އިދިކޮޅުގައި ޕާޓީ އޮންނައިރު ފައިސާ ފޮއްޗެއް ދިއްކޮށްލާނެ މީހަކު ނުވޭ: ރައީސް ސާލިހު
މިހާރު އެމްޑީޕީގެ ތެރޭގައި ކައުންސިލަރުންގެ ދައުރު އެހާ ބޮޑަކަށް ނެތް، މިކަން ބަދަލުކުރަންޖެހޭ
އެމްޑީޕީން ކުރިއަށް ގެންދާ ލާމަރުކަޒީ ގުޅުން ކޮންފަރެންސްގައި ކުރީގެ ރައީސް އިބްރާހިމް މުހައްމަދު ސާލިހު ވާހަކަދައްކަވަނީ
ސިޔާސީ ޕާޓީ ވެރިކަމުގައި އޮންނައިރު ވަރަށް ގިނަ މީހުން އަމިއްލައަށް ފެނިގެން ޕާޓީ ހިންގުމަށް ފައިސާ ދޭ ކަމަށާއި، ނަމަވެސް އެ ޕާޓީ އިދިކޮޅުގައި އޮންނައިރު، ފައިސާ ފޮއްޗެއް ދިއްކޮށްލާނެ މީހަކު ނުވާ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ހޮނިހިރު ދުވަހު ކުޅުދުއްފުށި ސިޓީގައި އެމްޑީޕީން ކުރިއަށް ގެންދާ ލާމަރުކަޒީ ގުޅުން ކޮންފަރެންސްގައި ރައީސް ސާލިހު ވިދާޅުވީ މި ކޮންފަރެންސް ކުރިއަށް ގެންދަނީ ވަރަށް މުހިންމު ވަގުތެއްގައި ކަމަށާއި، މި ކޮންފަރެންސްގެ ނަތީޖާ ވަރަށް ރަނގަޅުވާނެ ކަމަށެވެ.
އެމްޑީޕީގެ ތެރޭގައި ކައުންސިލަރުންގެ ދައުރު އެހައި ބޮޑަށް ނެތްކަން ފާހަގަކުރައްވައި ރައީސް ސާލިހު ވިދާޅުވީ މިކޮންފަރެންސްއިން އެބަދަލު ގެނެވި ކައުންސިލަރުންގެ ދައުރު ބޮޑު ކުރެވޭނެ ކަމަށެވެ. އެގޮތުން ކުރިއަށް އޮތްތަނުގައި އެމްޑީޕީގެ ގައުމީ މަޖިލީހުގެ ބަންދަލުވުންތަކުގައި ކައުންސިލަރުންނަށް ބައިވެރިވެވޭނެ ގޮތަށް ކަންކަން އިންތިޒާމް ކުރުމަށް ރައީސް ސާލިހު އެދިވަޑައިގެންނެވިއެވެ. އަދި ވިދާޅުވީ އެ މަސައްކަތް ކުރުމަށް އުދަނގޫވާނެ ކަމަށާއި، ނަމަވެސް ގައުމީ މަޖިލިސް ބައްދަލުވުންތަކުގައި ބޮޑެތި ސިޓީތަކުގެ މޭޔަރުންގެ ބައިވެރިވުން މުހިންމު ކަމަށެވެ.
މާލީ ފުދުންތެރިކަން އިތުރު ކުރުމަށް ފަށާފައިވާ މަސައްކަތްތަކަށް އިޝާރާތް ކުރައްވައި ރައީސް ސާލިހު ވިދާޅުވީ ވެރިކަމުގައި ޕާޓީ އޮންނައިރު، ޕާޓީ ހިންގުމަށް ވަރަށް ފަސޭހައިން މީހުން އެހީތެރިކަން ފޯރުކޮށްދޭ ކަމަށާއި، އަމިއްލައަށް އެދިގެން ވެސް ފައިސާ ޕާޓީއަށް ހަދިޔާ ކުރާ ކަމަށެވެ. ނަމަވެސް އިދިކޮޅުގައި ޕާޓީ އޮންނައިރު، ފައިސާ ފޮއްޗެއް ދިއްކޮށްލާނެ މީހަކު ނުވާ ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ އެމްޑީޕީއަށް އާމްދަނީ ހޯދުމަށް ފަށާ މަސައްކަތާއެކު ހެޔޮ ބަދަލުތައް އަންނާނެ ކަމަށާއި، ޕާޓީއަކީ އެންމެންގެ ޕާޓީއަކަށްވާނެ ކަމަށެވެ.
ރައީސް ސާލިހު ވިދާޅުވީ އެމްޑީޕީ އަކީ އެންމެންގެ ޕާޓީއެއް ކަމަށާއި، އެންމެނަށް ފުރުސަތު ލިބޭނެ ކަމަށެވެ.
