އިޒްރޭލުން އީރާނަށް ހަމަލާ ދީފި
މިއީ އީރާނުން ދިން ހަމަލާގެ ބަދަލު ހިފުމުގެ ގޮތުން އިޒްރޭލުން ދިން ހަމަލާއެއް ކަމަށް އިޒްރޭލުން ބުނޭ
އީރާނުގެ ދިފާއީ ރޮކެޓް ނިޒާމުގެ މަންޒަރެއް - އީރާނުން ބުނަނީ އިޒްރޭލުގެ ހަމަލާތައް އެގައުމުގެ ދިފާއީ ނިޒާމުން މަތަކުރި ކަމަށް
އިޒްރޭލުން ހޮނިހިރު ދުވަހު ހެނދުނު އީރާނުގެ އަސްކަރީ މަރުކަޒުތަކަށް ހަމަލާދީފިއެވެ.
މިއީ އީރާނުން އިޒްރޭލަށް ދިން ރޮކެޓް ހަމަލާގެ ބަދަލު ހިފުމުގެ ގޮތުން ދިން ހަމަލާ އެއް ކަމަށް އިޒްރޭލުން ބުނެފައިވެއެވެ.
އީރާނުގެ ސިފައިންވަނީ އިޒްރޭލުގެ ހަމަލާތައް އެގައުމުގެ އީލާމް، ޚުޒެސްތާން އަދި ވެރި ރަށް ތެހެރާން ގައި ހުރި އަސްކަރީ މަރުކަޒުތަކަށް އަމާޒުކުރެވުނު ކަމަށާއި، އޭގެ ސަބަބުން "ކޮންމެވެސް ވަރެއްގެ" ގެއްލުންތަކެއް ލިބުނުކަން ކަށަވަރުކޮށްދީފައެވެ.
އީރާނުން ބަދަލު ހިފުމުގެ ގޮތުން އިތުރު ހަމަލާތަކެއް ދީފިނަމަ، އިޒްރޭލުގެ ސިފައިންނަށް "ޖަވާބުދާރީވާން މަޖުބޫރުވާނެ" ކަމަށް ބުނެ އިޒްރޭލުން ވަނީ އިންޒާރު ދީފައެވެ.
"އިސްލާމިކް ރިޕަބްލިކްގެ އޮފިޝަލުން ކުރިން ދީފައިވާ އިންޒާރުތަކާ ބެލުމެއް ނެތި، ޖަރީމާތައް ހިންގާ ޣައިރު ޤާނޫނީ ޒަޔަނިސްޓް ވެރިކަމުގެ ފަރާތުން ނުރައްކާތެރި ޢަމަލުތަކުން ދުރުހެލިވުމަށް އެންގުމުންވެސް، މި ފޭކު ވެރިކަމުން މިއަދު ހެނދުނު ތެހުރާން، ޚުޒެސްތާން އަދި އިލާމް ޕްރޮވިންސްގެ އަސްކަރީ މަރުކަޒުތަކުގެ ބައިތަކަކަށް ހަލަބޮލިކަން އުފެދޭފަދަ ޢަމަލެއް ހިންގައިފިއެވެ،" ހޮނިހިރު ދުވަހުގެ ހެނދުނު އީރާނުގެ އެއަރ ޑިފެންސް ފޯސްއިން ނެރުނު ބަޔާނެއްގައި ބުނެފައިވެއެވެ.
ޤައުމުގެ އިންޓަގްރޭޓެޑް ވައިގެ ދިފާއީ ނިޒާމުން މި އުދުވާނީ ޢަމަލު ކާމިޔާބުކަމާއެކު ހުއްޓުވައި، އެއަށް ރައްދު ދީފައިވާކަމަށް އެ ބަޔާނުގައި ބުނެފައިވެއެވެ.
މީގެ ކުރިން، ސަލާމަތީ ވަސީލަތްތަކުން ބުނެފައިވަނީ ތެހުރާންގެ ވަށައިގެންވާ ސަރަޙައްދުތަކުގައި ދިރިއުޅޭ ބައެއް މީހުންނަށް އިވުނު ބާރު އަޑުތަކަކީ އެއަރ ޑިފެންސް ސިސްޓަމްތައް އެކްޓިވޭޓްވުމުގެ ސަބަބުން އިވުނު އަޑުތަކެއް ކަމަށެވެ.
އީރާނުގެ ރަސްމީ އައި.އާރް.އެން.އޭ ނިއުސް އެޖެންސީން ހޮނިހިރު ދުވަހުގެ ހެނދުނު ސަލާމަތީ މަސްދަރަކާ ޙަވާލާދީ ބުނެފައިވަނީ ވެރިރަށުގައި އިވުނު ބައެއް އަޑުތަކަކީ "ތެހުރާންގައި ހިންގި ދިފާޢީ ޙަރަކާތްތަކުގެ" ސަބަބުން އިވުނު އަޑުތަކެއް ކަމަށެވެ.
