ވައްކަން ކުރަނިކޮށް އަތުލައިގަތުމުން ބުނީ ޓިނު ރަނގަޅަކުރަނީ ކަމަށް
20 އޮކްޓޯބަރު 2024 | އާދީއްތަ 07:34ކުށުގެ ތުހުމަތުގައި 24 ފަހަރު ހައްޔަރުކޮށްފައިވޭ
ކްރިމިނަލް ކޯޓުގެ ބޭރުން ނަގާފައިވާ ފޮޓޯ އެއް
ވައްކަން ކުރަނިކޮށް އަތުލައިގަތް މީހަކު، އޭނާ ވައްކަން ކުރަނީ ނޫން ކަަމަށާއި، ޓިނު ރަނގަޅުކުރަން އުޅުނު ކަމަށް ބުނެފިއެވެ.
ވައްކަން ކުރަން އުޅުނުކަަމުގެ ތުހުމަތުގައި ހައްޔަރުކޮށް ބަންދުގެ މުއްދަތު ޖަހާފައިވަނީ ހއ. ހޯރަފުށީ، ބަގީޗާގެ، އަލީ ވިސާމް (39އ) އެވެ. މި މައްސަލައާއި ގުޅިގެން އޭނާ ބަންދުކޮށްފައިވަނީ 15 ދުވަހަށް ކަސްޓޯޑިއަލް ޖަލެއްގައެވެ.
ބަންދުގައި ބެހެއްޓުމަށް އަމުރުކުރި ސަބަބެއްގެ ގޮތުގައި ބުނެފައިވަނީ ކުށްކުރިކަމަށް ތުހުމަތު ކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށެވެ. އެގޮތުން ސީނަށް ދިޔަ ފުލުހުންގެ ހާދިސާ ރިޕޯޓާއި ކުށުގެ ރެކޯޑް ހިމެނެއެވެ.
އަދި މީނާ ބަންދުން ދޫކޮށްލައިފިނަމަ މުޖްތަމައުގެ ސަލާމަތާއި ރައްކާތެރިކަމަށް ނުރައްކަލެއް ކުރިިމަތިވެދާނެކަމަށް ބެލެވޭތީ ބަންދުގައި ބަހައްޓަންޖެހޭ ހާލަތު އޮތްކަމަށް ދެކޭކަމަށް އަމުރުގައި ބުނެފައިވެއެވެ.
ހައްޔަރުކުރި ވިސާމަކީ ކުށުގެ ރެކޯޑް އޮތް ފަރާތެކެވެ. އެގޮތުން ކުށުގެ ތުހުމަތުގައި 24 ފަހަރު ހައްޔަރުކޮށްފައިވެއެވެ. އޭގެ ތެރެއިން 15 ފަހަރު ބަންދަށް ބަދަލުކޮށްފައިވާކަން އޭނާގެ ހައްޔަރު/ބަންދު ލޮގުން އެނގެއެވެ.
ވައްކަންކުރި މައްސަލައާއި ގުޅިގެން ފުލުހުން ބުނެފައިވަނީ ވައްކަން ކުރަން ވަތް މީހަކު ހިފަހައްޓައިގެން އުޅޭކަމަށް ޓޯކީން ގޮވައި މައުލޫމާތު ދިނުމުން ސީނަށް ގޮސް މައުލޫމާތު ސާފުކުރުމުން އެތަނުގައި ތިބި މީހުން، އަލީ ވިސާމްއާ ސުވާލުކުރުމުން ކައިރި ޖެހިގެން އިން ގޭގެ ފުރާޅު ޓިނު ރަނގަޅު ކުރަން އުޅުނު ކަމަށް ބުނެފައިވާ ކަމަށެވެ. އަދި ފުލުހުން އޭނާއާއި ސުވާލުކުރުމުން އެނާގެ ފޯނު ފުރާޅު މައްޗަށް ވެއްޓިގެން އެރީކަމަށް އޭނާ ބުނެފައިވެއެވެ.
