ރަޝިޔާއިން އުތުރު ކޮރެއާގެ ސިފައިން ބޭނުންކުރުމަށް ނިންމުމަކީ ރަޝިޔާގެ ކަމެއް ކަމަށާއި، ޔުކްރެއިން ނޭޓޯ ގައި ބައިވެރިވާން ބޭނުންވާނަމަ ރަޝިޔާއަށް ވެސް އެ ގައުމުގެ ސަލާމަތާއި ރައްކާތެރިކަން ކަށަވަރުކުރުމަށް ބޭނުންވާ ކަމެއް ކުރެވިދާނެ ކަމަށް ރައީސް ވުލެޑިމިއަރ ޕޫޓިން ހުކުރު ދުވަހު ވިދާޅުވެއްޖެއެވެ.
އެމެރިކާ އިން މިދިޔަ ބުދަ ދުވަހު ބުނެފައިވަނީ އުތުރު ކޮރެއާގެ 3،000 ސިފައިން ރަޝިޔާއަށް ފޮނުވާފައިވާކަމުގެ ހެކި ލިބިފައިވާ ކަމަށާއި، މިއީ ޔުކްރެއިންގެ ހަނގުރާމައިގައި ބޭނުންކުރުމަށް ކަމަށް ބެލެވޭ ކަމަށެވެ. ހުޅަނގުގެ ގައުމުތަކުން މިކަން ދެކެނީ ޔުކްރެއިންގެ ހަނގުރާމަ އިތުރަށް ގޯސްވެގެން ދިއުމުގެ ކަމެއްގެ ގޮތުގައެވެ.
ޔުކްރެއިންގެ މިލިޓަރީ އިންޓެލިޖެންސް ސަރވިސްއިން ބުނެފައިވަނީ ރަޝިޔާގައި ތަމްރީނު ކުރެވުނު އުތުރު ކޮރެއާގެ ފުރަތަމަ ޔުނިޓްތައް ކާސްކް ސަރަޙައްދުގައި ރުކުރުވާލެވިފައިވާ ކަމަށެވެ. މިއީ އޯގަސްޓް މަހު ޔުކްރެއިންގެ ބާރުތަކުން މި ސަރަޙައްދުގެ ބައެއް އަތުލާފައިވާ ރަޝިޔާގެ ބޯޑަރު ސަރަޙައްދެކެވެ.
"އަޅުގަނޑުމެން ކަމެއް ނިންމަން ޖެހޭ ހިނދު، އަޅުގަނޑުމެން ނިންމާނަން... އެކަމަކު އެއީ އަޅުގަނޑުމެންގެ ސިޔާދަތީ ނިންމުމެއް، އަޅުގަނޑުމެން އެކަން ތަންފީޒުކުރާނީތޯ، ނުކުރާނީތޯ، އަޅުގަނޑުމެންނަށް އެކަން ބޭނުންވޭތޯ،" ޕުޓިން ރަޝިޔާގެ ދައުލަތުގެ ޓީވީގައި ވިދާޅުވިއެވެ. "މިއީ އަޅުގަނޑުމެންގެ ކަމެއް."
ޕުޓިން ވިދާޅުވީ ހުޅަނގުގެ ޤައުމުތަކުން ތަކުރާރުކޮށް ބުނަމުންދަނީ ޔުކްރެއިންގެ ސަލާމަތާއި ރައްކާތެރިކަން ކަށަވަރުކުރާނެ ގޮތަކީ ޔުކްރެއިންގެ އަމިއްލަ ކަމެއް ކަމަށެވެ - "ނޭޓޯއާ އެކު ތޯ ނުވަތަ ނޭޓޯ ނުލައިތޯ." ޕުޓިން ފާހަގަ ކުރެއްވިއެވެ.
ޕުޓިން އާއި އުތުރު ކޮރެއާގެ ލީޑަރު ކިމް ޖޮންގް އުން ވަނީ ޖޫން މަހު ޕުޓިން ޕިޔޮންގްޔަންގް އަށް ކުރެއްވި ދަތުރުފުޅުގައި ފުޅާ ދާއިރާއެއްގެ ސްޓްރެޓީޖިކް ޕާޓްނަރޝިޕް އެއްބަސްވުމެއްގައި ސޮއިކުރައްވާފައެވެ.
މި އެއްބަސްވުމުގެ 4 ވަނަ މާއްދާގައި ބުނެފައިވަނީ: "އެއްވެސް ޤައުމަކުން ނުވަތަ ގިނަ ޤައުމުތަކުން އެއްފަރާތަކަށް ހަތިޔާރު ބޭނުންކޮށްގެން ހަމަލާދީފިނަމަ އަދި އޭގެ ސަބަބުން އެފަރާތަކަށް ހަނގުރާމައިގެ ޙާލަތެއްގައި މެދުވެރިވެއްޖެނަމަ، އަނެއް ފަރާތުން ވަގުތުން އެފަރާތުގެ އަތުގައިވާ ހުރިހާ ވަސީލަތްތަކެއް ބޭނުންކޮށްގެން ސިފައިންނާ އަދި އެހެނިހެން އެހީތެރިކަން ފޯރުކޮށްދޭންވާނެއެވެ."
އުތުރު ކޮރެއާއިން ރަޝިޔާއަށް ސިފައިން ފޮނުވާފައިވާ ކަމަށް އެމެރިކާއިން ކުރި ތުހުމަތު ޕުޓިންގެ ވާހަކަފުޅުގައި ދޮގެއް ނުކުރައްވައެވެ. ނަމަވެސް އެމަނިކުފާނު ވިދާޅުވީ ޕިޔޮންގްޔަންގްއާއެކު އޮތް ދިފާޢީ އެއްބަސްވުން ތަންފީޒް ކުރާނެ ގޮތަކީ މޮސްކޯގެ ކަމެއް ކަމަށެވެ.
އުތުރު ކޮރެއާއިން ހުކުރު ދުވަހު ބުނެފައިވަނީ، ރަޝިއާއަށް އެ ގައުމުގެ ސިފައިން ފޮނުވާފައިވާނަމަ އެކަން ކޮށްފައިވާނީ ބައިނަލްއަޤްވާމީ ޤާނޫނާ އެއްގޮތަށް ކަމަށެވެ.
އުތުރު ކޮރެއާ އިން ރަޝިޔާ އަށް ސިފައިން ފޮނުވި ކަމަށް ސީދާ ބުނެފައެއް ނުވެއެވެ.
ކޮރެއާގެ ރަސްމީ ސެންޓްރަލް ނިއުސް އޭޖެންސީ އިން ބުނެފައިވާ ގޮތުގައި، ރަޝިޔާ އާ ބެހޭ ޑެޕިއުޓީ ފޮރިން މިނިސްޓަރ ކިމް ޖޯންގް ގިޔު ވިދާޅުވެފައިވަނީ، "ދުނިޔޭގެ މީޑިއާތަކުން ދައްކާ ވާހަކަ އެއީ ތެދުކަމަށްވާނަމަ، އެއީ ބައިނަލްއަޤްވާމީ ޤާނޫނުގެ ގަވާއިދުތަކާ އެއްގޮތަށް ކުރެވިފައިވާ ކަމެއް،" ކަމުގައެވެ.
