ރައީސް މުއިއްޒު ދެކެވަޑައިގަންނަވަނީ އެ މަނިކުފާނަކީ އެންމެ ބާރުގަދަ ފަރާތުގެ ގޮތުގައި ކަމަށާއި އެއީ ކުށްހީއެއް ކަމަށް މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ޕާލިމެންޓްރީ ގްރޫޕްގެ ލީޑަރ އިބްރާޙިމް ނާޒިލް ވިދާޅުވެއްޖެއެވެ.
ނާޒިލް އެފަދައިން ވިދާޅުވީ އެމްޑީޕީގެ ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. ޤާނޫނު އަސާސީ ބުނާ ގޮތުން ރައްޔިތުންނަކީ އެންމެ ބާރުގަދަ ފަރާތްކަމަށާއި އެކަން ރައީސަށް އޮޅިވަޑައިގެންފައިވާ ކަމަށް ނާޒިލް ވަނީ ވިދާޅުވެފައެވެ. ރައްޔިތުންގެ ބާރުވެރިކަން ޑިސެމްބަރ 10ގައި ރައީސަށް ފެނިވަޑައިގަންނަވާނެ ކަމަށް ނާޒިލް ވިދާޅުވިއެވެ. ޑިސެމްބަރު 10 ވަނަ ދުވަހު ޤާނޫނުއަސާސީގެ ދިފާއުގައި ބާއްވާ އެއްވުމުން އެކަން ފެންނާނެ ކަމަށް ނާޒިލް ވަނީ ވިދާޅުވެފައެވެ. އެ ދުވަހު ރައްޔިތުންގެ ބާރުވެރިކަން ފެނިގެންދާނެ ކަމަށް ނާޒިލް ވިދާޅުވިއެވެ. ނާޒިލް ވަނީ ހައްގުތައް ހޯދަން ރައްޔިތުން ނުކުތުމަށް ގޮވާލައްވާފައެވެ. އަދި ރައްޔިތުންގެ މައްޗަށް ބާރު ގަދަކޮށް ބަސް ނުބުނެވޭނެ ކަމަށް ނާޒިލް ވިދާޅުވިއެވެ.
އެ ނޫސްވެރިންގެ ބައްދަލުވުމުގައި މަޖިލީހުގެ ކުރީގެ މެމްބަރު ރާއި ވަނީ އެ އެއްވުމަށް ވީހާވެސް ގިނަ ބަޔަކު ދިއުމަށް އެދިވަޑައިގަންނަވާފައެވެ. އެ އެއްވުމަކީ ޤާނޫނާއި ޚިލާފު އެއްވުމެއް ނޫން ކަމަށާއި ބޭނުންވަނީ އާއްމުންގެ ކަންބޮޑުވުންތައް ސަރުކާރާއި ހިއްސާކުރަން ކަމަށް ރާއި ވިދާޅުވިއެވެ. ރާއި ވަނީ ސަރުކާރުން ބޭނުންހާ ގޮތަކަށް ކަންކަން ކުރާ އިރު ރައްޔިތުން ބަލަން ނުތިބޭނެ ކަމަށް ވެސް ވިދާޅުވެފައެވެ.
ޑިސެމްބަރު 10 ވަނަ ދުވަހު ޤާނޫނުއަސާސީގެ ދިފާއުގައި އެއްވުމެއް ބާއްވަނީ އިދިކޮޅު އެމްޑީޕީން އިސްނަގައިގެންނެވެ. އެ އެއްވުމަށް އާއްމުން ދިޔަ ނުދިނުމަށް ސަރުކާރުން ދަނީ އެކި ސިފަސިފައިގައި މަސައްކަތްކުރަމުންނެވެ.
