މަސްތުގެ ހާލަތުގައި މަގުމަތީގައި އުޅޭ މީހުންނާއި، މަސްތުވާތަކެތި ބޭނުންކޮށް މަގުމަތީގައި ސަލާން ޖަހަން އުޅޭ މީހުން ޑްރަގް އޮފެންޑާ ރިމާންޑް ސެންޓަރުތަކަށް ގެންދިއުމުގެ ޚާއްސަ އޮޕަރޭޝަނެއް ފަށައިފިއެވެ.

މި އޮޕަރޭޝަން ކުރިއަށް ގެންދަނީ ނެޝަނަލް ޑްރަގް އެޖެންސީ (އެންޑީއޭ) ފުލުހުންގެ ޚިދުމަތުން ގުޅިގެންނެވެ.

އާދިއްތަ ދުވަހުގެ ހަވީރު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ނެޝަނަލް ޑްރަގް އެޖެންސީގެ ބޯޑުގެ ޗެއާމަން އަދި ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރު ލުބްނާ މުހައްމަދު ޒާހިރު ހުސައިން ވިދާޅުވީ މަސްތުވާތަކެއްޗާއި ބެހޭ ގާނޫނުގެ ދަށުން ޑްރަގް އޮފެންޑަރ ރިމާންޑް ސެންޓަރުތަކެއް ގާއިމްކުރެވިފައިވާ ކަމަށެވެ. އެގޮތުން ކ.ހިންމަފުށި، އަދި ހުޅުމާލެ ސެންޓަރު ލުބްނާ ފާހަގަކުރެއްވިއެވެ.

ލުބްނާ ވިދާޅުވީ ހިންމަފުއްޓަށް މީހުން ބަދަލު ކުރަން ފެށީ ޖުލައި މަހުގެ ތެރޭގައި ކަމަށާއި، ހުޅުމާލެ ސެންޓަރު މިހާރު ވަރަށް ފަހުން އޮޕަރޭޓް ކުރަން ފަށާފައިވާ ކަމަށެވެ. އަދި ވިދާޅުވީ މި ސެންޓަރުތަކުގައި މަސްތުވާތަކެތި ނަގާ މީހުންނާއި، އޭގެ ވިޔަފާރި ކުރާ މީހުން ކުށުގެ ވެށިން ނެގުމާއި ގުޅިގެން އެ މީހުންނަށް ބޭނުންވާ ފަރުވާ ދޭނެ އިންތިޒާމް ހަމަޖެހިފައިވާ ކަމަށެވެ.

މީގެ އިތުރުން ލުބްނާ ވިދާޅުވީ މިދިޔަ މުއްދަތުގައި މަސްތުވާތަކެތި ނަގާ މީހުންނާއި ގުޅޭ ގޮތުން އާއްމުންގެ ފަރާތުންނާއި ބެލެނިވެރިންގެ ފަރާތުން ކޯލްތައް ވަރަށް ގިނައިން ލިބޭ ކަމަށާއި، އެތަންތަނަށް ވަރަށް ބޮޑަށް އެޓެންޑް ކުރެވިފައިވާ ކަމަށެވެ.

މަސްތުވާތަކެތި ބޭނުންކުރާ މީހުން ޑްރަގް އޮފެންޑާ ރިމާންޑް ސެންޓަރުތަކަށް ގެންދިއުމުގެ އޮޕަރޭޝަންއާ ގުޅޭގޮތުން ޑްރަން އެންފޯސްމެންޓްގެ ހެޑް ސުޕްރިޓެންޑެންޓް އޮފް ޕޮލިސް ނާހިދު ވިދާޅުވީ، މި އޮޕަރޭޝަންގެ ދަށުން މަސްތުވާތަކެއްޗާއި ބެހޭ ގާނޫނުގެ 103 ވަނަ މާއްދާގެ ދަށުން ބަންދު ކޮށްގެން ޑްރަގް އޮފެންޑަރ ރިމާންޑް ސެންޓަރަށް ގެންދާނެ ކަމަށާއި، 9 އޮކްޓޫބަރު 2024 ވަނަ ދުވަހުން ފެށިގެން މިހާތަނަށް 14 މީހުން ރިމާންޑް ސެންޓަރަށް ގެންގޮސްފައިވާ ކަމަށެވެ.

