މުހިންމު ކުޅުންތެރިންގެ އެއްބަސްވުން އައު ނުކޮށް އޮތަސް، ސްލޮޓް ހާހެއް ނުވޭ!
އިތުރަށް ސްލޮޓް ބުނީ އަބަދު ވެސް ކުރިއަށް ދިޔުމުގައި މަސައްކަތް ކުރަން ޖެހޭނީ އެ އިރެއްގައި އޮންނަ ޙާލަތަކާ އެކު ކަމަށާއި، އެ ޙާލަތު ޤަބޫލު ވެސް ކުރަން ޖެހޭނެ ކަމަށެވެ.
ލިވަޕޫލަށް ކުޅެމުން އަންނަ ޞަލާޙު، ވެން ޑައިކް އަދި އާނޯލްޑް
ލިވަޕޫލަށް ކުޅެމުން އަންނަ މުހިންމު ބައެއް ކުޅުންތެރިންގެ އެއްބަސްވުން އައު ނުކޮށް އޮތް ނަމަވެސް، އެކަމާ ހާސްވުމެއް ނެތް ކަމަށް އެ ޓީމުގެ ކޯޗު އާން ސްލޮޓް ބުނެފި އެވެ.
ލިވަޕޫލްގައި މިވަގުތު ތިބި ކުޅުންތެރިންގެ ތެރެގައި މިޞްރުގެ ފޯވާޑު މުޙައްމަދު ޞަލާޙު، ނެދަލެންޑްސްގެ ވާޖިލް ވެން ޑައިކް އަދި އިންގްލެންޑުގެ ޓްރެންޓް އެލެގްޒެންޑާ އާނޯލްޑްގެ އެއްބަސްވުން ހަމަވާން ވަނީ ކައިރިވެފަ އެވެ. މި ތިން ކުޅުންތެރިން ވެސް ލިވަޕޫލާ އެކު ސޮއި ކޮށްފައިވާ އެއްބަސްވުމުގެ މުއްދަތު، މިހާރު ކުރިއަށްދާ ސީޒަންގެ ނިޔަލަށް ހަމަވާނެ އެވެ. ނަމަވެސް، އެއްބަސްވުން އައު ކުރުމާ މެދު މިހާތަނަށް ލިވަޕޫލް އިން ވަކި ގޮތެއް ނިންމާފައި ނުވާ ކަމަށް ރިޕޯޓުތަކުގައި ވަނީ ފާހަގަކޮށްފަ އެވެ.
އެކަމާ ގުޅޭ ގޮތުން ދާދި ފަހުން ޞަލާޙު ވެސް ވަނީ ވާހަކަ ދައްކައިފަ އެވެ. އޭނާ ބުނީ ލިވަޕޫލް އިން އޭނާ އަށް އައު އެއްބަސްވުމެއް ހުށަހަޅާފައި ނެތުމަކީ، ނުވަތަ އެކަމުގެ މަޝްވަރާތައް ނުކޮށް އޮތުމަކީ ކަންބޮޑުވާ ކަމެއް ކަމަށެވެ. އަދި މިވަގުތުގެ ޙާލަތަށް ބަލާއިރު، އޭނާ ލިވަޕޫލް ދޫކޮށްލުމުގެ ފުރުސަތު ވެސް ބޮޑު ކަމަށް ޞަލާޙު ވަނީ ބުނެފަ އެވެ. އަދި އެއްބަސްވުން އައު ކުުރުމަކީ ކުލަބުގެ އަތް މަތީގައި އޮތް ކަމެއް ކަމަށް ވެސް ޞަލާޙު ބުންޏެވެ.
މި ސީޒަނާ ދިމާކޮށް ލިވަޕޫލްގެ ކޯޗުކަމާ ހަވާލުވި ސްލޮޓްއާ އެ ސުވާލު ކުރުމުން އޭނާ ބުނީ، އެކަމާ އޭނާ ކަންބޮޑުވާން ނުވަތަ ހާސްވާން ނުޖެހޭ ކަމަށެވެ. އަދި އިތުރަށް ސްލޮޓް ބުނީ އަބަދު ވެސް ކުރިއަށް ދިޔުމުގައި މަސައްކަތް ކުރަން ޖެހޭނީ އެ އިރެއްގައި އޮންނަ ޙާލަތަކާ އެކު ކަމަށާއި، އެ ޙާލަތު ޤަބޫލު ވެސް ކުރަން ޖެހޭނެ ކަމަށެވެ. އޭނާ ބުނީ އެ ތިން ކުޅުންތެރިން ވެސް އަންނަނީ ލިވަޕޫލް ގައި ވަރަށް ރަނގަޅަށް ކުޅެމުން ކަމަށާއި، އެހެންކަމުން އުންމީދަކީ ދިގު މުއްދަތަކަށް އެކަން ދެމި އޮތުން ކަމަށެވެ.
ރޯމާ ދޫކޮށް ޞަލާޙު ލިވަޕޫލަށް ބަދަލުވީ 2017 ވަނަ އަހަރު އެވެ. އޭނާ ވަނީ މިހާތަނަށް އެ ކުލަބަށް ކުޅެދިން 371 މެޗުގައި 227 ލަނޑު ޖަހައިފަ އެވެ. ސައުތެމްޓަން ދޫކޮށް 2018 ވަނަ އަހަރު ލިވަޕޫލަށް ބަދަލުވި ވެން ޑައިކް ވަނީ އެ ކުލަބަށް ކުޅެދިން 290 މެޗުގައި 25 ލަނޑު ޖަހައިފަ އެވެ. އަދި 2016 ވަނަ އަހަރު ލިވަޕޫލް އިން ސީނިއާ ކެރިއަރު ފެށި އާނޯލްޑް ވަނީ އެ ކުލަބަށް ކުޅެދިން 328 މެޗުގައި 19 ލަނޑު ޖަހައިފަ އެވެ.
