ފްލޮރިޑާއަށް އައި ވަރުގަދަ ތޫފާން: 15 މީހުން މަރުވެ، 3 މިލިއަނަށް ވުރެ ގިނަ މީހުން ކަނު އަނދިރީގައި

މިހާތަނަށް ފްލޮރިޑާއަށް އައި އެންމެ ވަރުގަދަ ތޫފާން ކަމުގައިވާ ހަރިކޭން މިލްޓަންގައި މިހާތަނަށް 15 މީހުން ވަރުވެއްޖެ ކަމަށް ފްލޮރިޑާގެ ހޯމްލޭންޑް ސެކިއުރިޓީ ޑިޕާޓްމަންޓުން ބުނެފިއެވެ.

އެމެރިކާގެ ހޯމްލޭންޑް ސެކިއުރިޓީ ސެކްރެޓަރީ އަލެހާންޑްރޯ މަޔޯރްކާސް ވައިޓް ހައުސްގައި ބޭއްވުއްވުނު ބްރީފިންގެއްގައި ހާމަކުރިގޮތުގައި މިހާތަނަށް 10 މީހުން މަރުވެފައިވާ ކަމަށާއި، އެއީ ތޫފާނުގެ ސަބަބުން މަރުވި މީހުން ކަމަށް ފެންނަ ކަމަށެވެ. އޭނާ ވިދާޅުވި ގޮތުގައި މަދުވެގެން 27 ޓޯނޭޑޯ ފްލޮރިޑާގައި އުފެދިފައިވެއެވެ.

ހޯމްލޭންޑް ސެކިއުރިޓީ ޑިޕާޓްމަންޓުގެ މި ބްރީފިންގެ ފަހުން މިހާތަނަށް އިތުރު 5 މީހަކު މަރުވެފައިވާ ކަމަށް މީޑިއާ ރިޕޯޓުތައް ބުނެއެވެ.

ޕަވަރއައުޓޭޖް.ޔޫއެސް އިން މައުލޫމާތުދޭ ގޮތުގައި، ބުރާސްފަތި ދުވަހު އެޓްލާންޓިކް ކަނޑުގައި އުފެދުނު މިތޫފާނުގެ ސަބަބުން ބުރާސްފަތި ދުވަހުގެ މެންދުރުފަހު ފްލޮރިޑާގެ 3.2 މިލިއަނަށްވުރެ އިމާރާތްތަކުން ކަރަންޓު ވަނީ ކެނޑިފައެވެ. ކަރަންޓު ކެނޑުނު ތަންތަނުގެ ތެރޭގައި ގޭބިސީތަކާއި، އޮފީސްތަކާއި، ފިހާރަތަކާއި، ރެސްޓޯރަންޓުތައް ހިމެނެއެވެ.

ފްލޮރިޑާގެ ޑިވިޜަން އޮފް އިމަރޖެންސީ މެނޭޖްމަންޓްގެ ޑިރެކްޓަރ ކެވިން ގަތްރީ ވިދާޅުވި ގޮތުގައި، ތޫފާންގެ އަސަރު ކުރަން ފެށުމާއެކު ފްލޮރިޑާގައި މީހުން ދިރިއުޅޭ ގާތްގަނޑަކަށް 125 ގެ ސުންނާފަތިވި ކަމަށާއި މީގެ ތެރޭގައި ގިނައީ އުމުރުން ދުވަސްވީ މީހުންގެ އުޅޭ ސަރަހައްދުތަކުގައި ހުރި މޮބައިލް ގެތައް ކަމަށެވެ.

ތޫފާނާ ގުޅޭގޮތުން މައުލޫމާތު ދެއްވަމުން ގަވަރުނަރު ރޮން ޑިސެންޓިސް ވިދާޅުވެފައިވަނީ "މިހާރު އެންމެ ނުރައްކާތެރި ހާލަތުން ސަލާމަތްވެފައިވާ ކަމަށެވެ. ނަމަވެސް ތޫފާނުގެ ސަބަބުން ލިބޭނެ ގެއްލުންތައް އަދިވެސް ވަރަށް ބޮޑުކަމާއި، އެގޮތުން ފެންބޮޑުވުމުގެ ނުރައްކާ އަދިވެސް އޮތް،" ކަމަށެވެ.

