އަލިފާނުގެ ހާދިސާއާއި ގުޅިގެން މަޖިލީހުގެ ކުއްލި ޖަލްސާއެއް ބާއްވަން އެމްޑީޕީގެ ޕީޖީން އެދެނީ
މި ކާރިސާ ހިނގައިދިޔަ ގޮތުގެ ފުރިހަމަ ތަޙުޤީޤެއް ހިންގައިދިނުމަށް އެދި ޓޫ ފޯ ވަން ކޮމިޓީން ވެސް އެދޭނަން
އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
އަލިފާނުގެ ހާދިސާއާއި ގުޅިގެން މަޖިލީހުގެ ކުއްލި ޖަލްސާއެއް ބާއްވަން އެމްޑީޕީގެ ޕީޖީން އެދެން ނިންމައިފިއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ އަލިފާނުގެ ހާދިސާއާއި ގުޅިގެން މަަޖިލީހުގެ ތެރެއިންވެސް މަސައްކަތްތަކެއް ކުރަން ނިންމާފައިވާ ކަމަށާއި، އެގޮތުން މަޖިލީހުގެ ކުއްލި ޖަލްސާއެއް ބާވައިދެއްވުމަށް އެދި ހޯމަ ދުވަހުގެ ވަގުތެއްގައި މަޖިލިސް ރައީސަށް ސިޓީ ފޮނުވާނެ ކަމަށެވެ. އަދި އޭގެއިތުރަށް މަޖިލިސް މި މަހުގެ ފަނަރަ ވަނަ ދުވަހާ ހިސާބަށް ކުރިއަށްދާ ގޮތަށް އޮވެފައި ކުއްލި ގޮތަކަށް ބުރާސްފަތި ދުވަހު މަޖިލިސް ވެސް ޗުއްޓީއަށް ގޮސްފައިވާ ކަމަށެވެ.
ނާޒިލް ވިދާޅުވީ މިކަމާ ގުޅިގެން އިތުރަށް މަޖިލީހުގެ ތެރެއިން މި ހާދިސާއާ ގުޅިގެން ކުރެވޭނެ އެއްވެސް ކަމެއް ނެތި ދިޔަ ކަމަށާއި، އެހެންކަމުން މަޖިލިސް ޗުއްޓީގައި އޮތުމާ އެކީގައި ކުއްލި ޖަލްސާއެއް ބޭއްވުމަށް އެދި ޕީީޖީ ގްރޫއްޕުން މަޖިލީހުގެ ރައީސަށް ސިޓީ ފޮނުވާނެ ކަމަށެވެ.
ހައުސިންގް މިނިސްޓްރީ ހިންގި އިމާރާތުގައި ބުރާސްފަތި ދުވަހު ހިނގި އަލިފާނުގެ ހާދިސާގައި، އެ މިނިސްޓްރީގެ އިތުރުން، ކޮންސްޓްރަކްޝަން މިނިސްޓްރީ، އެންވަޔަރަމަންޓް މިނިސްޓްރީ، އެންވަޔަރަމަންޓަލް ޕްރޮޓެކްޝަން އެޖެންސީ އަދި މާލެ ސިޓީ ކައުންސިލްގެ ވައިޓަލް އަދި ލޭންޑް ސެކްޝަން ހިންގަމުން އައި އިމާރާތް ވަނީ ބޭނުންނުކުރެވޭ ވަރަށް ހަލާކުވެ، ދައުލަތުގެ މުހިންމު ލިޔެކިޔުންތައް ހަލާކުވެ ގެއްލި ގޮސްފައެވެ.
