އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމަ ހުއްޓާލުމަށް އެކުލަވާލެވުނު އެއްބަސްވުމާ މެދު އީރާން އިން ކަންބޮޑުވުން ފާޅު ކޮށްފި އެވެ.އިސްރާއީލް އިން އިސްވެ، އީރާނަށް އަމާޒުކޮށް ދިން ހަމަލާގެ ސަބަބުން ދެ ޤައުމުގެ ދެ މެދުގައި ވަނީ ވަރުގަދަ ހަނަގުރާމައެއް ފެށިފަ އެވެ. އެ ހަނގުރާމަައިގައި ދެ ޤައުމުން ވެސް ގިނަ ހަމަލާތަކެއް ބަދަލުކޮށްފައިވާއިރު، 12 ދުވަސް ވީ ފަހުން ވަނީ ހަނގުރާމަ ހުއްޓާލުމަށް އެއްބަސްވެފަ އެވެ. އީރާންގެ ހަތިޔާރުވެރި ބާރުތަކުގެ އިސްވެރިޔާ ޢަބްދުއް ރަޙީމް މޫސަވީ ވިދާޅުވީ، އިސްރާއީލް އިން އެއްބަސްވުމާ އެއްގޮތަށް އަމަލު ކުރާނެ ކަމާ މެދު ޝައްކުތަކެއް އުފެދިފައިވާ ކަމަށެވެ. މޫސަވީ ވިދާޅުވީ އީރާން އިން އެއްވެސް ޙާލަތެއްގައި ހަނގުރާމައެއް ފަށާފައި ނުވާނެ ކަމަށެވެ. އީރާން އިން ކުރިހާ ވެސް ކަމަކީ، އެ ޤައުމުގެ އަމިއްލަ ދިފާއުގައި މަސައްކަތް ކުރުން ކަމަށް އޭނާ ވިދާޅުވި އެވެ. އެެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން ހުށަހަޅާފައިވާ ހަނގުރާމަ ހުއްޓާލުމުގެ އެއްބަސްވުމަށް އިޝާރާތް ކުރަމުން މޫސަވީ ވިދާޅުވީ، އެ އެއްބަސްވުމަށް އިސްރާއީލް އިން އަމަލު ކުރާނެކަން ޔަގީން ނުވާ ކަމަށެވެ. ނަމަވެސް، އީރާން އިން މިހާތަނަށް ވެސް ދީފައި ވަނީ ފުރިހަމަ އެއްބާރުލުން ކަމަށާއި، ހަމަލާއެއް އަތުވެއްޖެ ނަމަ ދެން ވެސް ދިފާއުވާން މަސައްކަތް ކުރާނެ ކަމަށް ވެސް މޫސަވީ ވިދާޅުވެފައިވެ އެވެ. ޖޫން މަހުގެ 13 ވަނަ ދުވަހު އިސްރާއީލް އިން ވަނީ އީރާންގެ ނިއުކްލިއާ މަރުކަޒުތަކަށް އަމާޒުކޮށް ހަމަލާ ދީފަ އެވެ. އެ ހަމަލާތަކުގައި އީރާންގެ ނިއުކްލިއާ ސައިންޓިސްޓުން އަދި އެ ޤައުމުގެ އަސްކަރިއްޔާގެ އިސް ކޮމާންޑަރުންތަކެއް ވެސް ވަނީ ޝަހީދުވެފަ އެވެ. އިސްރާއީލް އިން ބުނެފައިވާ ގޮތުގައި އެ ހަމަލާތައް ދިނުމުގެ މަގުސަދަކީ އީރާން އިން ނިއުކްލިއާ ހަތިޔާރު އުފެއްދުން ހުއްޓުވުމެވެ.އެހެން ނަމަވެސް، މިހާތަނަށް ވެސް އީރާން އިން ބުނަމުން އަންނަނީ އެ ޤައުމުގެ ނިއުކްލިއާ ޕްރޮގްރާމް އަކީ ހަމައެކަނި މަދަނީ ބޭނުންތަކަށް ޚާއްސަ ޕްރޮގްރާމެއް ކަމަށެވެ. އިސްރާއީލް އިން ދިން ހަމަލާތަކުގެ ސަބަބުން ހަނގުރާމަ ފެށިފައި ވަނިކޮށް، އެމެރިކާ އިން ވެސް ވަނީ ހަނގުރާމައިގެ ތެރެއަށް ވަދެ އީރާަންގެ ނިއުކްލިއާ މަރުކަޒު ތަކަކަށް ހަމަލާ ދީފަ އެވެ. ޓްރަމްޕް ވަނީ، އީރާން އިން ނިއުކްލިއާ ހަތިޔާރު އުފެއްދޭ މިންވަރަށް ޔުރޭމިއަން ފައްކާ ކޮށްފި ނަމަ، ހަމަލާ ދޭނެ ކަމުގެ އިންޒާރު ވެސް ދީފަ އެވެ. ޓްރަމްޕްގެ ވެސް ހުށަހެޅުމަކަށް ވެފައި ވަނީ، އީރާން އިން ޔުރޭނިއަމް ފައްކާ ކުރުން ހުއްޓާލުމެވެ. އަދި އެއްވެސް މިންވަރަަކަށް އީރާން އިން އެކަން ކޮށްގެން ނުވާނެ ކަަމަށް ޓްރަމްޕް ވަނީ ވިދާޅުވެފަ އެވެ. އީރާންގެ ޞިއްޙީ ވުޒާރާ އިން ހާމަކޮށްފައިވާ ގޮތުގައި އެ ހަނގުރާމައިގައި އެ ޤައުމުން ވަނީ 627 މީހަކު ޝަހީދުވެފަ އެވެ. މީގެ އިތުރުން 4900 މީހަކުންނަށް އެކި ވަރުގެ ޒަޚަމުތައް ލިބިފައިވާ ކަމަަށް ވެސް ވަނީ ބުނެފަ އެވެ.