އިޒްރޭލުން އީރާނުގެ ތެލުގެ މަރުކަޒުތަކަށް ހަމަލާދީފާނެ - އެކަމުގެ ސަބަބުން ދުނިޔެއަށް ބޮޑު މުސީބާތެއް ކުރިމަތިވެދާނެ

އިޒްރޭލާއި އީރާނާ ދެމެދު އޮތް ހަނގުރާމައިގެ ނުތަނަވަސްކަން ދުވަހެއް ދުވަހަކަށް އިތުރުވަމުން އަންނަ އިރު ބެލިސްޓިކް މިސައިލްތަކުގެ ވަރުގަދަ ހަނގުރާމައެއް ފެށިދާނެ ކަމުގެ ބިރު އެބައޮތް ކަމަށް ބައެއް ތަޖުރިބާކާރުން އަންނަނީ ބުނަމުންނެވެ.

އިޒްރޭލުން ހަމަލާގެ ރޭވުންތައް ގެންދަނީ އިންތިހާއަށް ސިއްރިއްޔާތުގައި ކަމަށްވުމާއެކު، މިހަމަލާތައް ފެށޭނީ އަދި ހިނގަމުންދާނީ ކިހިނެއްކަމެއް ކަނޑައެޅިގެން ބުނަން ނޭނގޭ ކަމަށްވެސް ތަޖުރިބާކާރުން އަންނަނީ ބުނަމުންނެވެ.

މައްސަލައާ ގުޅޭ ގޮތުން ބައިނަލް އަގްވާމީ މީޑިއާ ގައި އެކި ގޮތްގޮތައް ވާހަކަ ދެކެވެމުންދާއިރު އެނގޭ އެއްޗަކީ އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ އޮކްޓޯބަރު 1 ގައި އީރާނުން ދިން ވަރުގަދަ ރޮކެޓް ހަމަލާގެ ރައްދު ދޭނެ ގޮތެއް ވިސްނަމުން ގެންދާ ކަމެވެ.

އެހެން ނަމަވެސް އެ ޕްލޭން ވަނީ ސިއްރުކުރެވިފައެވެ. އާދީއްތަ ދުވަހު ނަތަންޔާހޫ ދެއްވި ވީޑިއޯ މެސެޖެއްގައި އޭނާގެ ވަޒީރުންނަށް ދެއްވި މެސެޖަކީ "ބަސް މަދުކޮށް އަމަލު ގިނަކުރުމަށެވެ."

އެމެރިކާގެ ނިއުސް ވެބްސައިޓް އެންބީސީ ނިއުސްއަށް ލިބިފައިވާ މަޢުލޫމާތުތަކަށް ބިނާކޮށް ހާމަކޮށްފައިވާ ގޮތުގައި އިޒްރޭލުން ފޯކަސްކުރަނީ އީރާނުގެ ޢަސްކަރީ އަދި ހަކަތައިގެ އިންފްރާސްޓްރަކްޗަރަށް ހަމަލާ ދިނުމަށެވެ.

މީޑިއާ ރިޕޯޓްތައް ބުނާ ގޮތުގައި އީރާނުގެ ނިއުކްލިއަރ ހަތިޔާރުގެ ޕްރޮގްރާމަށް އިޒްރޭލުން ހަމަލާ ދީފާނެ ކަމަށް މިހާރަކު ނުބެލެއެވެ. އެކަމާ އިޒްރޭލުގެ އެންމެ ގާތް މަދަދުވެރިޔާ އެމެރިކާ އިން ވަނީ އެއްބަސްނުވެފައި ކަމަށް ބައެއް ރިޕޯޓްތަކުގައި ވަނީ ފާހަގަ ކޮށްފައެވެ.

އަނެއްކޮޅުން އީރާނުގެ ތެލުގެ ވަސީލަތްތަކަށް ހަމަލާ ދިނުމަކީ އޭގެ އަސަރު މެދުއިރުމަތީގެ ސަރަޙައްދުން ބޭރަށް ފުޅާވެ، ދުނިޔޭގެ ގިނަ ކަންކޮޅުތަކަށް އިޤްތިޞާދީ އަދި ސިޔާސީ އަސަރު ކުރާނެ ނުރައްކާތެރި ކަމެއްގެ ގޮތުގައި އެނަލިސްޓުން ފާހަގަ ކުރެއެވެ.

އީރާނުން އިންޒާރުދީފައިވަނީ އީރާނަށް އެފަދަ ހަމަލާއެއް ދީފިނަމަ އޭގެ ރައްދެއްގެ ގޮތުން ގަލްފް ސަރަޙައްދުގެ އެމިރޭޓްސްގެ ތެލުގެ މަރުކަޒުތަކަށް ހަމަލާދޭނެ ކަމަށެވެ. މިހެން މިކަން ވެއްޖެނަމަ ތެލުގެ އަގު އެއްފަހަރާ ބޮޑުތަނުން މައްޗަށް ދިއުމަކީ އެކަށީގެންވާ ކަމެކެވެ. މިއީ ޝައްކެއްވެސް ނެތް ގޮތުގައި ދުނިޔޭގެ އިޤްތިޞާދަށް ބޮޑު ލޮޅުމެއް އަންނާނެ ވަރަށް ނުރައްކާތެރި ކަމަކަށް ވެދާނެ ކަމެކެވެ.

