ޔޫޓީއެފްގައި މިލިޓަރީބޭސް އަޅާ، ޗައިނާއަށް ދިން ރަށް އަތުލައި ހަނިމާދޫ އެއަރޕޯޓް 99 އަހަރަށް އިންޑިއާ ބަޔަކަށް ދޭން މި ސަރުކާރުން އެއްބަސްވެފައިވޭ - ފައްޔާޒު

ޔޫޓީއެފްގައި މިލިޓަރީބޭސް އަޅާ، ޗައިނާއަށްދިން ރަށް އަތުލައި ހަނިމާދޫ އެއަރޕޯޓް 99 އަހަރަށް އިންޑިއާ ބަޔަކަށް ދޭން މި ސަރުކާރުން އެއްބަސްވެފައިވާ ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.

އެމްޑީޕީގެ ހަވަރު ބެރު ޕެނަލް ޑިސްކަޝަންގައި ވާހަކަ ދައްކަވަމުން ފައްޔާޒު ވިދާޅުވީ މި ސަރުކާރުން އެއްވެސް ކަމެއް ނެތި އިންޑިއާއާއި ޖެހިގަނެ މިއަދު އިންޑިއާއަށް ދިއުމުން، އިސްތިގުލާލާއި މިނިވަން ކަމަށް ދޫނުދީ އާދެވޭނެކަމަށް ގަބޫލެއް ނުކުރައްވާ ކަމަށެވެ. އަދި ޔޫޓީއެފްގައި މިލިޓަރީ ބޭސްވެސް އަޅާނެ ކަމަށާއި، ޗައިނާ ކުންފުންޏަކަށް ދީފައި އޮތް ރަށްވެސް ނަގާނެ ކަމަށާއި، ހަނިމާދޫވެސް 99 އަހަރަށް އިންޑިއާ ބަޔަކަށް ދޫކޮށްލަން އެބަސްވެފައިވާ ކަމަށެވެ.

Advertisement

ފައްޔާޒު ވިދާޅުވީ ރައީސް ޑރ. މުހައްމަދު މުއިއްޒު އިންތިހާބުގެ ތެރޭގައި ވިދާޅުވީ ހުރިހާކަމެއް ވެސް އެނގިވަޑައިގަންނަވާ ކަމަށާއި، ކަންކަން އެނގިވަޑައިނުގަންނަވަނީ ރައީސް އިބްރާހިމް މުހައްމަދު ޞާލިހަށް ކަމަށެވެ. މެނޭޖްކުރާކަން ނޭނގޭ ކަމަށް މި ސަރުކާރުން ބުނި ނަމަވެސް، އެމްޑީޕީން ބޮޑު އާލަމީ ވަބާއެއްގެ ތެރޭގައި ރާއްޖެ ބަންދުވެފައި އޮއްވާ ކަންކަން މެނޭޖްކޮށް، އެއްވެސް ރައްޔިތަކު ބަނޑަށް ނުޖައްސާ ގައުމު ހިންގި ކަމަށާއި، ކަންކަން ކުރީ ރައްޔިތުންނަށް ތަކުލީފު ނުވާނެ ގޮތަށް ކަމަށެވެ.

ފައްޔާޒު ވިދާޅުވީ ބޭކާރު ގޮތުގައި އިންޑިއާއާއި ޖެހިގަތުމުން، މުޅި ދުނިޔޭގައި އެކި ގޮތްގޮތުން އެހީތެރިވާން ތިބި ފަރާތްތަކާއި، ލޯނާއި، އިންވެސްޓްކުރަން ތިބި މީހުން ރާއްޖެއާއި ދުރަށް ޖެހުނު ކަމަށެވެ.

ފައްޔާޒު ވިދާޅުވީ ކަންކަން ކުރުމުގައި ވިސްނުންތެރިކަމާއި، ބައިނަލްއަގުވާމީ ގުޅުންތައް މެނޭޖްކުރަންޖެހޭ ކަމަށެވެ. ނަމަވެސް އިންޑިއާ އާއި ޖެހިގަނެ ބައިނަލްއަގުވާމީ ދުނިޔެއިން ރާއްޖެ އެކަހެރިވި ކަމަށެވެ. ސަބަބަކީ މި ސަރުކާރުން ޖިއޯ ޕޮލިޓިކްސް ނޭނގުން ކަމަށާއި، މިފަދަ އެތައްކަމެއްގެ ތެރެއިން ގެއްލުން ލިބުނީ ދިވެހި ރާއްޖެއަށާއި، ދިވެހިންނަށް ކަމަށެވެ.