ގދ. ގައްދޫ އިން ފުރައިގެން އެ އަތޮޅު ގަމަށް ދަތުރުކުރަމުން ދަނިކޮށް، މިދިޔަ ބުރާސްފަތު ދުވަހު ގެއްލުނު ގދ. ގައްދޫ, ކޯޒީރައުންޑް, ޒަކަރިއްޔާ މުޙައްމަދު, ދަތުރުކުރި ޑިންގީ ކަނޑުގެ 10 މީޓަރު އަޑިން ފެނިއްޖެއެވެ.

އެމްއެންޑިއެފުން މީޑިއާތަކަށް ހިއްސާކުރި މެސެޖުގައި ބުނީ، ކުޑަ ޑިންގީއެއްގައި އެކަނި ދަތުރުކުރަމުން ދަނިކޮށް ގެއްލުނު ޒަކަރިއްޔާ މުޙައްމަދު ހޯދުމުގެ އޮޕަރޭޝަންގައި ފުލުހުންނާއި ސިފައިން ގުޅިގެން ހޮނިހިރު ދުވަހު ހެނދުނު ކުރި ދެވަނަ ޑައިވްގައި ގދ.ގައްދޫއާއި ގަމުގެ ދެމެދުން އޮންނަ ކަނޑުއޮޅީގެ 10 މީޓަރ އަޑިން ޑިންގީ ފެނިފައިވާ ކަމަށެވެ.

ސިފައިން މީޑިއާތަކަށް ހިއްސާކުރި މެސެޖުގައި ޑިންގީ ފެނުނު ވާހަކަ ބުނި ނަމަވެސް ޒަކަރިއްޔާ ފެނުނު ކަމަކަށް ނުބުނެއެވެ.

އެމްއެންޑީއެފުން ބުނީ މި އޮޕަރޭޝަނުގައި ކަނޑުމަގުން 2307.99 އަކަ ނޯޓިކަލް މޭލު އަދި ވައިގެމަގުން 3039.68 އަކަ ނޯޓިކަލް މޭލުގެ ބޮޑު ސަރަހައްދެއް އެމްއެންޑީއެފް ކޯސްޓްގާޑުން ބަލާފައިވާ ކަމަށެވެ.

ރާއްޖެއެމްވީއަށް މައުލޫމާތު ދެއްވަމުން ގައްދޫ ކައުންސިލް މެމްބަރު އަލީ ޝަރީފު ވިދާޅުވީ ގެއްލިގެން ހޯދަމުން ދާ އުމުރުން 79 އަހަރުގެ މީހާއަކީ އަބަދުވެސް ޑިންގީގައި އެކި ބޭނުންތަކުގައި ގަމަށް ދަތުރުތައް ކޮށް އުޅޭ މީހެއް ކަމަށެވެ. އެގޮތުން އެމީހާ އެނބުރި ރަށަށް ނައިސްގެން ލަސްވެގެން ފުލުންނަށް ރިޕޯޓުކޮށްފައި ވަނީ ބުރާސްފަތި ދުވަހު ހަވީރު ކަމަށެވެ.

އަލީ ޝަރީފު ވިދާޅުވީ އެ މީހާ ދަތުރުކުރި ޑިންގީ ގަމަށް ދާން ފުރި އިރުވެސް އޭގެ އިންޖީނު މައްސަލައެއް އުޅޭކަމަށް މައުލޫމާތު ލިބިފައިވާ ކަމަށެވެ. އަދި އެމީހާ ގަމަށް ދިއުމަށް ފުރަން ވެގެން ޑިންގީ ސްޓާޓު ނުވެގެން އުޅުނު ކަމަށާއި އެ ޑިންގީގެ ސްޓާޓު ކުރީވެސް ވެސް އެހެން މީހެއްގެ އެހީތެރިކަމާއި އެކުގައި ކަަމަށެވެ.

މައުލޫމާތު ލިބިފައިވާ ގޮތުން އެންމެ ފަހުން ޒަކަރިއްޔާ ލައިގެން ހުރީ ކަޅުކުލައިގެ ސޯޓަކާއި ނޫކުލައިގެ ޓީޝާޓެކެވެ.

އަދި ޒަކަރިއްޔާއާ ބެހޭ އެއްވެސް މައުލޫމާތެއް ލިބިލައްވާނަމަ، 7791755 ނުވަތަ 7211233 އަށް ގުޅުއްވުމަށް އެ ކައުންސިލުން ވަނީ އެދިފައެވެ.