ހިޒްބުﷲއަށް ފައިނޭންސް ކުރާކަމަށް ބުނެ، އިޒްރޭލުން ބެއިރޫތުގެ މާލީ އިދާރާތަކަށް ވެސް ބޮން އަޅަނީ

ހިޒްބުﷲ އަށް ފައިސާ ހޯދައިދޭކަމަށް ތުހުމަތުކޮށް، އާދީއްތަ ދުވަހުގެ ރޭ އިޒްރޭލުން ލުބުނާނުގެ ވެރިރަށް ބެއިރޫތުގައި ހުރި ޖަމްޢިއްޔާއެއްގެ އިދާރާތަކަކަށް ބޮން އަޅައިފިއެވެ.

ލުބުނާނުގެ ސަރުކާރުގެ މީޑިއާ ކަމުގައިވާ ނޭޝަނަލް ނިއުސް އޭޖެންސީ (އެން.އެން.އޭ) އިން ރިޕޯޓުކުރި ގޮތުގައި، އިޒްރޭލުން ބެއިރޫތުގެ ދެކުނު ފަރާތުގެ 11 ސަރަހައްދަކަށް ބޮން އަޅާފައިވާ ކަމަށާއި، މީގެ ތެރެއިން ގިނަ ހަމަލާތައް އަމާޒުކޮށްފައިވަނީ އަލް-ޤަރްދު އަލް-ހަސަން އަށެވެ. ހަމައެއާއެކު، ލުބުނާނުގެ އިރުމަތީގައި އޮންނަ ބެކާ ވެލީ އާއި ޤައުމުގެ ދެކުނު ސަރަޙައްދުގައި ހުރި ޖަމްޢިއްޔާގެ ގޮފިތަކުގެ އިދާރާތަކުގެ އިތުރުން ބެއިރޫތުގެ ވައިގެ ބަނދަރާ ކައިރިއަށްވެސް ހަމަލާ ދީފައިވާކަމަށް އެން.އެން.އޭ އިން ބުނެފައިވެއެވެ.

އާދިއްތަ ދުވަހު އިޒްރޭލުގެ ދިފާއީ ވަޒީރު ޔޯވް ގަލަންޓް ވިދާޅުވެފައިވަނީ، ހިޒްބުއްލާއަށް ދެމުންދާ ހަމަލާތައް އިތުރުކުރަމުންދާ ކަމަށާއި، އިޒްރޭލަށް ހަމަލާދިނުމަށް ހިޒްބުﷲއިން ރާވާފައިވާ ތަންތަން ނައްތާލަމުންދާ ކަމަށެވެ. އަދި އަލް-ޤަރްދު އަލް-ހަސަންގެ އޮފީސްތަކަށް ހަމަލާދޭން އުޅޭ ކަމަށް އިންޒާރުދީ، އޭނާވަނީ އެ ތަންތަނުން ދުރަށް ދިއުމަށް ރައްޔިތުންނަށް ގޮވާލާފައެވެ. އެން.އެން.އޭ އިން ބުނާ ގޮތުގައި، މީގެ ކުޑައިރުކޮޅެއް ފަހުން ވަނީ ހަމަލާތައް ދޭން ފަށާފައެވެ.

މި ހަމަލާތަކާ ގުޅިގެން ހިޒްބުﷲއިން ބުނެފައިވަނީ އިޒްރޭލުގެ ހަރމެސް 450 ޑްރޯނެއް އާދީއްތަ ދުވަހު ވައްޓާލާފައިވާ އަދި އިޒްރޭލުގެ ސިފައިންނަށް އަމާޒުކޮށް އެޖަމާއަތުން ހަމަލާތަކެއް ދީފައިވާކަމަށެވެ.

އަނެއްކޮޅުން، ދެކުނު ލުބުނާނުގައި ހުރި އދ.ގެ ސުލްޙަ ދަމަހައްޓާ މިޝަނުން ބުނެފައިވަނީ އިޒްރޭލު ސިފައިން "ގަސްތުގައި" އެމީހުންގެ ޕޯސްޓަކަށް އަމާޒުކޮށް ހަމަލާދީފައިވާ ކަމަށެވެ.

ޣައްޒާގައި 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލުން ދިން ހަމަލާތަކުގައި މަދުވެގެން 42،065 މީހުން މަރުވެ، 97،886 މީހުން ވަނީ ޒަޚަމްވެފައިވެއެވެ.