސަލަތައް ކުރިމަތިވެފައެވެ.
ބާސާ އިން ފަހަކަށް އައިސް ހޯދަމުންދާ ނަތީޖާތަކާ ގުޅިގެން އެ ކްލަބުގެ ސަޕޯޓަރުން އަންނަނީ ފާޑުކިޔަމުންނެވެ. އެގޮތުން ކްލަބުގެ ރައީސް ބާޓިމޮއޯ އިސްތިއުފާ ދެއްވުމަށް ވެސް ގިނަ އަދަދެއްގެ ސަޕޯޓަރުން ދަނީ ގޮވާލައި ސޯޝަލް މީޑިއާގައި ޕްރޮޓެސްޓްކުރަމުންނެވެ.
މި ސީޒަނަށް ބާސާ އިން އަންނަނީ ލިވަޕޫލްގެ ފޯވާޑް ފިލިޕޭ ކޫޓީނިއޯ ވެސް ހޯދަން މަސައްކަތްކުރަމުންނެވެ. އެހެން ނަމަވެސް ލިވަޕޫލް އިން އޭނާ ވިއްކާލަން އަދިވެސް އެއްބަހެއް ނުވެއެވެ.
