އިސްރާއީލްގެ ހަނގުރާމައިގައި އީރާން އިން 1060 މީހުން ޝަހީދުވި ކަމަށް އިއުލާން ކޮށްފި

އިސްރާއީލް އިން އީރާންގެ ނިއުކްލިއާ މަރުކަޒުތަކަށް ދިން ހަމަލާއާ ގުޅިގެން ދެ ޤައުމުގެ ދެ މެދުގައި ކުރިއަށް ދިޔަ ހަނގުރާމައިގައި، އީރާން އިން ޝަހީދުވީ މީހުންގެ އަދަދު 1060 އަށް އަރާފައިވާ ކަމަށް އެ ޤައުމުން އިއުލާން ކޮށްފި އެވެ. 

އީރާންގެ ސަރުކާރުން ޝަހީދުވެފައިވާ މީހުންގެ އަދަދު 1060 އަށް އަރާފައިވާ ކަމަށް އިއުލާން ކޮށްފައިވާއިރު، މި އަދަދު އަދި ވެސް އިތުރު ވެދާނެ ކަމަށް ވަނީ ބުނެފަ އެވެ. 

އީރާންގެ ޝަހީދުންނާއި ހަނގުރާމައިގެ ކަންތައްތަކާ ބެހޭ އިދާރާގެ އިސްވެރިޔާ ސައީދު އޮހާދީ ވަނީ މި މައުލޫމާތުތައް ހޯމަ ދުވަހު ހާމަކޮށްފަ އެވެ. އީރާންގެ ސަރުކާރުގެ ޓީވީ އަށް ދިން އިންޓަވިޔުއެއްގައި އޭނާ ވިދާޅުވީ ބައެއް މީހުންނަށް ލިބިފައިވާ އަނިޔާ ތަކަށް ބަލާއިރު، ޝަހީދުވާ މީހުންގެ އަދަދު އިތުރު ވެދާނެ ކަމަށެވެ. އެގޮތުން އޭނާ ލަފާ ކޮށްފައިވާ ގޮތުގައި، އެ އަދަދު 1100 އަށް އަރައިފާނެ އެވެ. 

އިސްރާއީލާއި އީރާނާ ދެމެދު 12 ދުވަހުގެ މުއްދަތަކަށް ކުރިއަށް ދިޔަ ހަނގުރާމައިގެ ސަބަބުން، އީރާންގެ ވައިގެ ދިފާއީ ނިޒާމަށް ބޮޑެތި ގެއްލުންތަކެއް ލިބުމުގެ އިތުރުން، އަސްކަރީ މަރުކަޒުތަކަށް ގެއްލުންވެ، ނިއުކްލިއާ ފެސިލިޓީތަކަށް ގެއްލުންވެފައިވާ ކަމަށް ވަނީ ރިޕޯޓު ކޮށްފަ އެވެ. ނަމަވެސް އީރާން އިން ބުނެފައި ވަނީ އެ ތަންތަނަށް ބޮޑެތި ގެއްލުން ތަކެއް ލިބިފައި ނުވާ ކަމަށެވެ. 

މި ހަނގުރާމަ ފެށުނީ އިސްރާއީލް އިން އިސްވެ އީރާންގެ ނިއުކްލިއާ މަރުކަޒުތަކަށް ދިން ހަމަލާގެ ސަބަބުންނެވެ. އޭގެ ބަދަލުގައި އީރާން އިން ވެސް ވަނީ އިސްރާއީލަށް އަމާޒުކޮށް ވަރުގަދަ ހަމަލާތަކެއް ދީފަ އެވެ. އެކަމުގެ ސަބަބުން އިސްރާއީލަށް ވެސް ބޮޑެތި ގެއްލުން ތަކެއް ލިބުނުއިރު، އިސްރާއީލްގެ ހަމަލާތަކުގައި އީރާން އަށް ވެސް ގެއްލުން ތަކެއް ލިބުނެވެ.