އެ ނިއުސް އެޖެންސީން ބުނެފައިވަނީ އެހީތެރިކަން ބޭނުންވާ އެއްވެސް ހާދިސާއެއްގެ ރިޕޯޓެއް ލިބިފައިނުވާ ކަމަށާއި، މެހްރާބާދް އިންޓަނޭޝަނަލް އެއަރޕޯޓާއި އިމާމް ޚުމައިނީ އިންޓަނޭޝަނަލް އެއަރޕޯޓު "އާންމު" ހާލަތުގައި އޮތް ކަމަށެވެ.
އައި.އާރް.އެން.އޭ އިން ބުނެފައިވަނީ އީރާނުގެ އެއަރ ޑިފެންސްތަކުން "ތެހުރާން ޕްރޮވިންސްގެ ވައިގެ ސަރަޙައްދުގައި ދުޝްމަނުންގެ ހަމަލާތައް ކާމިޔާބުކަމާއެކު ވައްޓާލައިފައިވާ" ކަމަށެވެ.
އޮންލައިންކޮށް ޙިއްސާކުރެވުނު ފުޓޭޖްތަކުގައި ފެނިފައިވަނީ އީރާނުގެ ވެރިރަށުގެ މަތީގައި ހިންގި އިންޓަރސެޕްޝަންތަކެއް ކަމަށް ބެލެވޭ މަންޒަރުތަކެއް ކަމަށް އީރާނުގެ ޕްރެސް ޓީވީން ބުނެއެވެ.
އީރާނަށް ވައިގެ މަގުން ކުރާ ހުރިހާ ދަތުރުތަކެއް ވަނީ ކެންސަލް ކުރެވިފއެވެ.
ތަސްނިމް ނިއުސް އޭޖެންސީން ބުނެފައިވަނީ، އިރާނަށް ދިން ހަމަލާގެ ބަދަލު ހިފުމުގެ ހައްގު އީރާނަށް ލިބިގެންވާ ކަމަށް އީރާނުން ދެކޭ ކަމުގައެވެ.
ހަމަލާތަކަށް ފަހުވެސް ތެހެރާންގެ އާންމު ހާލަތު ރަނގަޅު ކަމަށް އީރާނުގެ މީޑިއާ ރިޕޯޓްތައް ބުނެފައިވެއެވެ.
އިޒްރޭލުން އީރާނަށް ހޮނިހިރު ދުވަހުގެ ފަތިހު ދިން ހަމަލާ އާ ބެހޭ ގޮތުން އެ ގައުމުގެ އަސްކަރިއްޔާ އިން ބުނެފައިވަނީ އީރާނަނަށް އެމީހުން ދިން ޙަމަލާ ފުރިހަމަ ކުރެވިފައިވާ ކަމަށެވެ. އެ ގޮތުން އީރާނުގެ މިސައިލް އުފައްދާ ތަންތަނާއި، ބިމުން-ވައިގެތެރެއަށް ދޫކުރާ މިސައިލްތަކަށާއި އަދި އެހެނިހެން އީރާނުގެ ވައިގެ ގާބިލްކަން ހުރި ތަންތަނަށް ޙަމަލާދީފައިވާ ކަމަށް ބުނެފައިވެއެވެ. އިޒްރޭލުގެ ސިފައިން ބުނެފައިވަނީ އެމީހުންގެ މަޤްޞަދުތައް ޙާޞިލުވެފައިވާ ކަމަށެވެ.
"އިންޓެލިޖެންސް މަޢުލޫމާތުގެ މައްޗަށް ބިނާކޮށް، އައިއޭއެފް (ވައިގެ ބާރު) ގެ މަތިންދާބޯޓުތަކުން ވޭތުވެދިޔަ އަހަރެއްހާ ދުވަހުގެ ތެރޭގާއި އިޒްރޭލަށް އީރާނުން ފޮނުވާލި މިސައިލްތައް އުފެއްދި ތަންތަނަށް ޙަމަލާދީފައިވާނެ،" ކަމަށް އިޒްރޭލު ސިފައިންގެ ބަޔާނުގައި ބުނެފައިވެއެވެ.
"އެއާއެކު، ބިމުން-ވައިއަށް ދޫކުރާ މިސައިލްތަކާއި އީރާނުގެ އިތުރު ވައިގެ އަސްކަރީ ވަސީލަތްތަކަށް އައިޑީއެފް އިން ޙަމަލާދީފައިވާނެ،" ކަމަށް އިޒްރޭލު ސިފައިން ބުނެފައިވެއެވެ. އަދި "ބަދަލުހިފުމުގެ ޙަމަލާ ނިމި، މިޝަން ފުރިހަމަވެފައިވާ،" ކަމަށްވެސް ބުނެފައިވެއެވެ.
މި އޮޕަރޭޝަން ނިމި، ހުރިހާ މަތިންދާބޯޓުތަކެއް "ރައްކާތެރިކަމާއެކު އަނބުރާ އައިސްފައިވާ" ކަމަށްވެސް އިޒްރޭލުގެ ބަޔާނުގައި ބުނެފައިވެއެވެ.
