ސިޓީ ބަލިކޮށް، ޓޮޓެންހަމް ކުއާޓާ ފައިނަލަށް

ކަރަބޯ ކަޕްގެ ގަދަ 16 ވަނަ ބުރުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެ، ޓޮޓެންހަމް އިން މުބާރާތުގެ ކުއާޓާ ފައިނަލް އިން ފުރުސަތު ހޯދައިފި އެވެ.

ޓޮޓެންހަމްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ދެ ޓީމުން ވެސް ލަނޑުތައް ޖެހީ ފުރަތަމަ ހާފުގަ އެވެ. މެޗުގައި ޓޮޓެންހަމް އިން ދެ ލަނޑު ޖަހައި ލީޑު ނެގި ފަހުން ސިޓީން ލަނޑު ޖެހީ އެވެ.

މެޗު ފަށައިގެން ދެ ވަނަ މިނެޓުގައި ޓޮޓެންހަމް އިން ވަނީ ސިޓީ ކޮޅަށް ލަނޑު ޖަހައި މެޗުގައި ލީޑު ނަގައިފަ އެވެ. ޑެހާން ކުލުސެވްސްކީ ތަނަވަަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޓިމޯ ވާނާ އެވެ. އޭގެ ފަހުން ސިޓީން ނަތީޖާ ހަމަހަމަ ކުރުމަށް މަސައްކަތް ކުރަމުން ދަނިކޮށް، ޓޮޓެންހަމް އިން ވަނީ ދެ ވަނަ ލަނޑެއް ޖަހައިފަ އެވެ. މެޗުގެ 25 ވަނަ މިނެޓުގައި އެ ލަނޑު ސިޓީ އަށް ޖަހައިދިނީ ޕެޕް މަޓާ ސާ އެވެ. އެ ލަނޑު ޖަހަން އޭނާ އަށް ވެސް ފުރުސަތު ތަނަވަސްކޮށްދިނީ ކުލުސެވްސްކީ އެވެ. މެޗުގައި ސިޓީގެ ހަމައެކަނި ލަނޑު، ފުރަތަމަ ހާފުގެ އިތުރު ވަގުތުގައި ޖެހީ މަތުއެސް ނޫނޭޒް އެވެ. އެއީ ސަވީނިއޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އިނގިރޭސި ޕްރިމިއާ ލީގުގައި ޓޮޓެންހަމްގެ ނަތީޖާތައް ދަށްވެ އެ ޓީމުގެ ކޯޗު އަންގޭ ޕޮސްޓްކޮގްލޫ އަށް ޕްރެޝަރު ބޮޑުވެފައިވާ ވަގުތެއްގައި، މިއީ ޓޮޓެންހަމް އިން ހޯދި މުހިންމު މޮޅެއްގެ ގޮތުގައި މީޑިއާ ތަކުގައި ވަނީ ސިފަ ކޮށްފަ އެވެ. މުބާރާތުގެ ކުއާޓާ ފައިނަލްގައި ޓޮޓެންހަމް ނިކުންނާނީ މެންޗެސްޓަރ ޔުނައިޓެޑާ ދެކޮޅަށެވެ.