އިނގިރޭސި ޕްރިމިއާ ލީގުގައި އާސެނަލްއާ ދެކޮޅަށް ކުޅުނު މެޗުން ލިވަޕޫލް އެއްވަރުވެއްޖެ އެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗު ނިމުނީ ދެ ޓީމު 2-2ން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އާސެނަލް އިންނެވެ. ނަމަވެސް ލިވަޕޫލް އިން ނަތީޖާ ހަމަހަމަ ކުރި އެވެ. އޭގެ ފަހުން ވެސް އާސެނަލް ލީޑު ހޯދި ނަމަވެސް، ފަހު ވަގުތުގެ ތެރޭގައި ލިވަޕޫލް އިން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ނުވަ ވަނަ މިނެޓުގައި ބެން ވައިޓް ތަނަވަސްކޮށްދިން ފުރުސަތެއްގައި އާސެނަލަށް ލީޑު ނަގައިދިނީ ބުކަޔޯ ސަކާ އެވެ. އޭގެ ނުވަ މިނެޓު ފަހުން ލިވަޕޫލް އިން ވަނީ ލަނޑު ޖަހައި، ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ކެޕްޓަން ވާޖިލް ވެން ޑައިކް އެވެ. އެ ލަނޑު އޭނާ ޖެހީ ލުއިސް ޑިއާޒް ތަނަވަސްކޮށްދިން ފުރުސަތެއްގަ އެވެ.

މެޗުގައި އާސެނަލް އިން ދެ ވަނަ ފަހަރަށް ލީޑު ނެގީ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށްވެފައި ވަނިކޮށް މިކޭލް މެރީނޯ ޖެހި ލަނޑުންނެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޑެކްލަން ރައިސް އެވެ. އާސެނަލްގެ ދެ ވަނަ ލަނޑާއެކު، ލިވަޕޫލް އިން ވަނީ ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފަ އެވެ. މެޗުގެ ފަހު ދިހަ މިނެޓުގެ ތެރޭގައި ލިވަޕޫލަށް ނަތީޖާ ހަމަހަމަ ކޮށްދިނީ މިޞްރުގެ ފޯވާޑު މުޙައްމަދު ޞަލާޙު އެވެ. އެ ލަނޑު ޖަހަން ޞަލާޙު އަށް ފުރުސަތު ތަނަވަސްކޮށްދިނީ ޑާވިން ނޫނޭޒް އެވެ.

މެޗުން މޮޅުވެ އަލުން އެއް ވަނަ އަށް ޖެހިލުމުގެ ފުރުސަތު ލިވަޕޫލަށް އޮތް ނަމަވެސް، އެއްވަރުވުމުން އެ ޓީމު އޮތީ ދެ ވަނައިގަ އެވެ. އެއީ މިހާތަނަށް ލީގުގައި ކުޅުނު ނުވަ މެޗުން 22 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަނައިގައި އާސެނަލަށް ލިބެނީ 19 ޕޮއިންޓެވެ. އެއް ވަނައިގައި އޮތް އެންމެ ފަހުގެ ޗެމްޕިއަން މެންޗެސްޓަރ ސިޓީ އަށް ލިބެނީ 23 ޕޮއިންޓެވެ.