މަރެސްކާ ބުނީ ޗެލްސީން މަސައްކަތް ކުރަނީ މުސްތަޤުބަލަށް ރަނގަޅު ޓީމެއް ބިނާ ކުރުމަށް ކަމަށް!

ޗެލްސީން މަސައްކަތް ކުރަމުން އަންނަނީ ކުރިއަށް އޮތް ހަތަރު އަހަރު ނުވަތަ ފަސް އަހަރުގެ ތެރޭގައި ރަނގަޅު ޓީމެއް ބިނާ ކުރުމަށް ކަމަށް އެ ޓީމުގެ ކޯޗު އެންޒޯ މަރެސްކާ ބުނެފި އެވެ.

އޭނާ މިހެން ބުނީ މި ސީޒަންގައި ޗެލްސީގެ ނަތީޖާ އާއި، އެ ޓީމުން ކުރަމުން އަންނަ މަސައްކަތްތަކާ ގުޅޭ ގޮތުން ނޫސްވެރިޔަކު ކުރި ސުވާލަށް ޖަވާބު ދެމުންނެވެ. ޗެލްސީގެ ކޯޗުކަމަށް މަރެސްކާ ހަމަޖެއްސީ މިހާރު ކުރިއަށްދާ ސީޒަނާ ދިމާކޮށެވެ. އެއީ އޭނާގެ ކުރިން އެ މަގާމުގައި ހުރި އާޖެންޓީނާގެ މައުރީސިއޯ ޕޮޗެޓީނޯ މަގާމުން ދުރަށް ދިޔުމުންނެވެ. ޗެލްސީގެ ކޯޗުކަމާ މަރެސްކާ ހަވާލުވީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ.

މަރެސްކާ ބުނީ ޗެލްސީގައި އޭނާ މަސައްކަތް ކުރަމުން އަންނަނީ ހަމަޖެހިގެން ކަމަށާއި، މިވަގުތުގައި އޭނާ އަށް އެއްވެސް ޕްރެޝަރެއް ވެސް ނެތް ކަމަށެވެ. މަރެސްކާ ބުނީ ޗެލްސީ އޮންނަން ޖެހޭނީ ލީގުގެ ވަކި ހިސާބެއްގައި، ނުވަތަ ލީގުގެ ގަދަ ހަތަރެއްގައި ކަމަށް ކުލަބުގެ ވެރިން އޭނާ އަށް ނާންގާ ކަމަށެވެ. އަދި އެފަދަ ވާހަކައެއް ދައްކާފައި ނުވާ ކަމަށް ވެސް މަރެސްކާ ބުންޏެވެ.

އޭގެ ބަދަލުގައި ކުރިއަށް އޮތް ހަތަރު އަހަރު ނުވަތަ ފަސް އަހަރުގެ ތެރޭގައި ރަނގަޅު ޓީމެއް ބިނާކޮށް، މުސްތަޤުބަލަށް މުހިންމު މަސައްކަތްތަކެއް ކުރުމަކީ ޗެލްސީގެ އަމާޒުކަމުގައި އަބަދު ވެސް ވެރިން ބުނާ ކަމަށް މަރެސްކާ ބުންޏެވެ. އެހެންކަމުން ކޮންމެ ދުވަހަކު ވެސް މަސައްކަތް ކުރަމުން އަންނަނީ ކުރިއަށް ދާން ކަމަށާއި، މުހިންމު ކަންކަން ޙާސިލު ކުރުމަށް ކެނޑިނޭޅި މަސައްކަތް ކުރާ ކަމަށް ވެސް މަރެސްކާ ބުންޏެވެ. އެކަން ފާހަގަ ކުރަމުން މަރެސްކާ ބުނީ، އޭނާ އަދި ޗެލްސީގެ ކުޅުންތެެރިން އަންނަނީ ވީ އެންމެ ރަނގަޅަށް މަސައްކަތް ކުރަމުން ކަމަށެވެ.

މި ސީޒަންގެ ޕްރިމިއާ ލީގުގައި މިވަގުތު ޗެލްސީ އޮތީ ފަސް ވަނައިގަ އެވެ. އެއީ މިހާތަނަށް ކުޅުނު ނުވަ މެޗުން 17 ޕޮއިންޓު ހޯދައިގެންނެވެ. ނުވަ މެޗުގެ ތެރެއިން ޗެލްސީ ވަނީ ފަސް މެޗުން މޮޅުވެފަ އެވެ. ދެ މެޗު އެއްވަރުވެފައިވާއިރު، އަނެއް ދެ މެޗުން ވަނީ ބަލިވެފަ އެވެ.