އިޒްރޭލުން ކަންކުރާ ގޮތަކުން އީރާނުގެ ތެލުގެ މަރުކަޒުތަކަށް ގެއްލުން ލިބި އަދި އީރާނުން އެކަމާ ގުޅުވާ އެހެން މަރުކަޒުތަކަށް ހަމަލާދީ އެމެރިކާގެ ރިޔާސީ އިންތިޚާބުގެ ކުރިން ޕެޓްރޯލް އަގު ބޮޑުތަނުން މައްޗަށް ދިއުމަކީ އެކަށީގެންވާ ކަމެކެވެ. މިކަމުގެ ސަބަބުން ޑޮނަލްޑް ޓްރަމްޕް އަނެއްކާވެސް ރައީސްކަމަށް އިންތިޚާބުވުމުގެ ފުރުޞަތު ބޮޑުވެދާނެ ކަމަށްވެސް އެނަލިސްޓުން ދެކެއެވެ. މިއީ ނަތަންޔާހޫ އެދޭނެ ކަމެއް ކަމަށްވެސް ބައެއް ފަރާތްތަކުން ދެކެއެވެ.

މިވަގުތު މައްސަލައިގައި ކަންވާނެ ގޮތް ހީއެއްގެ މައްޗަށް ނޫންގޮތަކަށް ބެލެވޭކަށް ނެތެވެ. އިޒްރޭލުން އީރާނަށް ހަމަލާދޭނީ ކިހިނެއް ކޮން އިރަކު ކަމެއް ނޭގެއެވެ.

ބައެއް ފަރާތްތަކުން ބުނާ ގޮތުގައި އިޒްރޭލުން އީރާނުގެ ތެރޭގައި ސިއްރު ހަމަލާއެއް ދިނުމަކީވެސް އެކަށީގެންވާކަމެކެވެ. އިޒްރޭލުން އީރާނުގެ ތެރޭގައި ފުން އިންޓެލިޖެންސް އެސެޓްތަކެއް ޤާއިމުކޮށްފައިވާ ކަމަށް ވަރަށް ބޮޑަށް ވަނީ ތުހުމަތު ކުރެވިފައެވެ. އެހެންކަމުން އީރާނުގެ އިންފްރާސްޓްރަކްޗަރ އަށް ހަމަލާ ދިނުމުގެ ބަދަލުގައި ސަރުކާރުގެ އިސްވެރިންނަށް އަމާޒުކޮށް ސިއްރު ހަމަލާއެއް ދިނުމަކީވެސް އެކަށީގެންވާ ކަމެކެވެ.

މިކަންކަން މިހެން އޮތް އިރު އެމެރިކާއިން އިޒްރޭލަށް އިތުރު އެޑްވާންސްޑް އެންޓި-ބެލިސްޓިކް މިސައިލް ޑިފެންސް ސިސްޓަމެއް ފޮނުވުމާ ބެހޭގޮތުން މަޝްވަރާކުރަމުންދާ ކަމަށް ޚަބަރުތައް ބުނެއެވެ. ތާޑް (THAAD) ގެ ނަން ދެވިފައިވާ މި ސިސްޓަމުން، އީރާނުން އިތުރު ހަމަލާދޭ ހާލަތުގައި އިޒްރޭލަށް އިތުރު ހިމާޔަތާއި ރައްކާތެރިކަން ލިބޭނެ ކަމަށް ބެލެވެއެވެ. އެހެން ނަމަވެސް ރިޕޯޓްތައް ބުނާ ގޮތުގައި މި ސިސްޓަމް ފޮނުވުމާ ބެހޭ ގޮތުން އަދި ފައިނަލް ނިންމުމެއް އެމެރިކާ އިން ނުނިންމައެވެ. މިކަމުން ދޭހަވަނީ އިޒްރޭލުގެ އޮޕަރޭޝަން ފެށުމަށް އަދި ދުވަސްކޮޅެއް ނަގާނެ ކަމެވެ.

ތަޖުރިބާކާރުން ބުނާ ގޮތުގައި ތާޑް ސިސްޓަމްގެ ކޮންމެ ބެޓަރީއެއް އޮޕަރޭޓްކުރުމަށް 95 ސިފައިން ބޭނުންވެއެވެ. އެހެންކަމުން މި ހަނގުރާމައިގައި ފުރަތަމަ ފަހަރަށް އެމެރިކާގެ ސިފައިން އިޒްރޭލުގެ ބިމުގައި ގާއިމްވެ ތިބެން ޖެހޭނެއެވެ. 

ނަތަންޔާހޫ އާ މެދު ބައިޑެންގެ ސަރުކާރުން ކިތަންމެ ހިތްހަމަ ނުޖެހުންތައް ހުއްޓަސް، އަސްކަރީ ގޮތުން އެމެރިކާ އޮންނަނީ އިޒްރޭލާ އެކު ކޮނޑާއި ކޮނޑު ޖައްސައިގެން ކަމީ ފެންނަން އޮތް ހަގީގަތެކެވެ.