ޤައުމީ ފިރިހެން ވޮލީ ޓީމާ ޖާޒީ ހަވާލުކޮށްފި
އުޒްބަކިސްތާނުގައި މި މަހުގެ 18 ވަނަ ދުވަހުން ފެށިގެން 24 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ރާއްޖޭގެ އިތުރުން ފަސް ޤައުމެއް ވާދަކުރާނެ އެވެ.
ޤައުމީ ފިރިހެން ޓީމާ ޖާޒީ ހަވާލު ކުރުމުގެ ތެރެއިން
މި މަހު އޮންނަ ކާވާ ވޮލީބޯޅަ ޗެމްޕިއަންޝިޕްގައި ވާދަކުރާ ރާއްޖޭގެ ސީނިއާ ފިރިހެން ވޮލީބޯޅަ ޓީމާ ޖާޒީ ހަވާލުކޮށްފި އެވެ.
ހުޅުމާާލޭ ސިންތެޓިކް ޓްރެކުގައި ބުދަ ދުވަހު އޮތް ޚާއްސަ ރަސްމިއްޔާތެއްގައި ވޮލީ ޓީމާ ޖާޒީ ހަވާލުކޮށްދެއްވީ ކުޅިވަރާއި ހަށިހެޔޮ ކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ) އަދި ކޮމިޝަނަރ އޮފް ސްޕޯޓްސް މުޙައްމަދު ޠަލާލް އެވެ. މި ރަސްމިއްޔާތުގައި ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުޙައްމަދު ލަތީފް އަދި އިސްވެރިން ވަނީ ބައިވެރިވެފަ އެވެ.
އުޒްބަކިސްތާނުގައި މި މަހުގެ 18 ވަނަ ދުވަހުން ފެށިގެން 24 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ރާއްޖޭގެ އިތުރުން ފަސް ޤައުމެއް ވާދަކުރާނެ އެވެ. އެއީ ތުރުކެމިނިސްތާން، ތަޖަކިސްތާން، ނޭޕާލް، އަފްޣާނިސްތާން، މުބާރާތް ބާއްވާ ޤައުމު އުޒްބަކިސްތާން އަދި ދިވެހިރާއްޖެ އެވެ.
މުބާރާތަށް ރާއްޖެ އިން އެކުލަވާލި ސްކޮޑުގައި ހިމެނޭ ކުޅުންތެރިންނަކީ، އަލީ އާމިރު، މުޙައްމަދު އަޙުސަން، އަލީ ނިމާލް، ޙުސެއިން ޝާހިދު، އާދަމް ފައިރޫޒް، މުޙައްމަދު ނައީމް، އިޝާން މުޙައްމަދު، އިސްމާއީލް ސާޖިދު، ޙުސެއިން ރަޒާން، ޙަސަން ނިލާމް، އާދަމް ނަސީމް، އަޙުމަދު ނާފިއު، ޝަމާއީލް ޙުސެއިން އަދި އަޙުމަދު މުޒްލިފް އެވެ.
މި މުބާރާތުގައި ރާއްޖޭގެ ޓީމަށް އިރުޝާދު ދޭނީ މުޙައްމަދު ޝަރަފް އެވެ. އޭނާގެ އެސިސްޓެންޓު ކޯޗެއްގެ ގޮތުގައި މަސައްކަތް ކުރާނީ ޢަބްދުﷲ ޖުނައިދު އެވެ. އަދި ޓްރެއިނަރުގެ ގޮތުގައި މަސައްކަތް ކުރާނީ އަޙުމަދު ޢަބްދުލް ކަރީމް (ލޯންގޭ) އެވެ.
