އީރާާންގެ ހަމަލާތައް، އަސްކަރީ ތަންތަނަށް އަމާޒުވި ކަމަށް އިސްރާއީލް އިން އެއްބަސްވެއްޖެ

އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމައިގައި، އީރާން އިން ދިން ހަމަލާތައް އެ ޤައުމުގެ އަސްކަރީ ތަންތަނަށް އަމާޒުވެފައިވާ ކަމަށް އިސްރާއީލް އިން އެއްބަސްވެއްޖެ އެވެ.

އިސްރާއީލް އިން އިސްވެ އީރާންގެ ނިއުކްލިއާ މަރުކަޒުތަކަށް ދިން ހަމަލާގެ ސަބަބުން، އޭގެ ރައްދުގައި އީރާން އިން ވެސް ވަނީ އިސްރާއީލަށް ހަމަލާތަކެއް ދީފަ އެވެ. ދެ ޤައުމުގެ ދެ މެދުގައި 12 ދުވަހުގެ މުއްދަތަކަށް ހަނގުރާމަ ކުރިއަށް ދިޔައިރު، އީރާންގެ ހަމަލާތަކުގައި އިސްރާއީލަށް ބޮޑެތި ގެއްލުންތަކެއް ލިބުނު ކަމަށް އޭރު ވެސް ވަނީ ރިޕޯޓު ކޮށްފަ އެވެ.

އިސްރާއީލްގެ އަސްކަރިއްޔާގެ އޮފިޝަލަކު މައުލޫމާތު ދީފައިވާ ގޮތުގައި، މިދިޔަ މަހުގެ ތެރޭގައި އީރާން އިން ދިން ހަމަލާތަކުގައި އިސްރާއީލްގެ އަސްކަރީ ބައެއް އިމާރާތްތަކަށް ވަނީ ގެއްލުން ލިބިފަ އެވެ. މިއީ މިފަދަ ހަމަލާއެއް އަމާޒުވި ކަމަށް އިސްރާއީލް އިން އެއްބަސްވި، ނުވަތަ ހާމަ ކުރި ފުރަތަމަ ފަހަރެވެ.

ނަން ހާމަ ނުކުރުމުގެ ޝަރުތުގެ މަތިން ވާހަކަ ދެއްކި ެ އޮފިޝަލު ބުނެފައި ވަނީ، އަސްކަރީ މަދު ތަންތަނަށް ހަމަލާ އަމާޒުވެފައިވާ ކަމަށާއި، އެހެން ނަމަވެސް އެ ތަންތަން މިހާރު ވެސް ހުރީ ބޭނުން ކުރެވޭ ޙާލަތުގައި ކަމަށެވެ. ހަމަލާ އަމާޒުވި ކަމަށް އޮފިޝަލު ބުނެފައިވީ ނަމަވެސް، އެ ހަމަލާތައް އަމާޒުވީ އަސްކަރީ ކޮން ތަންތަނަކަށް ކަމެއް، ނުވަތަ ހަމަލާގެ ސަބަބުން ލިބުނު ގެއްލުމެއް އޭނާ ހާމަކޮށްފައި ނުވެ އެވެ. 

އިސްރާއީލްގެ ކިބައިން ބަދަލު ހިފުމުގެ ގޮތުން އީރާން އިން ދިން ގިނަ ހަމަލާތައް އަމާޒު ކޮށްފައި ވަނީ އާންމުން އުޅޭ ސަރަހައްދު ތަކަށެވެ. އެގޮތުން އިސްރާއީލްގެ ވެރި ރަށް ތެލް އަވީވް، ހައިފާ އަދި ބީއަޝީބާ އަށް ވަނީ ގިނަ ހަމަލާތަކެއް ދީފަ އެވެ. މި ހަނގުރާމައިގައި އިސްރާއީލްގެ 28 މީހަކު މަރުވެފައިވާ ކަމަށް ވަނީ ރިޕޯޓު ކޮށްފަ އެވެ. 

އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމަ ނިމުމަކަށް ގެނައީ އެމެރިކާ މެދުވެރި ވެގެންނެވެ. ހަނގުރާމަ ހުއްޓާލުމުގެ އެއްބަސްވުމުގެ ކުރިން، އެމެރިކާ އިން ވެސް ވަނީ އީރާނަށް ހަމަލާ ދީފަ އެވެ. އޭގެ ރައްދުގައި އީރާން އިން ވަނީ ޤަތަރުގައި ހުރި އެމެރިކާގެ ބޭސް އަކަށް އަމާޒުކޮށް ހަމަލާ ދީފަ އެވެ.