ޑިމޮކްރެޓްސް އަކީ އިދިކޮޅު ސިޔާސީ ޕާޓީއެއް، މިސަރުކާރާއި ބައްދަލުކުރީ ވަޒީފާ ހޯދާކަށް ނޫން: ހަސަން ލަތީފް
ޑިމޮކްރެޓްސްގެ ސިޔާސަތުތަކެއް ވަނީ އެކުލަވާލާފައި، މަސައްކަތް ކުރަމުންދާނީ އެސިޔާސަތުތަކާ އެއްގޮތަށް
ހޮނިހިރު ދުވަހުގެ ފަށާއިރު ޕްރޮގްރާމްގައި ދަ ޑިމޮކްރެޓްސް ރައީސް ހަސަން ލަތީފް ވާހަކަދައްކަވަނީ
ދަ ޑިމޮކްރެޓްސް އަކީ އިދިކޮޅު ސިޔާސީ ޕާޓީއެއް ކަމަށާއި، މިސަރުކާރާއި ބައްދަލުކުރީ ވަޒީފާ ހޯދަން ނޫން ކަމަށް އެޕާޓީގެ ރައީސް ހަސަން ލަތީފް ވިދާޅުވެއްޖެއެވެ.
ހޮނިހިރު ދުވަހުގެ ފަށާއިރު ޕްރޮގްރާމްގައި ހަސަން ލަތީފް ވިދާޅުވީ ސަރުކާރާއެކު ޕާޓީއެއް ނޯންނަ ކަމަށްވާނަމަ އެޕާޓީއަކީ އިދިކޮޅު ޕާޓީއެއް ކަމަށާއި، ދޭތެރޭގެ މެދުގައި އެއްވެސް ޕާޓީއަކަށް ނޯވެވޭނެ ކަމަށެވެ. އެގޮތުން ޑިމޮކްރެޓްސް އަކީ އިދިކޮޅު ސިޔާސީ ޕާޓީއެއް ކަމަށް އޭނާ ވިދާޅުވިއެވެ.
ހަސަން ލަތީފް ވިދާޅުވީ ޑިމޮކްރެޓްސްގެ ސިޔާސަތުގެ އެކުލަވާލާފައިވާ ކަމަށާއި، މަސައްކަތް ކުރަމުންދާނީ އެސިޔާސަތުތަކާ އެއްގޮތަށް ކަމަށެވެ. އެސިޔާސަތުތައް ތަންފީޒު ކުރުމުގެ ގޮތުން ހުރިހާ ސިޔާސީ ޕާޓީތަކާއެކު މަޝްވަރާކުރިކަން ފާހަގަކުރައްވައި ހަސަން ލަތީފް ވިދާޅުވީ 2023 ވަނަ އަހަރު ޕީޕީއެމްއާއެކު ވެސް ރަސްމީ މަޝްވަރާތައް ކުރިއަށް ގެންދިޔަ ކަމަށެވެ. ނަމަވެސް ބައެއް ސިޔާސަތުތަކަށް ފުށޫއަރާތީ އިތުރަށް ކުރިއަށް ނުގެންދިޔައީ ކަމަށް ހަސަން ލަތީފް ވިދާޅުވިއެވެ.
ރައީސް މުއިއްޒުގެ ސަރުކާރުގެ ބޭފުޅުންނާއި ބައްދަލުކުރައްވައި ކުރެއްވި މަޝްވަރާތަކަށް އަލިއަޅުއްވާލައްވާ ހަސަން ލަތީފް ވިދާޅުވީ އެބޭފުޅުންނާ ބައްދަލުކުރީ ވަޒީފާ ހޯދުމަށް ނޫން ކަމަށެވެ. އަދި ބޭނުންވަނީ ޕާޓީގެ ސިޔާސަތުތައް ތަންފީޒު ކުރެވޭނެ ގޮތްތަކަކަށް މަސައްކަތް ކުރަން ކަމަށާއި، އެފުރުސަތު ފަހިކޮށްދިނުމަށް އެދުނު ކަމަށް ހަސަން ލަތީފް ވިދާޅުވިއެވެ. ނަމަވެސް މިސަރުކާރަށް އެސިޔާސަތުތައް ތަންފީޒު ކުރުމަށް ފުރިހަމަ އެއްބާރުލުންދީފައިނުވާތީ އެކުގައި ކުރިއަށް ނުދިޔައީ ކަމަށް އޭނާ ވިދާޅުވިއެވެ.
ހަސަން ލަތީފް ވިދާޅުވީ ޑިމޮކްރެޓްސްއިން ނިންމުންތައް ނިންމަވަނީ ވަރަށް ދުވަހު އެކަމަށް މަސައްކަތް ކުރުމަށްފަހު ކަމަށާއި، ވަރަށް ގިނަ މަޝްވަރާތަކާއެކު ކަމަށެވެ. އެ ނިންމުމެއްގައި ވަރަށް ގިނަ ސަބަބުތަކެއްވާނެ ކަމަށް ހަސަން ލަތީފް ވިދާޅުވިއެވެ. އަދި ވިދާޅުވީ ކުރިއަށް އޮތްތަނުގައި ވެސް ޕާޓީ މަސައްކަތް ކުރާނީ އެރޫހާއެކު ކަމަށެވެ.