ތޫފާނުގެ ނުރައްކާ އެންމެ ބޮޑަށް ކުރާނެ ކަމަށް ބެލެވުނު ޓެމްޕާ ބޭ އަށް ލަފާކުރި ވަރުގެ ބޮޑެތި ގެއްލުން ތަކެއް ނުވި ނަމަވެސް، އެ ސިޓީގެ ދެކުނުގައިވާ ގޮނޑުދޮށާ ކައިތި ރަށްތަކުގައި ވަނީ ވަރަށް ބޮޑަށް ފެންބޮޑުވެފައިވެއެވެ.

ތޫފާނާ ގުޅޭގޮތުން އެމެރިކާގެ ރައީސް ޖޯ ބައިޑްން ނެރުއްވި ބަޔާނެއްގައި ތޫފާނުގެ ސަބަބުން އަސަރުކުރި ފަރާތްތައް ރައްކާތެރި ތަންތަނުގައި ތިބެ، މަގުމައްޗަށް ނުނިކުތުމަށް ވަނީ ގޮވާލައްވާފައެވެ.

"އެހީތެރިކަން ލިބޭނެ. އެހީ ވަނީ ފޮނުވިފައި. ނަމަވެސް އެހީތެރިކަން ލިބެންދެން ސަރަޙައްދުގެ ކަމާބެހޭ އިދާރާތަކުން ބޭރަށް ނިކުތުން ރައްކާތެރިކަމަށް އަންގަންދެން، ރައްކާތެރި ތަންތަނުގައި ތިބޭ،" ރައީސް ބައިޑްން ވިދާޅުވިއެވެ.

އެމެރިކާގެ ނޭޝަނަލް ހަރިކޭން ސެންޓަރ (އެން.އެޗް.ސީ) އިން ބުނި ގޮތުގައި، ފްލޮރިޑާގެ ހުޅަނގު އައްސޭރިފަށަށް އައި ތޫފާނުގެ ގަދަކަން ވަނީ ކެޓަގަރީ 1ށް ދަށްވެފައެވެ. ނަމަވެސް، މި ތޫފާން ފްލޮރިޑާއަށް އައިސްފައިވަނީ ގަޑިއަޑިއަކު 150 ކިލޯމީޓަރު (93 މޭލު) ގެ ބާރުމިނުގައި ކަމަށެވެ.

ތޫފާން ހަރިކޭން މިލްޓަން އައީ ބުދަ ދުވަހުގެ ރޭ ގާތްގަނޑަކަށް 8:30 ގައި ކެޓަގަރީ 3 ގެ ތޫފާނެއްގެ ގޮތުގައެވެ. ތޫފާނުގައި ވައި ގަދަވާނެ ކަމަށް ލަފާކުރެވުނީ ގަޑިއަކު 195 ކިލޯމީޓަރު (121 މޭލު) އަށެވެ.

ތޫފާން ހަރިކޭން މިލްޓަން އަކީ "ޤަރުނުގެ ބޮޑު ތޫފާން" ގެ ގޮތުގައި މޫސުމާ ބެހޭ މާހިރުން ސިފަކުރެއެވެ.

އިންތިހާއަށް ގަދަފަދަ އަދި ނުރައްކާތެރި މަރުގެ ތޫފާނެއް ގޮތުގައި މުސުމާ ބެހޭ މާހިރުން ސިފަކުރާ 'ހަރިކޭން މިލްޓަން' އިން ސަލާމަތްވާން އެމެރިކާގެ ފްލޮރިޑާގެ މިލިއަނަކަށް ވުރެ ގިނަ ރައްޔިތުން އެ ސްޓޭޓް ދޫކޮށް މިހާރުވަނީ ގޮސްފައެވެ.