"ބޭރު ފައިސާގެ ބިލު ކޮމިޓީން ފާސްކުރީ ޓުއަރިޒަމް ހަލާކުވެ ފުނޑުނަސް ވަރިހަމަކަމަށް ވިސްނުން ބަހައްޓައިގެން"
މި ބިލުގައިވާ ގޮތުން ރާއްޖޭގެ ރިސޯޓުތަކަށް އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން
އެމްޑީޕީގެ ޕީޖީ ގްރޫޕްގެ ލީޑަރ އިބްރާހިމް ނާޒިލް
ބޭރު ފައިސާއާބެހޭ ބިލް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކުރީ، ޓުއަރިޒަމް ހަލާކުވެ ފުނޑުނަސް ވަރިހަމަކަމަށް ވިސްނުން ބަހައްޓައިގެން ކަމަށް އެމްޑީޕީގެ ޕީޖީ ގްރޫޕްގެ ލީޑަރ އިބްރާހިމް ނާޒިލް ވިދާޅުވެއްޖެއެވެ.
ނާޒިލް އެފަދައިން ވިދާޅުވީ ބުރާސްފަތި ދުވަހުގެ ރޭ އެމްޑީޕީ ހަރުގެ ޖަލްސާގައި ވާހަކަދައްކަވަމުންނެވެ. ސިއްރުން ޑޮލަރު ބިލު ކޮމިޓީން ފާސް ކޮށްފަައިވާތީ ނާޒިލް ވަނީ އޭނާގެ ވާހަކައިގައި އެކަމަށް ފާޑު ވިދާޅުވެފައެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލި މި ބިލު މަޖިލީހަށް ހުށަހެޅީ ހޯމަ ދުވަހުކަމަށް ވާއިރު ބިލާއި ގުޅޭ ގޮތުން ސިނާއަތުގެ މީހުންގެ ޚިޔާލު ހޯދުމަށް ބޭއްވި ބައްދަލުވުން ވެސް ބޭއްވީ ސިއްރުން ކަމަށް އޭނާ ފާހަގަކުރެއްވިއެވެ. މި ބިލު ފުރިހަމަކުރުމަށް އެ ދާއިރާގެ ސްޓޭކް ހޯލްޑަރުން ދިން ބަސް އަޑު އަހާފައި ނުވަނީ ރައީސް ޑރ.މުހައްމަދުގެ އެންގެވުމަށް ކަމަށް ނާޒިލް ވަނީ ސިފަކުރައްވާފައެވެ. ނާޒިލް ވިދާޅުވީ އެކަން އެގޮތަށް ނިންމާފައި ވަނީ ޓުއަރިޒަމް ސިނާއަތް ފުނޑުނަސް މައްސަލަ އެއް ނެތް ކަމަށް ކޮމިޓީގެ މެމްބަރުންނަށް ސަރުކާރުގެ އެންމެ މަތީ ފަރާތުން އޯޑަރ ލިބުން ކަމަށް ޤަބޫލުކުރައްވާ ކަމަށެވެ. ރާއްޖޭގެ އިގްތިސާދުގެ އެންމެ މުހިންމު ސިނާއަތުގެ ގޮތުގައި އޮތް ފަތުރުވެރި ކަމަށް ބޮޑެތި އަސަރު ކުރާނެ ކަމަށް ބެލެވުނު ނަމަވެސް ސަރުކާރުން އެކަމަށް ސަމާލުކަން ނުދޭ ކަމަށް ނާޒިލް ވިދާޅުވިއެވެ. ނާޒިލް ވަނީ ތަޖުރިބާކާރުންގެ ބަސް ނޭހުމަކީ ސަރުކާރަށް ކަންކަން ރަނގަޅަށް ނުހިންގޭ އެއް ސަބަބު ކަމަށް ފާހަގަކުރައްވާފައެވެ.
އިނގުރައިދޫ ދާއިރާގެ މެންބަރު އިބްރާހީމް ފަލާހް ހުށަހެޅުއްވި މި ބިލުގެ ބަހުސް މަރުހަލާ ކުރިއަށް ދިޔައީ އަންގާރަ ދުވަހުގެ ޖަލްސާގައެވެ.
އަންގާރަ ދުވަހު ބިލު ބަލައިގަނެ، މާލިއްޔަތު ކޮމިޓީ އަށް ފޮނުވި ބިލު ކޮމިޓީން ބުދަ ދުވަހު ވަނީ ފާސް ކޮށްފައެވެ.
މި ބިލުގައިވާ ގޮތުން ރާއްޖޭގެ ރިސޯޓުތަކަށް އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުންނެވެ. ނުވަތަ އެ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 އިން ސައްތަ ބޭންކިން ނިޒާމުގެތެރެއިން މާރުކުރަންޖެހޭނެއެވެ. އަދި ރާއްޖޭގައި ހިންގާ ގެސްޓު ހައުސްތަކާއި، ފަތުރުވެރިކަމުގެ ސިނާޢަތުގައި ޙަރަކާތްތެރިވާ އުޅަނދުތަކާއި އެނޫންވެސް ތަންތަނަށް އަންނަ ފަތުރުވެރިއަކަށް 25 ޑޮލަރު ނުވަތަ އެތަނަކަށް މީލާދީ މަހެއްގައި ލިބޭ ބޭރު ފައިސާގެ އާމްދަނީގެ 20 އިންސައްތަ މާރުކުރަންޖެހޭނެއެވެ.
ސަރުކާރުން ހުށަހެޅި ބޭރު ފައިސާ އާ ބެހޭ ބިލުގެ މަސައްކަތް ވަރަށް އަވަސް އަރުވާލައިގެން ސަރުކާރުގެ ކޮންޓްރޯލުގެ ދަށުން ހިނގަމުން އަންނަ ރައްޔިތުންގެ މަޖިލީހުން ކުރަމުން ދާއިރު، ފުޅާ ދާއިރާ އެއްގައި ބިލަށް ޚިޔާލު ހުށަހެޅުމުގެ ފުރުސަތުވެސް ދީފައި ނުވާކަން ފާހަގަ ކުރެވެއެވެ. އަދި ކޮމިޓީ އަށް މަޓީގެ މަންދޫބުން ހާޒިރު ކުރި ނަމަވެސް މަޓީގެ ހުށަހެޅުންތަކަކަށް މާބޮޑު ފަރުވާލެއް ކޮމިޓީން ދީފައި ނުވާކަމަށް މައުލޫމާތު ލިބިފައިވެއެވެ.
