ބެލިސްޓިކް މިސައިލްތައް ހުއްޓުވުމަށް ބޭނުންކުރާ އެމެރިކާގެ ވަރަށް ފުންނާބު އުސް މިސައިލް ދިފާއީ ނިޒާމެއް ކަމުގައިވާ ޓާމިނަލް ހައި އޮލްޓިޓިއުޑް އޭރިއާ ޑިފެންސް (ތާޑް) މިސައިލްތައް މިހާރު އިޒްރޭލުގައި ބެހެއްޓިއްޖެކަމަށް އެމެރިކާގެ ދިފާއީ ވަޒީރު ލޮއިޑް އޮސްޓިން ވިދާޅުވެއްޖެއެވެ.

ހޯމަ ދުވަހު ޔުކްރެއިނަށް ވަޑައިގަތުމުގެ ކުރިން ނޫސްވެރިންނާ ވާހަކަދައްކަވަމުން އޮސްޓިން ވިދާޅުވީ، "ތާޑް ސިސްޓަމް ވަނީ ބެހެއްޓިފައި" ކަމަށެވެ.

އެ ނިޒާމު އޮޕަރޭޓްކުރަން ފަށާފައިވޭތޯ ނޫސްވެރިން ސުވާލުކުރުމުން އޮސްޓިން ވިދާޅުވެފައިވަނީ "މި ނިޒާމުތައް އަދި އޮޕަރޭޓްކުރަން ފަށާފައިނުވާ ކަމަށާއި، ވަރަށް އަވަހަށް އޮޕަރޭޓް ކުރުވޭނެ،" ކަމަށެވެ. އަދި އުއްމީދުކުރާ ގޮތަށް ކަންކަން ދަނީ ކުރިއަށް،" ކަމަށެވެ.

އިޒްރޭލުގައި ތާޑް މިސައިލް ބެހެއްޓުމާ ގުޅޭގޮތުން އެމެރިކާގެ ރައީސް ޖޯ ބައިޑްން ވިދާޅުވި ގޮތުގައި "ތާޑް މިސައިލްގެ އިތުރުން ސަތޭކަ އެމެރިކާ ސިފައިން އިޒްރޭލަށް ފޮނުވުމުގެ މަޤްޞަދަކީ އިޒްރޭލް ދިފާއުކުރުން،" ކަަމަށެވެ.

ފާއިތުވި ހަފްތާގައި ނޫސްވެރިންގެ ސުވާލުތަކަށް ޖަވާބުދެއްވަމުން ބައިޑްން ވިދާޅުވީ "އިޒްރޭލުން އީރާނަށް ހަމަލާދޭނެ ގޮތާއި ވަގުތު ރަނގަޅަށް އެނގިވަޑައިގަންނަވާ،" ކަމަށެވެ. ބައިޑްން އިތުރަށް ވިދާޅުވީ، "މި ދެ ޤައުމުގެ ދެމެދުގައި ބަދަލުކުރެވޭ ހަމަލާތައް ހުއްޓުވުމަށް ފުރުޞަތެއް ފެނިވަޑައިގެންފައިވާ،" ކަމަށެވެ.

ތާޑް އަކީ ރާޑަރާއި އިންޓަރސެޕްޓަރތައް ބޭނުންކޮށްގެން ކުރު، މެދު އަދި ދުރު ރާސްތާ ބެލިސްޓިކް މިސައިލްތައް ހުއްޓުވުމަށް ބޭނުންކުރާ ޒަމާނީ މިސައިލް ދިފާއީ ނިޒާމެކެވެ. މި ނިޒާމުގެ މިސައިލްތަކުގެ ރޭންޖަކީ 150ން 200 ކިލޯމީޓަރު (93 - 124 މޭލު) އެވެ.

ތަޖުރިބާކާރުން ބުނާ ގޮތުގައި ތާޑް ބެޓަރީއެއްގެ އަގަކީ 1 ބިލިއަން ޑޮލަރާއި 1.8 ބިލިއަން ޑޮލަރާ ދެމެދުގެ އަގެކެވެ.