މި ސަރުކާރުގެ ހުދުމުހުތާރު ހުރިހާ ސިފައެއް ހައްލު ކުރުމަށް މަސައްކަތް ކުރާނީ ރައްޔިތުންނާއެކު ކަމަށާއި، ރައްޔިތުން ބަސްބުނާ ހިސާބުން ސަރުކާރު ފަހަތަށް ޖެހޭނެ ކަމަށް ދިވެހިރައްޔިތުން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
ހޯމަ ދުވަހު ލާމަރުކަޒީ ނިޒާމުގެ ބާރު ކެނޑޭގޮތަށް މިސަރުކާރުން އަމަލުކުރަމުންދާތީ ލޯކަލް ގަވަރމަންޓް މިނިސްޓަރު އާދަމް ޝަރީފްއާ ބައްދަލުކުރުމަށް އެމްޑީޕީގެ މެންބަރުން އެ މިނިސްޓްރީއަށް ދިޔަ ނަމަވެސް މިނިސްޓަރު ވަނީ ބައްދަލު ކުރުމަށް ދެކޮޅު ހައްދަވާފައެވެ. އެކަމުގެ ކަންބޮޑުވުންތައް ހިއްސާކޮށް މެންބަރު ނާޒިލް ވިދާޅުވީ މައްސަލަތައް ހައްލު ކުރުމަށް ގިނަ ގޮތްގޮތުން މަސައްކަތް ކުރެވިފައިވާ ކަމަށެވެ. ކަންބޮޑުވުންތައް ހިއްސާކޮށް، ސަރުކާރުގެ ތެރެއިންނާއި، މަޖިލިސް ތެރެއިން ހައްލު ކުރުމަށް މަސައްކަތް ކޮށްފައިވާ ކަމަށް މެންބަރު ނާޒިލް ވިދާޅުވިއެވެ. އަދި ވިދާޅުވީ މައްސަލަތަކަށް ހައްލު ނުލިބުމުން ހައްލު ކުރުމުގެ މަސައްކަތް ކުރަނީ ރައްޔިތުން ކަމަށާއި، ބާރު ފެށިގެންދަނީ ރައްޔިތުންގެ ކިބައިން ކަމަށެވެ.
ރައްޔިތުން މަޖިލީހުގެ މަސައްކަތްތަކަށް އިޝާރާތް ކުރައްވައި މެންބަރު ނާޒިލް ވިދާޅުވީ މަޖިލީހަށް ހުުށަހެޅޭ އެއްވެސް ގާނޫނެއް ނުވަތަ އެއްވެސް އިސްލާހަކަށް އިލްމީ ގޮތުން ދިރާސާ ކޮށްލުމަށް ފުރުސަތު ނުލިބޭ ކަމަށާއި، ރަނގަޅު ބަހުސްއެއް ކުރިއަށް ނުގެންދެވޭ ކަމަށެވެ. އަވަސް އަރުވާލައިގެން ގާނޫނުތައް ފާސްކުރަމުންދަނީ ސަރުކާރުން ބޭނުންވާ ވަކިވަކި ކަންތައްތަކެއް ކުރުމުގެ މަގުސަދުގައި ކަމަށް މެންބަރު ނާޒިލް ވިދާޅުވިއެވެ.
މިސަރުކާރުން ހުދުމުހުތާރު ކަމުގެ ހުރިހާ ސިފައެއް ފެނިގެންދާއިރު، ރައްޔިތުން ބަސް ބުނަންޖެހޭ ކަމަށެވެ. އަދި ރައްޔިތުން ނުކުމެ ބަސް ބުނަން ފެށުމުން ސަރުކާރު ފަހަތަށް ޖެހޭނެ ކަމަށް މެންބަރު ނާޒިލް ވިދާޅުވިއެވެ.
ގާނޫނު އަސާސީ ވަރަށް ސަރީހަކޮށް އެބަބުނޭ ބާރު ދެމުންދަނީ ރައްޔިތުންގެ ކިބައިންނޭ. އަޅުގަނޑުމެންދަނީ ރައްޔިތުންގެ އަރިހަށް. ރައްޔިތުންގެ ގާތަށް ދާނީ ރައްޔިތުންގެ ކަންބޮޑުވުންތަކާއެކު ރައްޔިތުންނާ އެކީގައި އަޅުގަނޑުމެން މިކަމަށް ހައްލު ހޯދުމަށް ދެން މަސައްކަތް ކުރާނީ. އެއީ ސަރުކާރުގެ ތެރެއިން ނުކުރެވުނު. މަޖިލިސް ތެރެއިން ނުކުރެވުނު. ދެން އަޅުގަނޑުމެންނަށް ކުރެވެން އޮންނާނީ ރައްޔިތުންނާ އެކީގައޭ. މިކަން ދިމާވި ހިސާބުން ފެށިގެން ރައްޔިތުންނާ ހިސާބަށް ގެންނާނަން. އަޅުގަނޑުމެން ގަބޫލުކުރަނީ ރައްޔިތުން ބަލައިގަންނާނެ ކަމަށް ރައްޔިތުން ވަރަށް ގިނަ ދުވަހު މަސައްކަތް ހަގީގަތް އެބުރި އަނެއްކާ އަޅުގަނޑުމެންގެ އަތުން ބީވެގެން މިދަނީ. މިކަންބޮޑުވުންތައް ހިއްސާކުރާނަން އެކި ފޯރަމްތަކުގައި. އެއީ މިހާރު އޮތް ބާރަކީ. އަޅުގަނޑުމެން ރައްޔިތުންގެ ބާރު އެންމެ ފުރިހަމަ ގޮތުގައި ހިފާނަން.އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ހުށަހަޅާފައިވާތީ މެންބަރު ނާޒިލް ވިދާޅުވީ ސަރުކާރުން ބޭނުންވާ ގޮތަށް އެކަން ކުރާނެ ކަމަށާއި، މި ދެމުއައްސަސާގެ މިނިވަންކަން ނަގާލާނެ ކަމަށެވެ. ނަމަވެސް ރައްޔިތުން މިކަންކަމާއި ދެކޮޅަށް ނުކުމެއްޖެނަމަ ނަތީޖާ ނެރެވޭނެ ކަމަށް މެންބަރު ނާޒިލް ވިދާޅުވިއެވެ.
