އިނގިރޭސި ޕްރިމިއާ ލީގުގައި ލިވަޕޫލާ ދެކޮޅަށް ކުޅޭ މެޗުގައި، އެ ޓީމާ މެދު ވަރަށް ބޮޑަށް ސަމާލުވާަން ޖެހޭނެ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ އާސެނަލްގެ އަމިއްލަ ދަނޑުގައި ލިވަޕޫލާ ދެކޮޅަށް އެ ޓީމުން ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗަށް ނިކުންނައިރު އާސެނަލް އޮތީ ލީގު ތާވަލްގެ ތިން ވަނައިގަ އެވެ. މި ސީޒަންގެ ކުރިން، އޯގަސްޓު މަހުގެ ތެރޭގައި އާސެނަލް އިން ވަނީ ލިވަޕޫލްގެ ދަނޑުގައި އެ ޓީމާ ދެކޮޅަށް ކުޅެފަ އެވެ. އެ މެޗު ކާމިޔާބު ކުރީ ލިވަޕޫލް އިންނެވެ.

އާޓެޓާ ބުނީ، ފާއިތުވި ނުވަ އަހަރު ދުވަހަށް ބަލާއިރު ލިވަޕޫލް ވަނީ އެންމެ މަތީ ފަންތީގެ މުބާރާތްތަކުގައި ވާދަކޮށްފައި ކަމަށެވެ. އަދި ލިވަޕޫލް އިން ވަނީ އެ ޓީމުގެ ފެންވަރާއި، އެ ޓީމަށް ކަންކަން ކުރެވޭނެ މިންވަރު ވެސް ދައްކައިދީފައި ކަމަށް އާޓެޓާ ބުންޏެވެ. އެހެންކަމުން އަދި ވެސް ލިވަޕޫލް އޮތީ އެގޮތުގައި ކަމަށާއި، ވާދަވެރި މެޗުތަކަށް އެ ޓީމު ފަރިތަވާނެ ކަމަށް ވެސް އާޓެޓާ ބުންޏެވެ.

މީގެ އިތުރުން އާޓެޓާ ބުނީ ކޮންމެ ވަގުތެއްގައި ވެސް އިދިކޮޅު ޓީމަށް ގެއްލުން ދޭން ލިވަޕޫލަށް އިނގޭނެ ކަމަށެވެ. ޚާއްސަކޮށް އެ ޓީމުގައި ތިބި ވަކި ވަކި ކުޅުންތެރިންނަށް ބަލާއިރު، އެ ކުޅުންތެރިންނަކީ އެކަން ކުރެވޭނެ ފެންވަރުގެ ކުޅުންތެރިންގެ ގޮތުގައި އާޓެޓާ ވަނީ ފާހަގަ ކޮށްފަ އެވެ. ނުވަ އަހަރުގެ ތެރޭގައި ލިވަޕޫލް އިން ދައްކާފައި ކުޅުމާއި، ހޯދާފައިވާ ކާމިޔާބަކީ އެކަމުގެ ހެއްކެއް ކަމަށް ވެސް އާޓެޓާ ބުންޏެވެ.

އާސެނަލް ޓީމާ ގުޅޭ ގޮތުން ވާހަކަ ދައްކަމުން އާޓެޓާ ބުނީ ލީގުގައި އެންމެ ފަހުން ބޯންމައުތާ ދެކޮޅަށް ކުޅުނު މެޗުން އާސެނަލް ބަލިވި ނަމަވެސް، އެ މެޗު އާސެނަލް އިން ފެށީ ރަނގަޅަށް ކަމަށް ޤަބޫލު ކުރެވޭ ކަމަށެވެ. ވަކި ހިސާބަކުން އެއް ކުޅުންތެރިޔަކު މަދުކޮށް ކުޅެން ޖެހުނު ކަމަށާއި، އެ މެޗުން ވީ ބައްްޔާއެކު ހިތްވަރާ އެކު ތެދުވާން އާސެނަލަށް މަޖުބޫރު ކަމަށް ވެސް އޭނާ ބުންޏެވެ. އާޓެޓާ ބުނީ އެކަން ފޫބައްދާލުމަށް އާސެނަލަށް ލިބޭ އެންމެ ބޮޑު ފުރުސަތަކީ އަމިއްލަ ދަނޑުގައި ލިވަޕޫލާ ދެކޮޅަށް ކުޅޭ މެޗު ކަމަށާއި، އެ މެޗަށް ކެތްމަދުވެފައި ހުރި ކަމަށެވެ.

އޭނާ ބުނި އަބަދު ވެސް އާސެނަލްގެ އެމިރޭޓްސް ސްޓޭޑިއަމްގައި އެކަހަލަ ވާދަވެރި އަދި ފޯރިގަދަ މެޗުތަކަށް އިންތިޒާރު ކުރެވޭ ކަމަށެވެ. ޚާއްސަކޮށް އާސެނަލްގެ ސަޕޯޓަރުންގެ ރޫހާއި، ކުޅުންތެރިން ކުރަމުން އަންނަ މަސައްކަތާ އެކު، އެ މެޗުން ނަތީޖާ ނެރުމަށް ބޭނުންވެފައި ހުރިކަން އާޓެޓާ ފާހަގަ ކުރި އެވެެ. އާސެނަލް އާއި ލިވަޕޫލް ވާދަކުރާ މެޗު ފަށާނީ އާދިއްތަ ދުވަހުގެ ރޭ ރާއްޖެ ގަޑިން ރޭގަނޑު 21:30 ގައެވެ.