އިޒްރޭލު ޕާސްޕޯޓު މަނާ ކުރުމުގެ ބިލު: މުޅި މަޖިލީހުގެ މެމްބަރުންގެ ބޮލުގައި އެޅުވުމަށް ދަނީ މަސައްކަތް ކުރަމުން
މި ބިލު ކޮމެޓީގައި ޕާކުވެފައި އޮތްއޮތުމަކީ މުޅި ދިވެހިރާއްޖޭގެ ހުރިހާ ރައްޔިތުން ކަންބޮޑުވާ ބޮޑު މައްސަލައެއް
އެމްޑީޕީގެ ޕާލިމަންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގެ ތެރެއިން
އިޒްރޭލު ޕާސްޕޯޓު މަނާ ކުރުމުގެ ބިލު ލަސްވާ ސަބަބު މުޅި މަޖިލީހުގެ މެންބަރުންގެ ބޮލުގައި އެޅުވުމަށް މިސަރުކާރުން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، އެ ބިލުގެ މަސައްކަތްތައް އަވަސް ކުރުމަށް ކުރަންޖެހޭ ހުރިހާ މަސައްކަތެއް ކުރާނެ ކަމަށް އެމްޑީޕީގެ ޕާލިމަންޓްރީ ގްރޫޕުން ބުނެފިއެވެ.
ހޯމަ ދުވަހު ރައްޔިތުންގެ މަޖިލިސް ކައިރީގައި ބޭއްވި ނޫސްވެރިންގެ ބައްދަލުވުމުގައި ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވީ އިޒްރޭލް ޕާސްޕޯޓު މަނާކުރުމުގެ ބިލު ލަސްވާ މައްސަލައާ ގުޅިގެން ހޯމަ ދުވަހުގެ މަޖިލިސް ޖަލްސާއަށް ކުއްލި މައްސަލައެއް ހުށަހެޅި ކަމަށާއި، ނަމަވެސް އެ މައްސަލަ ބޭރުކޮށްލާފައިވާ ކަމަށެވެ.
މި ބިލަށް ގިނަ ދުވަސްތަކެއް ވެފައިވާކަން ފާހަގަކުރައްވައި މެމްބަރު މައުރޫފް ވިދާޅުވީ މި ބިލު ކޮމެޓީގައި ޕާކުވެފައި އޮތްއޮތުމަކީ މުޅި ދިވެހިރާއްޖޭގެ ހުރިހާ ރައްޔިތުން ކަންބޮޑުވާ ބޮޑު މައްސަލައެއް ކަމަށެވެ.
މީގެ އިތުރުން މެމްބަރު މައުރޫފް ވިދާޅުވީ އިޒްރާއީލުގެ ޕާސްޕޯޓު ބޭން ކުރުމުގެ މައްސަލަ ވަކި ގޮތަކަށް ނިންމިފައިނުވަނީ މަޖިލީހުން އެކަމަށް ގޮތެއް ނިންމާފައިނުވާތީއާއި، މަޖިލީހުގެ ހުރިހާ މެންބަރުންނަށް ތުހުމަތުވާ ގޮތަށް އެޓަރނީ ޖެނެރަލް އަހުމަދު އުޝާމް ވާހަކަދައްކަވާފައިވާ ކަމަށެވެ. އަދި މި ސަރުކާރުން އިޒްރޭލްގެ ޕާސްޕޯޓު ބޭން ކޮށްފައިވާކަމަށް ބުނެ ބޭރުގެ މީޑިއާތަކަށް މައުލޫމާތު ދީފައިވާ ކަމަށާއި، ހަގީގަތް އޮޅުވާލުމަށް މިސަރުކާރުން މަސައްކަތް ކުރާ ކަމަށް މެންބަރު މައުރޫފް ވިދާޅުވިއެވެ.
މިމައްސަލައާ ގުޅިގެން އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވީ މި ބިލުގެ މަސައްކަތް އަވަސް ކުރުމަށް މަޖިލިސް ތެރެއިން ކުރެވެން އޮތީ ކޮންކަމެއްތޯ ބަލައި ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވީ އިޒްރޭލު ޕާސްޕޯޓް މަނާ ކުރުމުގެ މައްސަލަ އަވަސް ކުރަން ޕީޕަލްސް ނެޝަނަލް ކޮންގްރެސް (ޕީއެންސީ) ގޮވާލީ ރައްޔިތުންނަށް މަލާމާތް ކުރުމަށް ކަމަށެވެ. އެ މަސައްކަތް ކުރުމުގެ ރަނގަޅު ނިޔަތެއް ނެތް ކަމަށް މެންބަރު މީކާއީލް ވިދާޅުވިއެވެ.
މެންބަރު މީކާއީލް ވިދާޅުވީ އިޒްރޭލްގެ ޕާސްޕޯޓު މަނާ ކުރުމުގެ މައްސަލައިގައި ސުޕަ މެޖޯރިޓީ އޮތް ޕީއެންސީން ދޭނެ ޖަވާބެއް ނެތް ކަމަށެވެ. އިޒްރޭލްގެ ޕާސްޕޯޓު ބޭންކުރާ މައްސަލަ ލަސްވަމުންދާތީ ގިނަ ބައެއްގެ ފާޑު ކިޔުން ވެސް ސަރުކާރަށް ވަނީ އަމާޒުވެފައެވެ.
