ރައްޔިތުންގެ ހައްގުގައި ދެން އެމްޑީޕީން ނުކުންނާނީ ނަސްރުގެ މައިދާނަށް: މެންބަރު ނާޒިލް
މިއީ އެމްޑީޕީން ރައްޔިތުންގެ ހައްގުގައި ނުކުތް 3 ވަނަ ފަހަރު
'ފުދިއްޖެ ފުނޑިއްޖެ' ހިނގާލުމުގެ ތެރެއިން
ރައްޔިތުންގެ ހައްގުގައި ދެން ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ން ނުކުންނާނީ ނަސްރުގެ މައިދާނަށް ކަމަށް އެޕާޓީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.
ހުކުރު ދުވަހުގެ ރޭ އެމްޑީޕީން ކުރިއަށް ގެންދިޔަ ފުދިއްޖެ-ފުނޑިއްޖެ ހިނގާލުމުގައި މެންބަރު ނާޒިލް ވިދާޅުވީ މިސަރުކާރުގައި މިއީ އެމްޑީޕީން ރައްޔިތުންގެ ހައްގުގައި ނުކުތް 3 ވަނަ ފަހަރު ކަމަށާއި، 4 ވަނަ ފަހަރަށް ނުކުންނާނީ ނަސްރުގެ މައިދާނަށް ކަމަށެވެ.
މެންބަރު ނާޒިލް ވިދާޅުވީ އެންމެ ފުރަތަމަ ސަރުކާރާ ދެކޮޅަށް އަޑު އުފުލުމަށް ނުކުތީ އާޓިފިޝަލް ބީޗަށް ކަމަށާއި، ދެވަނަ ފަހަރަށް ނުކުތީ ކާނިވާ ސަރަހައްދަށް ކަމަށެވެ. އަދި 3 ވަނަ ފަހަރަށް މަގުމައްޗަށް ނުކުތީ ރައްޔިތުންގެ އަޑު ސަރުކާރަށް ނީވޭތީވެ އެ އަޑު އިއްވުމަށް ކަމަށް މެންބަރު ނާޒިލް ވިދާޅުވިއެވެ. އަދި ވިދާޅުވީ ރައްޔިތުންގެ ހައްގުގައި އަބަދުވެސް މަސައްކަތް ކުރާނެ ކަމަށެވެ.
މެންބަރު ނާޒިލް ވަނީ ރައީސް މުއިއްޒުގެ އިސްތިއުފާ ވެސް ގޮވާލައްވާފައެވެ. އަދި ވިދާޅުވީ ރައްޔިތުންގެ ހައްގުތައް ލިބެންދެން މަސައްކަތް ކުރާނެ ކަމަށާއި، މިމަސައްކަތްތައް ކުރިއަށް އޮތްތަނުގައި ވަރުގަދަ ކުރާނެ ކަމަށެވެ.
