ގަތަރުގައި އޮންނަ އެމެރިކާގެ އަލް އުދައިދް އަސްކަރީ މަރުކަޒަށް އަލުން ހަމަލާ ދީފާނެކަމުގެ އިންޒާރު އީރާނުގެ ލީޑަރު ދެއްވައިފި އެވެ.

އިރާނުގެ އެންމެ އިސް ވެރިޔާ ހުކުރު ދުވަހު އެމެރިކާ އަށް އަލުން އިންޒާރު ދެއްވަމުން ވިދާޅުވީ، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަލުން ހަމަލާ ދިނުމަށް ނިންމައިފި ނަމަ އެކަން ކުރެވިދާނެ ކަމަށެވެ.

"އަލް އުދައިދް އެއަރ ބޭސް އަށް ހަމަލާ ދިނުމަކީ ކުޑަ ކަމެއް ނޫނެވެ. އެއީ ތަކުރާރުކޮށް ކުރެވިދާނެ ބޮޑު ކަމެކެވެ،" އިރާނުގެ އެންމެ މަތީ ވެރިޔާ އަލީ ޚާމަނާއީ ވިދާޅުވި ކަމަށް މީޑިއާ ރިޕޯޓު ތަކުގައި ވެއެވެ.

އޭނާ މިހެން ވިދާޅުވެފައި ވަނީ އެމެރިކާ އިން އިރާނުގެ ނިއުކްލިއަރ ސައިޓްތަކަށް ހަމަލާދިނުމާ ގުޅިގެން، ސަރަޙައްދުގައި ހުރި އެމެރިކާގެ އެންމެ ބޮޑު އަސްކަރީ މަރުކަޒަށް ބެލިސްޓިކް މިސައިލުން ހަމަލާދިން ހާާދިސާއަށް އިޝާރާތް ކުރައްވަމުންނެވެ.

"އަޅުގަނޑުމެންނަށް ސަރަޙައްދުގައި ހުރި އެމެރިކާގެ މުހިންމު ތަންތަނަށް ވާސިލުވެވޭނެ،" ޚާމަނާއީ ވިދާޅުވި އެވެ.

ހުކުރު ދުވަހު، ޕެންޓަގަނުން އަލް އަރަބިއްޔާ އަށް ބުނެފައި ވަނީ އީރާނުން ފޮނުވާލި މިސައިލްތަކުގެ ތެރެއިން އެއް މިސައިލް އެ މަރުކަޒަށް އަރާފައިވާ ކަމަށެވެ. މި ހަފުތާގައި ސެޓެލައިޓް މަންޒަރުތަކުން ދައްކާގޮތުގައި އެ މަރުކަޒުގައި ހުރި ރޭޑޯމް އަކަށް ގެއްލުން ލިބިފައިވެއެވެ. ރޭޑޯމް އަކީ އާންމު ގޮތެއްގައި މުވާސަލާތީ އާލާތްތަކާއި ސާމާނު ރައްކާކުރުމަށް ބޭނުންކުރާ ގުދަނެވެ.

އިރާނުން ހަމަލާދިން ދުވަހު، ޖޮއިންޓް ޗީފްސް އޮފް ސްޓާފްގެ ޗެއަރމަން ޖެނެރަލް ޑޭން ކެއިން ބުނެފައި ވަނީ ހިމާޔަތުގެ ގިނަ ފަށަލަ ތަކެއްގެ މައްޗަށް އެކުލެވޭ ވައިގެ ދިފާޢީ ނިޒާމުތައް ފަހަނައަޅައި މިސައިލެއް އަރާފައިވާ ކަން އެމެރިކާ އަށް އެނގޭ ކަމަށެވެ.

އެހެން ނަމަވެސް އީރާނުގެ މިސައިލް ހަމަލާ މަތަ ކުރުމަށް މަސައްކަތް ކުރި އެމެރިކާގެ ސިފައިންނަށް އޭނާ ތަޢުރީފުކޮށްފައިވެއެވެ. އަދި އެއީ "އެމެރިކާގެ އަސްކަރީ ތާރީޚުގައި އެއްފަހަރާ އެންމެ ގިނަ އަދަދަކަށް ޕެޓްރިއޮޓް މިސައިލް އަމާޒުވި ހާދިސާ" ކަމަށް އޭނާ ބުނެފައި ވެއެވެ.