މި މަސައްކަތުގެ ދަށުން ކުރިއަށް އޮތްތަނުގައި ރައްޔިތުންނަށް މަގުމަތިން ހެޔޮ ބަދަލުތައް ފެންނާނެ ކަމަށް ނާހިދު ވިދާޅުވިއެވެ.

މަސްތުވާތަކެތި ބޭނުންކުރާ މީހުން މުޖުތަމައުއަށް ނެރުމަށް ކުރަމުންދާ މަސައްކަތްތަކާއި ގުޅޭގޮތުން އެންޑީއޭގެ ސީއީއޯ މުހައްމަދު ރާޝިދު ވިދާޅުވީ މިހާރު ފަރުވާ ހޯދަން އަންނަ ގިނަ މީހުންނަކީ ނަފްސާނީ ބަލިމަޑުކަމެއްގެ ތެރެއަށް ވެއްޓިފައި ތިބި މީހުންކަން ފާހަގަކުރެވޭ ކަމަށާއި، މިއީ ކަންބޮޑުވާ މައްސަލައެއް ކަމަށެވެ. އެއީ ބޭނުންކުރެވޭ މަސްތުވާތަކެތީގެ ސަބަބުން އަންނަ ނަފްސާނީ ބަލި މަޑުކަމެއްކަން ފާހަގަކުރައްވައި ރާޝިދު ވިދާޅުވީ މިމައްސަލަ ވަރަށް ގިނަ މީހުންގެ ފަރާތުން ފާހަގަކުރެވިފައިވާ ކަމަށެވެ. ރާޝިދު ވިދާޅުވީ ރާއްޖޭގައި ފަރުވާ ދިނުމުގެ ނިޒާމު ބައްޓަން ކުރެވިފައި އޮތީ މަސްތުން ސާފުކޮށް އެމީހުން މުޖުތަމައުއަށް ރީ އިންޓަގްރޭޓް ކުރުމަށް ކަމަށެވެ. ނަމަވެސް މިހާރު އަސާސީ މަސައްކަތެއްގެ ގޮތުގައި ފުރަތަމަ އެމީހަކަށް ނަފްސާނީ ގޮތުން ފަރުވާ ދޭންޖެހޭ ކަމަށް އޭނާ ވިދާޅުވިއެވެ.

މިހާރު ދިމާވާ ގޮންޖެހުންތަކަށް އިޝާރާތް ކުރައްވައި ރާޝިދު ވިދާޅުވީ ފަރުވާ ދޭނެ މީހުންނާއި، އެހީތެރިކަން ފޯރުކޮށްދޭން ތިބި ތަޖުރިބާ ހުރި މީހުން މަދު ކަމަށެވެ. ނަމަވެސް ބޭރުގެ ރިސޯސްތަކާއި، އެހެނިހެން ގޮތްގޮތުން ވެސް ޚިދުމަތް ފުޅާކޮށް، ސައިކޯ ސޯޝަލް ޕްރޮގްރާމްތައް ކުރިއަށް ގެންދަން މަސައްކަތް ކުރާމުންދާ ކަމަށް އޭނާ ވިދާޅުވިއެވެ.

ރާޝިދު ވިދާޅުވީ އެންޑީއޭގެ ފަރުވާގެ ތެރޭގައި ތަފާތު 10 ސެންޓަރެއްގައި 1500 މީހުން ފަރުވާ ނަގަމުންދާ ކަމަށެވެ. އޭގެ ތެރޭގައި ސެންޓަރުގައި ތިބެގެން ފަރުވާ ނަގާ މީހުންނާއި، މުޖުތަމައުގެ ތެރޭގައި ފަރުވާ ނަގާ މީހުން އަދި ބޭސް ދެވިގެން ފަރުވާ ނަގާ މީހުން ހިމެނޭ ކަމަށް އޭނާ ވިދާޅުވިއެވެ.