އިންޑިއާ އަދި ސަޢޫދީ ޢަރަބިއްޔާއަށް ސަފީރުން ޢައްޔަން ކުރައްވައިފި
30 އޮކްޓޯބަރު 2024 | ބުދަ 09:41އިންޑިއާއަށް ޢާއިޝަތު ޢަޒީމާ، ސަޢޫދީ ޢަރަބިއްޔާއަށް އަޙްމަދު ސަރީރު ވަނީ ހަމަޖައްސަވާފައި
އިންޑިއާ އަދި ސައުދީ އަށް ސަފީރުން އައްޔަން ކުރުމަށް ރައީސް އޮފީހުގައި ބޭއްވި ރަސްމިއްޔާތު
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ދިވެހިރާއްޖެއިން އިންޑިއާ އަދި ސަޢޫދީ ޢަރަބިއްޔާއަށް ކަނޑައަޅުއްވާ ސަފީރުން ބުދަ ދުވަހު ޢައްޔަން ކުރައްވައިފިއެވެ.
މި ދެ މަޤާމަށް ޢައްޔަން ކުރެއްވި ބޭފުޅުންނަށް މަޤާމުގެ ފަތްކޮޅު ހަވާލުކޮށްދެއްވީ ރައީސް އޮފީހުގައި މިއަދު ބޭއްވުނު ޚާއްޞަ ރަސްމިއްޔާތެއްގައި ރައީސް ޑރ. މުޙައްމަދު މުޢިއްޒެވެ.
ރިޕަބްލިކް އޮފް އިންޑިއާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށް ޢައްޔަން ކުރައްވާފައިވަނީ މާފަންނު ބީނާފުށި، އަލްފާޟިލާ ޢާއިޝަތު ޢަޒީމާއެވެ.
އަލްފާޟިލާ ޢާއިޝަތު ޢަޒީމާއަކީ 1988 ވަނަ އަހަރުން ފެށިގެން ހާރިޖިއްޔާގެ އެކި މަޤާމުތަކުގައި ގިނަ އަހަރުތަކެއް ވަންދެން ޚިދުމަތް ކުރައްވާފައިވާ ކެރިއަރ ޑިޕްލޮމެޓެކެވެ. ޗައިނާގައި ހުންނަވާ ރާއްޖޭގެ ސަފީރުކަމުގެ މަޤާމު 2019 ން 2023 ށް އަދާކުރެއްވުމަށްފަހު އެންމެ ފަހުން ހުންނެވީ ފޮރިން މިނިސްޓްރީގެ އެޑިޝަނަލް ސެކްރެޓަރީގެ މަޤާމުގައި، އިންޑިއާ ޑިވިޝަންގެ ހެޑްގެ ގޮތުގައެވެ.
ސަޢޫދީ ޢަރަބިއްޔާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށް ޢައްޔަން ކުރައްވާފައިވަނީ މާފަންނު ވެސްޓްސައިޑް، އަލްފާޟިލް އަޙްމަދު ސަރީރެވެ.
އަޙްމަދު ސަރީރު ވަނީ 1986 ވަނަ އަހަރުން ފެށިގެން ހާރިޖީ ދާއިރާގެ އެކި މަޤާމުތައް އަދާކުރައްވާފައެވެ. އޭނާ ވަނީ މީގެ ކުރިން އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ)ގެ އޭޝިއާ ޑިރެކްޓަރެއްގެ ގޮތުގައި ސަޢޫދީ ޢަރަބިއްޔާގައި މަސައްކަތް ކުރައްވާފައެވެ. މަގާމަށް އައްޔަން ކުރުމާ ހަމައަށް ސަރީރު ހުންނެވީ އެމްބަސަޑާ އެޓް ލާޖުގެ މަގާމުގަ އެވެ.
