އީރާނަށް ހަމަލާދޭން އިރާގުގެ ވައިގެ ސަރަހައްދު އިޒްރޭލުން ބޭނުން ކުރުން ކުށްވެރިކޮށް މައްސަލަ އދ އަށް

އިޒްރޭލުން އިރާނަށް ހަމަލާ ދިނުމުގައި އިރާގުގެ ވައިގެ ސަރަހައްދު ބޭނުން ކުރުން ކުށްވެރިކޮށް، އިރާގުން އދ އަށް ޝަކުވާ ހުށަހަޅައިފިއެވެ.

އިރާގުން އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް އަށާއި އދ.ގެ ސެކިއުރިޓީ ކައުންސިލަށް އިހުތިޖާޖުގެ ސިޓީއެއް ފޮނުވާފައިވާކަމަށް ހޯމަ ދުވަހު ބަޣުދާދުން ބުނެފައިވެއެވެ.

ސަރުކާރުގެ ތަރުޖަމާނު ބާސިމް އަލް އަވަދީ ދެއްވި ބަޔާނެއްގައި ވިދާޅުވީ އިރާގުން އދ އަށް ފޮނުވި އިހުތިޖާޖުގެ ސިޓީގައި "26 އޮކްޓޯބަރު 2023 ގައި އިސްލާމިކް ރިޕަބްލިކް އޮފް އިރާނަށް ހަމަލާއެއް ދިނުމަށް އިރާގުގެ ވައިގެ ސަރަހައްދު ބޭނުންކޮށް، ޔަޒަނިސްޓު ދައުލަތުން އިރާގުގެ ވައިގެ ސަރަހައްދާއި ސިޔާދަތަށް އަރައިގަތުން،" ކުށްވެރިކޮށްފައިވާނެ ކަމަށެވެ.

އިޒްރޭލުގެ ގާތް އެކުވެރިޔާ އަދި އެންމެ ގިނަ ހަތިޔާރު ފޯރުކޮށްދޭ ފަރާތް ކަމުގައިވާ އެމެރިކާ އާއެކު ކުރެވޭ މަޝްވަރާތަކުގައިވެސް އިރާގުގެ ޚާރިޖީ ވުޒާރާއިން މި މައްސަލަ ނަގާނެ ކަމަށް އަލް އަވަދީ ވިދާޅުވިއެވެ.

ޣައްޒާގެ ހަނގުރާމަ ފެށި ތާ އަހަރަކަށް ވުރެ ގިނަ ދުވަސް ވެފައި ވާއިރު އަދި އިޒްރޭލާ ހިޒްބުﷲ އާ ދެމެދު ހިނގަމުންދާ ހަނގުރާމައަށް މަހެއް ވެފައިވާ ދަނޑިވަޅެއްގައި، ސަރަހައްދީ ހަލަބޮލިކަން އިތުރުވުމުގެ ނުރައްކާ އޮތް ހާލަތެލަތެއްގައި، އިޒްރޭލުން ވަނީ ހޮނިހިރު ދުވަހު އިރާނުގެ އަސްކަރީ ތަންތަނަށް ވައިގެ ހަމަލާތަކެއް ދީފައެވެ.

އިޒްރޭލުގެ މި ހަމަލާއަކީ އޮކްޓޯބަރު 1 ގައި އިރާނުން ދިން މިސައިލް ހަމަލާއަށް ދިން ރައްދެއް ކަމަށް އިޒްރޭލުން ވަނީ ބުނެފައެވެ. އިރާނުން އިޒްރޭލަށް މިސައިލް ހަމަލާ ދިނީ އިރާނާ ގާތް އަދި މަދަދުވެރިވާ ޖިހާދީ ގްރޫޕްތަކަށް ނިސްބަތްވާ ލީޑަރުންނާއި އިސްލާމިކް ރިވޮލިއުޝަނަރީ ގާޑްސް ކޯޕްސްގެ ކޮމާންޑަރެއް މަރާލުމުން އެކަންކަމުގެ ބަދަލު ހިފުމުގެ ގޮތުން ދިން ހަމަލާއެއް ކަމަށް އީރާނުން ވަނީ ބުނެފައެވެ.

އިޒްރޭލުން އީރާނަށް ދިން ހަމަލާއާ ބެހޭ ގޮތުން އީރާނުގެ އަސްކަރިއްޔާ އިން ނެރުނު ބަޔާނުގައި ބުނެފައިވަނީ ދިގު ރާސްތާ މިސައިލް ހަމަލާތަކެއް އިޒްރޭލުން ދިނީ އެމެރިކާގެ ބެލެހެއްޓެމުގެ ދަށުގައިވާ އިރާގުގެ ވައިގެ ސަރަހައްދުގެ ތެރެއިން ކަމުގައެވެ.

ބަޣުދާދު އާއި ތެހެރާން އަކީ އެތައް އަހަރަކަށް ދިގުލައި ދިޔަ ނުރައްކާތެރި ހަނގުރާމައެއް ކޮށްފައިވާ ދެގައުމު ކަމުގައިވިޔަސް މިހާރު ވަރަށް ގާތް ގުޅުމެއް އޮންނަ ދެގައުމެވެ. އިރާގާ އީރާނުގެ ގުޅުން ރަނގަޅު ވެގެން އައިސްފައި ވީނަމަވެސް، އިރާގުގައި އެމެރިކާގެ އަސްކަރީ ބޭސް އެއް އޮތުމާއެކު އިރާގުން އެމެރިކާއާއެކުވެސް ސްޓްރެޓެޖިކް ގުޅުމެއް އޮވެއެވެ.

އެމެރިކާގެ ސިފައިން އިރާގުގައި ތިބެނީ ބައިނަލްއަގުވާމީ ޓެރަރިޒަމާ ދެކޮޅު އިއްތިހާދުގެ ބައެއްގެ ގޮތުގައި މަންޒަރު ދައްކައިގެންނެވެ. އެހެން ނަމަވެސް އެމެރިކާ އިން މި ބުނާ މަގްސަދާ އެމެރިކާގެ އަމަލުތައް ހުންނަ ގޮތާ ފުށުއަރާކަން ފާހަގަ ވާ އެތައް ކަމެއް ސިޔާސީ އަދި ދިފާއީ ތަޖުރިބާކާރުން އަންނަނީ ފާހަގަ ކުރަމުންނެވެ.