ނިކަރާގުއާ އިން އިޒްރޭލާ ގުޅުން ކަނޑާލައިފި

ނިކަރާގުއާ އިން އިޒްރޭލާ އެކު އޮންނަ ސިޔާސީ ގުޅުން ކަނޑާލައިފިއެވެ.

މެދުތެރޭ އެމެރިކާގައި އޮންނަ ނިކަރާގުއާ އިން އިޒްރޭލާ އެކު އޮންނަ ގުޅުން ކަނޑާލަމުން ބުނެފައިވަނީ އިޒްރޭލަކީ ޚުދުމުޚުތާރު ހައްދުފަހަނަ އަޅާފައިވާ ވަތަނީ އަދި ނަސްލުނައްތާލުމުގެ ޖަރީމާ ހިންގާ ދައުލަތެއް ކަމަށެވެ.

ނިކަރާގުއާ އިން އިޒްރޭލާ ގުޅުން ކަނޑާލި ސަބަބެއް ކަމަށް ބުނެފައިވަނީ ފަލަސްތީނަށް ދެމުންދާ ހަމަލާތަކާއި، އަދި އިޒްރޭލުން މިހާރު ލުބުނާން އަށާއި ސީރިޔާ އަށާއި އީރާނަށް ނުރައްކާކުރަމުންދާތީ ކަމުގައެވެ.

ހުކުރު ދުވަހު ނިކަރާގުއާ ގެ ގާނޫނު ހަދާ މަޖިލީހުން އިޒްރޭލާ އެ ގައުމާއެކު އޮންނަ ގުޅުން ކަނޑާލުމަށް ރައީސް އޮރެޓެގާ އަށް ގޮވާލާ ވަނީ ގަރާރެއް ފާސްކޮށްފައެވެ. އޮރެޓެގާ އަކީ އީރާނާ ގާތް ގުޅުމެއް ބާއްވަވާކަން ފާހަގަ ކުރެވޭ ބޭފުޅެކެވެ.

ނިކަރާގުއާ އިން އިޒްރޭލާއެކު އޮންނަ ގުޅުން ކަނޑާލަން އެ ގައުމުން ނިންމި އިރު، ޣައްޒާ އަށް މިދިޔަ އަހަރުގެ އޮކްޓޯބަރު 7 ވަނަ ދުވަހުން ފެށިގެން އިޒްރޭލުން މެދުކެނޑުމެއް ނެތި ދެމުންދާ ހަމަލާތަކުގައި މަރުވި ފަލަސްތީނު މީހުންގެ އަދަދު މިހާރު ވަނީ 42،126 ށް މުރެ މައްޗަށް ގޮސްފައެވެ.