މި ސަރުކާރަށް ލިބޭ ކޮންމެ ފުރުސަތެއްގައި މަސައްކަތް ކުރަމުން ގެންދަނީ ލާމަރުކަޒީ ނިޒާމް ގަޑުބަޑު ކޮށްލަން: ނާޒިލް

ރައީސް ޑރ. މުހައްމަދު މުއިއްޒުގެ މި ސަރުކާރުން އަންނަނީ ލިބޭ ކޮންމެ ފުރުސަތެއްގައި ލާމަރުކަޒީ ނިޒާމު ނިކަމެތިކޮށް ގަޑުބަޑު ކޮށްލަން ކަމަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.

ނާޒިލް މިފަދައިން ވިދާޅުވީ ހޯމަ ދުވަހުގެ ރޭ އެމްޑީޕީ އޮފީހުގައި އޮތް އެ ޕާޓީގެ ކައުންސިލް އެސެމްބްލީގައި ވާހަކަދައްކަވަމުންނެވެ.

ރައީސް މުއިއްޒުގެ މި ސަރުކާރުން ކައުންސިލް ތަކާއި މެދު ކަންތައް ކުރެއްވި ގޮތަށް އަލިއަޅުއްވާލައްވަމުން ނާޒިލް ވިދާޅުވީ މި ސަރުކާރު އައިފަހުން ކައުންސިލްތަކާއި މެދު ކަންތައް ކަންތައް ކޮށްފައި ވަނީ އިހާނެތިކޮށް ކަމަށާއި އެކަމުގެ ހެއްކެއްގެ ގޮތުގައި ދާދި ފަހުން ފާސްކުރި ބަޖެޓުން އެކަން ވަރަށް ސާފުވާ ކަމަށެވެ.

ނާޒިލް ވިދާޅުވީ މި ސަރުކާރުން ފާސްކުރި ބަޖެޓުން ކައުންސިލްތަކާއި މެދު ކަންތައް ކުރަން ފެށިގޮތުން އެންމެ ބޮޑަށް އެކަމާއި ކަންބޮޑުވެގެން އެވާހަކަތައް ދެއްކީ އެމްޑީޕީން ކަމަށާއި އެގޮތުން އެކަން ރަނގަޅު ކުރުމަށް ވެސް އެންމެ ބުރަ މަސައްކަތެއް ކުރީ އެ ޕާޓީން ކަމަށެވެ.

ނާޒިލް ވިދާޅުވީ ފާސްކުރި ބަޖެޓުން ކައުންސިލްތަކަށް ލިބޭ އަދަދުތައް މަދުކުރުމުން އެކަމާއި ދެކޮޅަށް އެމްޑީޕީން ތެދުވެ އެކަން އިހު އޮތްގޮތަށް ގެނެެސްފައި ވަނީ އެމްޑީޕީގެ ކައުންސިލް މެމްބަރުންނާއި ޕާޓީގެ މެމްބަރުންގެ ވެސް ބުރަ މަސައްކަތުން ކަމަށެވެ.

ނާޒިލް ވިދާޅުވީ ފައިސާ ނެތި ކައުންސިލްތައް ނުހިންގޭނޭ ކަމަށާއި ކައުންސިލްތައް ހިންގޭނީ ފައިސާވެސް ހުރެގެން ކަމަށެވެ. އެގޮތުން ކައުންސިލްތަކަށް ފައިސާ ލިބޭނޭ ގޮތްވެސް ހަމަޖައްސައި ދިނީ އެމްޑީޕީން ކަމަށް ނާޒިލް ވިދާޅުވިއެވެ.

ކޮންމެ ފަހަރަކު، އެބޭފުޅުންނަށް ލިބޭ ހަމަ ކޮންމެ ފުރުސަތެއްގައި އެބޭފުޅުން މުޅި މި ނިޒާމް ގަޑުބަޑުކޮށްލަން ދަނީ މަސައްކަތް ކުރަމުން. މި ސަރުކާރުން އެންމެ ފުރަތަމަ ވެސް ފާހަގަކުރި އެއްކަމަކީ ކައުންސިލަރުން ލިބިފައިވާ ބަޖެޓުގެ ތެރެއިން ރާއްޖެއިން ބޭރަށް ދާ ވާހަކަ، މިބޭފުޅުންނަށް ވީ އެއީ ބޭކާރު ކަމަކަށް. ނަމަވެސް އެމްޑީޕީއަށް އެއީ ވަރަށް މުހިންމު ކަމެއް.

ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް

ނާޒިލް ވިދާޅުވީ ރަށެއްހެ ކައުންސިލަށް އައިސްފައި ތިބި ބޭފުޅުންނަކީ އެރަށެއްގެ ތަރައްޤީއައް ބޭނުންވާ އެންމެ ހާކަންތައްތައް އެނގި، އުގެނި ދަސްކުރަން ޖެހޭ ބައެއް ކަމަށެވެ. އަދި ރަށްރަށުގެ ކައުންސިލަރުންނަކީ ރަށަށް ތަރައްޤީ ގެނައުމަށް ގިނަ ކަންކަން ތަޖުރިބާވެސް ކުރަން ޖެހޭ ބައެއް ކަމަށް ވެސް އޭނާ ވިދާޅުވިއެވެ.