މިއަދުގެ ހަގީގަތަކީ އެމީހުންގެ ތެރޭގައިވެސް ކަންކަން ގޮސްފައި އޮތީ އެއްބަޔަކު އަނެއްބަޔަކަށް ދޮގު ހެދުމާއި އޮޅުވާލުން
ކުރީގެ ނައިބުރައީސް ޑރ. މުހައްމަދު ޖަމީލް އަހުމަދު
ރައީސް ޑރ. މުހައްމަދު މުއިއްޒު ނަގާވަރަށްވުރެ އަދުރޭ ނަގާ މިންވަރު އިތުރު ކަމަށާއި، ޕީޕީއެމް އުވާލާއިރު އާހިރުގައި މުއިއްޒު އަތުގައި ޕާޓީވެސް ނޯންނާނެ ކަމަށް ކުރީގެ ނައިބުރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޕީއެންއެފް ފްރަންޓް އޮފީސް ޖަލްސާގައި ވާހަކަ ދައްކަވަމުން ޖަމީލް ވިދާޅުވީ މިހާ ހިސާބަށް އާދެވުނު އިރު، ރައީސް މުއިއްޒުއާއި މި ސަރުކާރުން ދޮގު ހެދީ ޕީޕީއެމްގެ އާންމު މެންބަރުންނަށް އެކަންޏެއް ނޫން ކަމަށެވެ. އަދި މިއަދުގެ ހަގީގަތަކީ އެމީހުންގެ ތެރޭގައިވެސް ކަންކަން ގޮސްފައި އޮތީ އެއްބަޔަކު އަނެއްބަޔަކަށް ދޮގު ހެދުމާއި އޮޅުވާލުން ކަމަށް ޖަމީލް ވިދާޅުވިއެވެ.
ޖަމީލް ވިދާޅުވީ މަޖިލީހުގެ ރައީސް އަބްދުއްރަހީމުގެ މުއްސަނދިކަން ރައީސް މުއިއްޒުއަށްވުރެ ކުޑައެއް ނޫން ކަމަށެވެ. އަދި އަބްދުއްރަހީމް 'ކަލެކްޓް' ކުރާ މިންވަރު މުއިއްޒުއަށްވުރެ މަދުކަމަކަށް ގަބޫލެއް ނުކުރައްވާ ކަމަށެވެ.
މުއިއްޒު ޕީޕީއެމް އުވާލަން ނުވަތަ ބާތިލްކޮށްލަން ނުވަތަ ޕީޕީއެމްގެ ޖަނާޒާ ބާއްވަން މަސައްކަތްކޮށް ނިމޭއިރުގައި މުއިއްޒު އަމިއްލަ ޖަނާޒާގައި ގޮސް ބައިވެރިވާނެ ކަމަށް ޖަމީލް ވިދާޅުވިއެވެ.
ޖަލްސާގައި ވާހަކަ ދައްކަަވަމުން ހުސައިން ވަހިދު ވިދާޅުވީ މި ސަރުކާރުގެ މަތިބަރު ކަމަށާއި، ސިޔާސީ މަގާމް ދީފައި ތިބި މީހުންނަކީ މި ސަރުކާރަށް ބަލަދު އަރާފައި ތިބި މީހުން ކަމަށެވެ. ހުސައިން ވަހީދު ވިދާޅުވީ 228 ސިޔާސީ މަގާމް އުވާލަން ނިންމި ކަމަށް ރައީސް މުއިއްޒު ހާމަކުރެއްވުމަކީ އެމަނިކުފާނުގެ ވަރަށް ބޮޑު ވެއްޓުމެއް ކަމަށެވެ.
ހުސައިން ވަހީދު ވިދާޅުވީ އަމިއްލައަށް ދެކެވޭ ވާހަތަކާއެކު މަޑުމަޑުން ދުވަހުން ދުވަހަށް އަންނަނީ ޔޫޓާން ނަގާގޮތަށް ބަދަލުވަމުން ކަމަށެވެ. އެއީ 228 މަގާމު ނަގާފައި ހުއްޓަސް އެއީ މި ސަރުކާރަށް ބޭނުން ބައެއް ނޫން ކަމަށް މި ސަރުކާރުން ދައްކާ އެމީހުން މަގުމަތިކޮށްލަން މި ސަރުކާރުން ނިންމީ ކަމަށް ހުސައިން ވަހީދު ވިދާޅުވިއެވެ.
